ନୂଆଦିଲ୍ଲୀ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଚଳିତ ବର୍ଷ ଅର୍ଥାତ ୨୦୨୫ ପାଇଁ ନୋବେଲ ଶାନ୍ତି ପୁରସ୍କାର ମିଳିବାକୁ ନେଇ ଆଶା କରାଯାଉଥିଲା। ଏଥିପାଇଁ ସେ ଅନେକ ଥର ଖୋଲାଖୋଲି ଭାବରେ ଦାବି ମଧ୍ୟ କରିଥିଲେ । କିନ୍ତୁ ଟ୍ରମ୍ପଙ୍କୁ ଚଳିତଥର ନୋବେଲ ଶାନ୍ତି ପୁରସ୍କାର ମିଳିଲା ନାହିଁ । ଟ୍ରମ୍ପଙ୍କ ସ୍ଥାନରେ ମାରିଆ କୋରିନା ମାଚାଡୋଙ୍କୁ ୨୦୨୫ ପାଇଁ ନୋବେଲ ଶାନ୍ତି ପୁରସ୍କାର ମିଳିଛି। ଏବେ ଟ୍ରମ୍ପଙ୍କ ପାଇଁ ଆସନ୍ତାବର୍ଷ ଅର୍ଥାତ ୨୦୨୬ ପାଇଁ ନୋବେଲ ଶାନ୍ତି ପୁରସ୍କାର ପାଇଁ ଦାବି କରାଯିବ ବୋଲି ଜଣାପଡିଛି। ହମାସ-ଇସ୍ରାଏଲ ଡିଲ୍ ପରେ ଟ୍ରମ୍ପ ଏବେ ଇସ୍ରାଏଲରେ ଅଛନ୍ତି। ଆଉ ଏହି ସମୟରେ ଇସ୍ରାଏଲୀ ନେତା ଆସନ୍ତା ବର୍ଷର ନୋବେଲ ଶାନ୍ତି ପୁରସ୍କାର ଟ୍ରମ୍ପଙ୍କୁ ଦେବା ପାଇଁ ସାରା ବିଶ୍ବରେ କ୍ୟାମ୍ପେନ କରି ଦାବି କରାଯିବ ବୋଲି କହିଛନ୍ତି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଅଭିଭାଷଣ ପୂର୍ବରୁ, ଇସ୍ରାଏଲୀ ସଂସଦ, ନେସେଟର ବାଚସ୍ପତି ଆମିର ଓହାନା କହିଥିଲେ," ରାଷ୍ଟ୍ରପତି ମହାଶୟ, ଶାନ୍ତି ପ୍ରୋତ୍ସାହନ ପାଇଁ ଆପଣଙ୍କ ପ୍ରୟାସ ପାଇଁ ଆପଣ ଅନ୍ୟ କାହାଠାରୁ ଅଧିକ ସର୍ବୋଚ୍ଚ ସମ୍ମାନ ପାଇବାକୁ ଯୋଗ୍ୟ। ଆମେ ଘୋଷଣା କରୁଛୁ ଯେ ଆମେ ବିଶ୍ୱର ବିଭିନ୍ନ ସ୍ଥାନରୁ ବକ୍ତା ଏବଂ ସଂସଦୀୟ ସଦସ୍ୟ ମାନଙ୍କୁ ଆସନ୍ତା ବର୍ଷ ନୋବେଲ ଶାନ୍ତି ପୁରସ୍କାର ପାଇଁ ଆପଣଙ୍କ ପ୍ରାର୍ଥୀପତ୍ର ଦାଖଲ କରିବାକୁ ଏକତ୍ର କରିବୁ..."
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋମବାର ଇସ୍ରାଏଲରେ ପହଞ୍ଚି ଇସ୍ରାଏଲ ଏବଂ ହମାସ ମଧ୍ୟରେ ଆମେରିକା ଦ୍ୱାରା ସ୍ୱାକ୍ଷରିତ ଯୁଦ୍ଧବିରତି ଏବଂ ବନ୍ଧକ ମୁକ୍ତ ଚୁକ୍ତିନାମାକୁ ସମର୍ଥନ ଜଣାଇବା ପାଇଁ ପହଞ୍ଚିଥିଲେ। ଟ୍ରମ୍ପ ଘୋଷଣା କରିଥିଲେ ଯେ ଏହି ଚୁକ୍ତିନାମା ପ୍ରଭାବଶାଳୀ ଭାବରେ ଯୁଦ୍ଧର ଅନ୍ତ କରିଛି ଏବଂ ପଶ୍ଚିମ ଏସିଆରେ ସ୍ଥାୟୀ ଶାନ୍ତିର ଦ୍ୱାର ଖୋଲିଛି। ଟ୍ରମ୍ପ ଏୟାର ଫୋର୍ସ ୱାନ (ଆମେରିକା ରାଷ୍ଟ୍ରପତିଙ୍କ ସରକାରୀ ବିମାନ)ରୁ ଓହ୍ଲାଇବା ମାତ୍ରେ, ଚୁକ୍ତିନାମା ଅନୁଯାୟୀ ହମାସ ଦ୍ୱାରା ମୁକ୍ତ ହୋଇଥିବା ପ୍ରଥମ ବନ୍ଧକ ମାନଙ୍କୁ ନେଇ ଯାନର ଏକ କାଫଲା ଇସ୍ରାଏଲରେ ପହଞ୍ଚିଥିଲା। ଇସ୍ରାଏଲୀ ରାଷ୍ଟ୍ରପତି ଆଇଜାକ୍ ହର୍ଜୋଗ ଏବଂ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଏକ ସାମରିକ ବ୍ୟାଣ୍ଡର ଶବ୍ଦ ମଧ୍ୟରେ ଟ୍ରମ୍ପଙ୍କୁ ସ୍ୱାଗତ କରିଥିଲେ। ଦୁଇ ବର୍ଷର ଯୁଦ୍ଧ ସମୟରେ ପ୍ରତିବାଦର କେନ୍ଦ୍ର ତେଲ ଅଭିଭର ହୋଷ୍ଟେଜ୍ ସ୍କୋୟାରରେ ଜନସମାଗମ ଟ୍ରମ୍ପଙ୍କୁ ସ୍ୱାଗତ କରି ସ୍ଲୋଗାନ ଦେଇଥିଲେ।
