ଧଉଳି,୧୮|୮(ଆପ୍ର): ଧଉଳି ଥାନା ଶିଶୁପାଳଗଡ଼ ତୈଳଭୋଇ ସାହିରେ ଗତ ୨ ଦିନ ତଳେ ମଦପିଇ  ଜଣେ ଯୁବକଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ହେଲେ ଚୋରା ମଦ ବ୍ୟବସାୟ ଥମିନଥିଲା l ଏହାକୁ ନେଇ ସୋମବାର ମଦ ବିକ୍ରୀକୁ ବିରୋଧ କରି ସମ୍ପୃକ୍ତ ଗ୍ରାମର ମୃତକଙ୍କ ପରିବାର ଓ ଶତାଧିକ ମହିଳା  କଟକ - ପୁରୀ ଜାତୀୟ ରାଜପଥ (ବାଇପାସ ) ରାସ୍ତାର ରେବତୀନଗର ଠାରେ ଟାୟାର ଜାଳି ରାସ୍ତାରୋକ କରିଛନ୍ତି l  ଫଳରେ ରାସ୍ତାର ଉଭୟ ପାର୍ଶ୍ଵରେ ଟଙ୍କପାଣି ଓ ଉତ୍ତରା ପର୍ଯ୍ୟନ୍ତ ଗାଡିମଟର ଲାଇନ ଲାଗିଥିବା ବେଳେ ଟ୍ରାଫିକ ସମସ୍ୟା ଦେଖାଦେଇଥିଲା l 

ଖବରପାଇ ଧଉଳି ଥାନା ଅଧିକାରୀ ପ୍ରଦୀପ୍ତ କୁମାର ନାୟକ, ସହକାରୀ ଆରକ୍ଷୀ ନିରୀକ୍ଷକ ପ୍ରବୀର ଲେଙ୍କା, ବିଭୁ ନାରାୟଣ ସାହୁ  ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ l ମାତ୍ର ମଦ ବିକ୍ରୀ ବନ୍ଦ ନ ହେଲେ ରାସ୍ତାରୁ ହଟିବେ ନାହିଁ ବୋଲି ରୋକଠୋକ କହିଥିଲେ l ପରେ ଜୋନ -୨ ଅତିରିକ୍ତ ପୁଲିସ ଅଯୁକ୍ତ(ଏସିପି)କୃଷ୍ଣ ଚନ୍ଦ୍ର ପଲାଇ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ସହ ମଦ ଦୋକାନ ବନ୍ଦ କରିବା ପାଇଁ ପ୍ରତିଶ୍ରୁତି ଦେବାପରେ ପରିସ୍ଥିତି ଶାନ୍ତ ପଡିଥିଲା l 

ପ୍ରାପ୍ତ ସୂଚନା ଅନୁଯାୟୀ ଶିଶୁପାଳଗଡ଼ ଅଞ୍ଚଳର ବିଭିନ୍ନ ସାହି ବା କଲୋନୀରେ ଥିବା କିଛି ଦୋକାନରେ ଚୋରା ମଦ କାରବାର  ହେଉଥିବା ନେଇ ସ୍ଥାନୀୟ ଲୋକେ ଅଭିଯୋଗ କରିଛନ୍ତି   l ସେହିପରି କିଛି ବ୍ୟବସାୟୀ ନିଜ ଗାଡ଼ିରେ ଧରି ଏହି ମାଦକ ଦ୍ରବ୍ୟ ବ୍ୟବସାୟ କରନ୍ତି l ଉକ୍ତ ଅଞ୍ଚଳରେ ବହୁଳ ମାତ୍ରାରେ ଏହି ବ୍ୟବସାୟ ଚାଲିଥିଲେ ମଧ୍ୟ ଅବକାରୀ ଓ ପୁଲିସ କୌଣସି କାର୍ଯ୍ୟାନୁଷ୍ଠାନ ନେଉନଥିବା ଅଭିଯୋଗ ହୋଇଛି l