କୋଲକାତା,୫।୫: ସମସ୍ତଙ୍କ ପ୍ରଗତି ପାଇଁ ଟଙ୍କା ଏବଂ ସମୃଦ୍ଧି ଅତ୍ୟାବଶ୍ୟକ। ଘର ହେଉ କି ରାଜ୍ୟ, ଟଙ୍କାର ଅଭାବ ଭୟଙ୍କର ପରିଣାମ ଆଣିପାରେ। ଭାରତୀୟ ଜନତା ପାର୍ଟି (ବିଜେପି) ପଶ୍ଚିମବଙ୍ଗରେ ଏକ ବଡ଼ ବିଜୟ ସହିତ ଜିତିଛି। କିନ୍ତୁ ଆମେ ଆଜି ଆପଣଙ୍କୁ ଯାହା କହିବାକୁ ଯାଉଛୁ ତାହା ବଙ୍ଗଳାର ପ୍ରଗତି ସହିତ ସିଧାସଳଖ ଜଡିତ। ଯେକୌଣସି ରାଜ୍ୟର ଅର୍ଥନୀତିରେ ଉନ୍ନତି ପାଇଁ ନିବେଶ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ବଙ୍ଗଳା ବିଷୟରେ କହିବାକୁ ଗଲେ, ବଙ୍ଗଳାର ପ୍ରଗତିରେ ନିବେଶ ସବୁଠାରୁ ବଡ଼ ଖଳନାୟକ ପାଲଟିଥିଲା। ଆସନ୍ତୁ ଜାଣିବା ବିନା ନିବେଶର ବଙ୍ଗଳାର ସ୍ଥିତି କିଭଳି ଖରାପ ହୋଇଥିଲା ?
ପଶ୍ଚିମବଙ୍ଗରେ ପ୍ରାୟ ୬୬୦୦ ରୁ ଅଧିକ କମ୍ପାନୀ ବନ୍ଦ ହୋଇଯାଇଥିଲା କିମ୍ବା ରାଜ୍ୟ ଛାଡି ଅନ୍ୟ ରାଜ୍ୟକୁ ସିଫ୍ଟ ହୋଇଯାଇଥିଲା। ଏହାର ପରିଣାମ ରାଜ୍ୟର ଉନ୍ନତି ଉପରେ ପଡିଥିଲା। ଦେଶର ବଡ ଅଟୋ କମ୍ପାନୀ ହିନ୍ଦୁସ୍ତାନ ମୋଟର୍ସ ପ୍ଲାଣ୍ଟ ୨୦୧୪ ରୁ ବନ୍ଦ ପଡିଛି। ସେଭଳି ବଙ୍ଗଳାର ଆଉ ଏକ ବଡ କମ୍ପାନୀ ଡନଲପ୍ ଇଣ୍ଡିଆର ପ୍ଲାଣ୍ଟ ଦୀର୍ଘ ଦିନ ଧରି ବନ୍ଦ ପଡିଛି। ବିଶେଷଜ୍ଞଙ୍କ ମତରେ, ଯେତେବେଳେ କୌଣସି ରାଜ୍ୟରେ ନିବେଶ ବନ୍ଦ ହୋଇଯାଏ, ଏବଂ ପୂର୍ବରୁ ଥିବା ନିବେଶ ମଧ୍ୟ ବନ୍ଦ ହୋଇଯାଏ, ପରିସ୍ଥିତି ଆହୁରି ଖରାପ ହେବା ସୁନିଶ୍ଚିତ। ବିଶେଷଜ୍ଞଙ୍କ ମତରେ, ବଙ୍ଗଳାର ଶିଳ୍ପ ହ୍ରାସ କୌଣସି ଏକ କମ୍ପାନୀ ଯୋଗୁଁ ନୁହେଁ, ବରଂ ପୁରୁଣା ଶିଳ୍ପଗୁଡ଼ିକୁ ଅପଡେଟ୍ ନ କରିବା, ନୂତନ ପ୍ରଯୁକ୍ତିବିଦ୍ୟାର ଅଭାବ ଏବଂ ଆର୍ଥିକ ଏବଂ ନୀତିଗତ ସମନ୍ୱୟର ଅଭାବର ମିଳିତ ପ୍ରଭାବ। ଏହାର ପରିଣାମସ୍ୱରୂପ ବଙ୍ଗଳାର ଅନେକ ବଡ଼ କମ୍ପାନୀ ବଙ୍ଗଳା ଛାଡି ଗୁଜୁରାଟ ଏବଂ ମହାରାଷ୍ଟ୍ରକୁ ସ୍ଥାନାନ୍ତରିତ ହୋଇଥିଲେ। ଏହାର ଏକ ପ୍ରମୁଖ ଉଦାହରଣ ଥିଲା ଟାଟାର ଡ୍ରୀମ୍ ପ୍ରୋଜେକ୍ଟ ନାନୋ ଯାହାକୁ ରତନ ଟାଟା ବଙ୍ଗଳାର ସିଙ୍ଗୁରରେ ବିକଶିତ କରିବାକୁ ଯୋଜନା କରିଥିଲେ। ତେବେ ୨୦୦୮ ରେ ପ୍ରୋଜେକ୍ଟ କ୍ୟାନସେଲ୍ ହେବାପରେ ନାନୋ ଗୁଜରାଟର ସାନନ୍ଦକୁ ସିଫ୍ଟ ହୋଇଯାଇଥିଲା। ଆଜି ଗୁଜୁରାଟର ସାନନ୍ଦ ଦେଶର ପ୍ରମୁଖ ଅଟୋ ହବ୍ ମଧ୍ୟରୁ ଅନ୍ୟତମ ଭାବରେ ପରିଚିତ। ସେଭଳି ବଙ୍ଗଳାର ରାଜଧାନୀ କୋଲକାତାରେ ଅବସ୍ଥିତ ସିଗାରେଟ୍ ଜାଏଣ୍ଟ ଆଇଟିସି ପରେ ଗୁଜୁରାଟ ଏବଂ ମହାରାଷ୍ଟ୍ରରେ ଅଧିକ ସକ୍ରିୟ ହୋଇଗଲା। ପେଟ୍ରୋକେମିକାଲ୍ ଜାଏଣ୍ଟ ରିଲାଏନ୍ସ ଇଣ୍ଡଷ୍ଟ୍ରିଜ୍ ଧୀରେ ଧୀରେ ବଙ୍ଗଳାରେ ଏହାର ଉପସ୍ଥିତି ହ୍ରାସ କରି ଗୁଜୁରାଟର ଜାମନଗରକୁ ବିସ୍ତାରିତ କଲା। ଟାଟା ଏବଂ ଅମ୍ବାନୀ ବ୍ୟତୀତ, ବିର୍ଲା ଗ୍ରୁପ୍ ମଧ୍ୟ ବଙ୍ଗଳାରେ ଥିବା ଏହାର ପୁରୁଣା ୟୁନିଟ୍ ବନ୍ଦ କରି ଗୁଜୁରାଟ ଏବଂ ମହାରାଷ୍ଟ୍ରକୁ ସ୍ଥାନାନ୍ତରିତ କରିଥିଲେ। ଯଦି କେବଳ ନାନୋ ବଙ୍ଗଳାରେ ରହିଥାନ୍ତା ତେବେ ପ୍ରାୟ ୧୦ ହଜାରରୁ ଅଧିକ ଲୋକଙ୍କୁ ରୋଜଗାର ମିଳିପାରିଥାନ୍ତା।
ଏ ତ ଥିଲା ବଡ କମ୍ପାନୀଙ୍କ କଥା। ଏବେ ପ୍ରତି ସେକ୍ଟର ବିଷୟରେ ଆସନ୍ତୁ ଜାଣିବା କିଭଳି ବଙ୍ଗଳା ଧିରେ ଧିରେ ବିକାଶ ଦିଗରେ ପଛେଇ ଯାଇଥିଲା। ବଙ୍ଗଳା ପାଇଁ ଝୋଟ ଇଣ୍ଡଷ୍ଟ୍ରୀ ଏକ ସମୟରେ ଆୟର ସବୁଠାରୁ ବଡ଼ ଜରିଆ ଥିଲା। କିନ୍ତୁ ବହୁ ଝୋଟ ମିଲ୍ ବନ୍ଦ ହୋଇଯାଇଥିଲା। ସବୁଠାରୁ ବଡ଼ ଝୋଟ କମ୍ପାନୀ ନ୍ୟାସନାଲ ଝୋଟ ମିଲ୍ସ, ଏଲେକଜେଣ୍ଡ୍ରା ଝୋଟ ମିଲ୍, କନିଶନ୍ ଝୋଟ ମିଲ୍, ଖାରଦାହ ଝୋଟ ମିଲ୍ ମଧ୍ୟ ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା।
ଝୋଟ ବ୍ୟତୀତ ବଙ୍ଗଳାର ଆର୍ଥିକ କ୍ଷେତ୍ର ଗୁରୁତର ଭାବରେ କ୍ଷତିଗ୍ରସ୍ତ ହୋଇଥିଲା। ୨୦୧୩ ରେ ସାରଦା ଗ୍ରୁପ୍ ଦୁର୍ନୀତି ପ୍ରକାଶ ଜଣାପଡିବା ପରେ ଫାଇନାନ୍ସ ସେକ୍ଟର ସମ୍ପୂର୍ଣ୍ଣ ଭାବରେ ପ୍ରଭାବିତ ହୋଇଥିଲା। ସାରଦା ଦୁର୍ନୀତିର କ୍ଷତ ଶୁଖିବା ପୂର୍ବରୁ ରୋଜ୍ ଭ୍ୟାଲି ଗ୍ରୁପ୍ ସହ ଜଡିତ ଆଉ ଏକ ଦୁର୍ନୀତି ସାମ୍ନାକୁ ଆସିଥିଲା, ଯାହା ପରବର୍ତ୍ତୀ ସମୟରେ ଏହାର କାର୍ଯ୍ୟ ବନ୍ଦ କରିଦେଇଥିଲା। ବଙ୍ଗଳାର ଭୟଙ୍କର ପରିସ୍ଥିତିର ବାସ୍ତବତା ହେଉଛି ହଜାର ହଜାର ଏମଏସଏମଇ ବନ୍ଦ ପଡିଛି। ପୂର୍ବରୁ ପ୍ରତିଷ୍ଠିତ ଇଞ୍ଜିନିୟରିଂ କମ୍ପାନୀଗୁଡ଼ିକ ଧୀରେ ଧୀରେ ଶେଷ ହୋଇସାରିଥିଲା। ଝୋଟ ଓ ଫାଇନାନ୍ସ ବ୍ୟତୀତ ଅଟୋ, ଇଞ୍ଜିନିୟରିଂ, ମାନୁଫାକଚରିଂ ଭଳି ସେକ୍ଟରର ସ୍ଥିତି ଖରାପ ହୋଇ ସାରିଛି। ଦେଶର ସବୁଠାରୁ ବଡ ଅଟୋ କମ୍ପାନୀ ହିନ୍ଦୁସ୍ତାନ ମୋଟର୍ସର ପ୍ଲାଣ୍ଟ ୨୦୧୪ ରୁ ବନ୍ଦ ପଡିଛି। ଏବେ ବଙ୍ଗଳାରେ ବିଜେପି ସରକାର ଆସିବା ପରେ ବିଶେଷଜ୍ଞଙ୍କ ମତରେ ଉତ୍ତର ପ୍ରଦେଶ ଭଳି ବଙ୍ଗରେ ମଧ୍ୟ ନିବେଶର ନୂତନ ହବ୍ ଗଠନ କରାଯିବ। ବଙ୍ଗଳାର କାୟାକଳ୍ପ ବଦଳିଯିବ।
ଆହୁରି ପଢନ୍ତୁ : ନିର୍ବାଚନ ହାରିବା ପରେ ମମତା ବାନାର୍ଜୀଙ୍କ ଘୋଷଣା, ଲୋକଭବନ ଯାଇ ଇସ୍ତଫା ଦେବିନି, ମୁଁ ହାରିନି, ମୋତେ ହରାଯାଇଛି...
