ପାତ୍ରପୁର,୨୬/୦୫; ଜରଡା ଥାନା ଅନ୍ତର୍ଗତ କେଶରୀପଡା ଗ୍ରାମ ମଶାଣି ନିକଟରେ ସଡ଼କ ଦୁର୍ଘଟଣା ଘଟି ସ୍ତ୍ରୀର ମୃତ୍ୟୁ ଘଟିଥିବା ବେଳେ ସ୍ବାମୀ ଗୁରୁତର ହୋଇଛି। ମୃତ ମହିଳା ଜଣକ ହେଲେ ପଡୋଶୀ ରାଜ୍ୟ ଆନ୍ଧ୍ରପ୍ରଦେଶ ଶ୍ରୀକାକୁଲମ ଜିଲ୍ଲା କାଞ୍ଚିଲି ଗ୍ରାମର ଚନ୍ଦନ ଜାନକୀ (୪୦) । ଚନ୍ଦନଙ୍କ ସ୍ବାମୀ ବାସୁଦେବ ଗୁରୁତର ଆହତ ହୋଇଛନ୍ତି।
ସୂଚନା ଯୋଗ୍ୟ ଯେ ଚନ୍ଦନ ଜାନକୀ ଓ ତାଙ୍କ ସ୍ୱାମୀ ବାସୁଦେବ ଉଭୟ ନିଜ ସ୍କୁଟିରେ (ଏପି ୪୦ ସିକ୍ୟୁ ୬୨୪୧) ପାତ୍ରପୁର ବ୍ଲକ ଖମ୍ବାରିଗାଁ ପଞ୍ଚାୟତ ଅନ୍ତର୍ଗତ ଖଣ୍ଡଦେଉଳି ଗ୍ରାମର ସମ୍ପର୍କିୟଙ୍କୁ ଭେଟିବା ପାଇଁ ଆସିଥିଲେ। ସେଠାରୁ ଫେରିବା ସମୟରେ ଜୟନ୍ତୀପୁର ଓ କେଶରୀପଡା ରାସ୍ତା ମଧ୍ୟସ୍ଥଳରେ ଏକ ମଶାଣି ନିକଟରେ ସ୍କୁଟିଟି ଭାରସାମ୍ୟ ହରାଇ ରାସ୍ତା ଉପରେ ଓଲଟି ଯାଇଥିଲା। ଫଳରେ ଚନ୍ଦନ ଜାନକୀ ଓ ତାଙ୍କ ସ୍ୱାମୀ ରାସ୍ତାରେ ଛିଟିକି ପଡ଼ିଯାଇଥିଲେ । ତୁରନ୍ତ ଉଭୟଙ୍କୁ ୧୦୮ ଆମ୍ବୁଲାନ୍ସ ଦ୍ଵାରା ପାତ୍ରପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତର କରାଯାଇଥିଲା। କିନ୍ତୁ ସେଠାରେ ଡାକ୍ତର ଚନ୍ଦନ ଜାନକୀଙ୍କ ମୃତ ଘୋଷଣା କରିଥିବା ବେଳେ ତାଙ୍କ ସ୍ୱାମୀ ଚନ୍ଦନ ବାସୁଦେବଙ୍କୁ ଚିକିତ୍ସା କରିଥିଲେ। ଏହି ବିଷୟରେ ମୃତକଙ୍କ ଭଉଣୀ ଆୟୁଦାମ ୱାନଜାକ୍ଷୀ ଜରଡା ଥାନାରେ ଲିଖିତ ଅଭିଯୋଗ କରିବା ପରେ ମେଡ଼ିକାଲରେ ଜରଡା ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଛେଦ ପାଇଁ ପଠାଇ ଘଟଣାର ତଦନ୍ତ କରୁଛି ।
