ଭୁବନେଶ୍ୱର,୨୩/୧୨: ଗତ ଦୁଇ ଦିନ ତଳେ ବର୍ଷା ହୋଇ ବହୁ ଫସଲ କ୍ଷତିଗ୍ରସ୍ତ ହୋଇଥିଲା । ଆଗକୁ ପୁଣି ବର୍ଷା ଆସୁଛି । ଆସନ୍ତା ୨୪ ତାରିଖରୁ ପୁଣି ବର୍ଷା ହୋଇପାରେ । ୨୪ରେ ଉପକୂଳ ଓଡ଼ିଶା ଓ ଦକ୍ଷିଣ ଓଡ଼ିଶାରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ସମ୍ଭାବନା ଅଛି । ୨୫ ତାରିଖରେ ବି ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ୨୫ରେ ୫ଟି ଜିଲ୍ଲାରେ ଭାରୀ ବର୍ଷା ହୋଇପାରେ ବୋଲି ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ଡ. ସୁରେନ୍ଦ୍ରନାଥ ପଶୁପାଳକ ଆକଳନ କରିଛନ୍ତି ।
ପାଣିପାଗ ବିଭାଗର ପୂର୍ବାନୁମାନ ଅନୁସାରେ, ବାୟୁମଣ୍ଡଳରେ ପବନର ଦିଗ ପରିବର୍ତ୍ତନ ଯୋଗୁ ୨୪ ଓ ୨୫ରେ ବର୍ଷା ହେବ । ୨୪ରେ ରାୟଗଡ଼ା, ଗଜପତି, ଗଞ୍ଜାମ, ପୁରୀ, ଖୋର୍ଦ୍ଧା, ଜଗତ୍ସିଂହପୁର, କେନ୍ଦ୍ରାପଡ଼ା, ବାଲେଶ୍ୱର, ଭଦ୍ରକ, ଯାଜପୁର, କଟକ, ଢେଙ୍କାନାଳ, ନୟାଗଡ଼, କୋରାପୁଟ, ମାଲକାନଗିରି ଓ କନ୍ଧମାଳରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହୋଇପାରେ । ୨୫ରେ ଉପକୂଳ ଓଡ଼ିଶାର କିଛି ସ୍ଥାନରେ ବର୍ଷା ସମ୍ଭାବନା ଅଛି ।
ପ୍ରଫେସର ପଶୁପାଳକ କହିଛନ୍ତି, ବଙ୍ଗୋପସାଗରରେ ଏବେ ଅବପାତ ସକ୍ରିୟ ରହିଛି । ରବିବାର ସନ୍ଧ୍ୟା ବେଳକୁ ଏହା ଦକ୍ଷିଣ ପଶ୍ଚିମ ବଙ୍ଗୋପସାଗରର ଉପକୂଳରୁ ଦୂରରେ ସମୁଦ୍ର ଭିତରେ ଥିଲା । ପବନର ଗତି ପରିବର୍ତ୍ତନ ପରେ ଏହାର ବିସ୍ତୃତି ବଢ଼ିଛି । ଏହାର ଅବସ୍ଥିତି କେନ୍ଦ୍ରୀୟ ପଶ୍ଚିମ ବଙ୍ଗୋପସାଗର ଯାଏ ରହିବ । ଏହାର ପ୍ରଭାବରେ ରାଜ୍ୟରେ ୨୪ ଓ ୨୫ ତାରିଖରେ ବର୍ଷା ହେବ । ୨୪ ତାରିଖରେ ଉପକୂଳ ଜିଲ୍ଲାରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବ । ବାଲେଶ୍ୱରରୁ ଗଞ୍ଜାମ ଯାଏ ସମସ୍ତ ଉପକୂଳ ଓ ସଂଲଗ୍ନ ଜିଲ୍ଲାରେ ବର୍ଷା ସମ୍ଭାବନା ଅଛି । ୨୫ରେ ଜଗତ୍ସିଂହପୁର, ଖୋର୍ଦ୍ଧା, ପୁରୀ, ଗଞ୍ଜାମ ଓ ନୟାଗଡ଼ରେ ମଧ୍ୟମରୁ ଭାରୀ ବର୍ଷା ହେବ। ସମୁଦ୍ର ସଂଲଗ୍ନ ଅଞ୍ଚଳରେ ଭାରୀ ବର୍ଷା ହୋଇପାରେ ବୋଲି ସେ କହିଛନ୍ତି ।
ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ କହିଛନ୍ତି, ଓଡ଼ିଶା ଉପକୂଳରେ ବଙ୍ଗୋପସାଗର ଉପରେ ସୋମବାର ସନ୍ଧ୍ୟାରେ ଏକ ଗୁରୁଚାପ ରହିବ । ଏହା ପ୍ରଭାବରେ ରାଜ୍ୟରେ ୨୪ ତାରିଖରେ ବର୍ଷା ହୋଇପାରେ । ଭୁବନେଶ୍ୱର, ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର, ବାଲେଶ୍ୱର, ମୟୂରଭଞ୍ଜ, କେନ୍ଦୁଝର ଓ ଢେଙ୍କାନାଳରେ ବର୍ଷା ସମ୍ଭାବନା ଅଛି । ତେବେ ୩୧ ତାରିଖରୁ ରାଜ୍ୟରେ ରାତି ତାପମାତ୍ରା ଖସିବା ସହ ଥଣ୍ଡା ବଢ଼ିବ ବୋଲି ସେ ପୂର୍ବାନୁମାନ କରିଛନ୍ତି ।
ସିମିଳିଗୁଡ଼ାରେ ରାତି ତାପମାତ୍ରା ୧୦.୬ ଡିଗ୍ରୀ ସେଲସିୟସ୍ ଥିଲା । କୋରାପୁଟ ଓ ନୟାଗଡ଼ରେ ପାରଦ ୧୧.୫, ନୂଆପଡ଼ାରେ ୧୨, ଭଦ୍ରକରେ ୧୩, ଜଗତସିଂହପୁରରେ ୧୩.୬, ଦାରିଙ୍ଗିବାଡ଼ିରେ ୧୩.୫, କେନ୍ଦ୍ରାପଡ଼ାରେ ୧୪, ଝାରସୁଗୁଡ଼ାରେ ୧୪.୮ ଓ ଭବାନୀପାଟଣାରେ ୧୪.୯ ଡିଗ୍ରୀ ରେକର୍ଡ ହୋଇଛି ।
