ଭୁବନେଶ୍ୱର,୧୨/୧୨: ଦୁଇ ସପ୍ତାହ ପରେ ରାଜ୍ୟରେ ପାରଦ ପୁଣି ତଳମୁହାଁ ହୋଇଛି । ଦିନକରେ ୧୩ଟି ସହରର ରାତି ତାପମାତ୍ରା ୧୫ ଡିଗ୍ରୀ ସେଲସିୟସ୍ ତଳକୁ ଖସିଆସିଛି । କେନ୍ଦୁଝର ଓ ଅନୁଗୁଳରେ ରାତି ତାପମାତ୍ରା ଦିନକରେ ସର୍ବାଧିକ ୫ ଡିଗ୍ରୀ କମିଛି । ଝାରସୁଗୁଡ଼ା ସବୁଠୁ ଥଣ୍ଡା ସହର ପାଲଟିଛି ।
ମଙ୍ଗଳବାର ଝାରସୁଗୁଡ଼ାର ରାତି ତାପମାତ୍ରା ସର୍ବନିମ୍ନ ୧୦.୮ ଡିଗ୍ରୀ ରହିଥିଲା । ସୋମବାର ଏଠାରେ ରାତି ତାପମାତ୍ରା ୧୫.୨ ଡିଗ୍ରୀ ଥିଲା । କିନ୍ତୁ ୨୪ ଘଣ୍ଟାରେ ପାରଦ ପ୍ରାୟ ୪ ଡିଗ୍ରୀ ଖସିଯାଇଛି । କେନ୍ଦୁଝରରେ ରାତି ତାପମାତ୍ରା ୧୨.୪ ଡିଗ୍ରୀ ରହିଛି । ୨୪ ଘଣ୍ଟା ତଳେ ଏଠାରେ ତାପମାତ୍ରା ୧୭.୨ ଡିଗ୍ରୀ ଥିଲା । ଦିନକରେ ସର୍ବନିମ୍ନ ତାପମାତ୍ରା ୫ ଡିଗ୍ରୀ କମିଛି ।
କୋରାପୁଟରେ ରାତି ତାପମାତ୍ରା ୧୨.୬ ଡିଗ୍ରୀ ରହିଛି । ଭବାନୀପାଟଣାରେ ୧୩.୧ ଡିଗ୍ରୀ ରେକର୍ଡ ହୋଇଛି । ୨୪ ଘଣ୍ଟା ତଳେ ଏଠାରେ ରାତି ତାପମାତ୍ରା ୧୭ ଡିଗ୍ରୀ ଥିଲା । ଦାରିଙ୍ଗିବାଡ଼ିରେ ୧୬ଡିଗ୍ରୀରୁ ଖସି ୧୩.୫ଡିଗ୍ରୀ ରହିଛି । ଅନୁଗୁଳରେ ଦିନକରେ ୫ ଡିଗ୍ରୀ କମିଛି । ସୁନ୍ଦରଗଡ଼ ଓ ଫୁଲବାଣୀରେ ରାତି ତାପମାତ୍ରା ୧୪ ଡିଗ୍ରୀ ରେକର୍ଡ ହୋଇଛି । ହୀରାକୁଦରେ ୧୪.୭, ତାଳଚେରରେ ୧୪.୮ ସୋନପୁରରେ ୧୫, ରାୟଗଡ଼ା ଓ ନୂଆପଡ଼ାରେ ୧୫.୪, ବୌଦ୍ଧ ଓ କଟକରେ ୧୫.୫ ଡିଗ୍ରୀ ରେକର୍ଡ ହୋଇଛି ।
ରାଜଧାନୀ ଭୁବନେଶ୍ୱରରେ ରାତି ତାପମାତ୍ରା ଦିନକରେ ୩ ଡିଗ୍ରୀ କମିଥିଲେ ବି ୧୮.୨ ଡିଗ୍ରୀ ରହିଥିଲା । ତେବେ ଆସନ୍ତା ୪ରୁ ୫ ଦିନ ଯାଏ ରାଜ୍ୟର ରାତି ତାପମାତ୍ରାରେ କୌଣସି ପରିବର୍ତ୍ତନ ହେବନି ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।
