ଢେଙ୍କାନାଳ,୨୩।୮: ଢେଙ୍କାନାଳ ଏସପି ଅଫିସ ପରିସରରେ ଶନିବାର ସନ୍ଧ୍ୟାରେ ଜଣେ ମହିଳା ପେଟ୍ରୋଲ ଢାଳି ଆତ୍ମହୁତି ଉଦ୍ୟମ କରିଛନ୍ତି । ପେଟ୍ରୋଲ ଢାଳି ହେଉଥିବା ଦେଖି ପୁଲିସ କର୍ମଚାରୀ ମହିଳାଙ୍କୁ କାବୁକରି ନେଇଛନ୍ତି । ପୁଲିସ ଅଭିଯୋଗ ନରଖି ହଇରାଣ କରୁଥିବା ମହିଳା ଅଭିଯୋଗ କରିଛନ୍ତି । ଏସପି ଅଭିନବ ସୋନଙ୍କର ମହିଳାଙ୍କ ସହ ଘଟଣା ସମ୍ପର୍କରେ ଆଲୋଚନା କରିଛନ୍ତି ।
ସୂଚନା ଅନୁସାରେ, ମହିଳା ଜଣକ କିଛି ମାସ ପୁର୍ବେ ଢେ଼ଙ୍କାନାଳ ସଦର ଥାନା ଅଙ୍କରାନ୍ତିପୁର ଗାଁର ଜଣଙ୍କୁ ପ୍ରେମ କରି ବିବାହ କରିଛନ୍ତି । ଶାଶୁଘର ଲୋକେ ପୁଅ ବୋହୂଙ୍କୁ ଘରେ ରଖେଇ ଦେଇ ନଥିଲେ । ମହିଳା ଓ ତାଙ୍କ ସ୍ବାମୀ ଅନୁଗୁଳରେ ଭଡାରେ ରହୁଛନ୍ତି । ଦୁଇ ଦିନ ତଳେ ସ୍ବାମୀଙ୍କ ଜଣେ ସମ୍ପର୍କୀୟ ଭାଇ ମହିଳାଙ୍କୁ ଫୋନ୍ କରି ଗାଳିଗୁଲଜ କରିଥିଲେ । ତାଙ୍କ ଶାଶୁଘର ଢେ଼ଙ୍କାନାଳ ସଦର ଥାନା ହୋଇଥିବାରୁ ମହିଳା ଶୁକ୍ରବାର ସଦର ଥାନାରେ ଅଭିଯୋଗ କରିଥିଲେ । ଗାଳିଗୁଲଜ କରିଥିବା ବ୍ୟକ୍ତିଙ୍କ ଘର ଟାଉନ ଥାନା ହୋଇଥିବାରୁ ଟାଉନ ଥାନାରେ ଅଭିଯୋଗ କରିବାକୁ କହି ସଦର ପୁଲିସ ଫେରାଇ ଦେଇଥିଲା । ଟାଉନ ଥାନାରେ ପହଞ୍ଚିବାରୁ ଟାଉନ ଥାନା ସଦର ଥାନାକୁ ପଠାଇଥିଲା । ଶେଷରେ ସଦର ଥାନା ଅଭିଯୋଗ ରଖିଥିଲା । ଶନିବାର ସକାଳେ ମହିଳା ସଦର ଥାନାରେ ପହଞ୍ଚିଥିଲେ । ସକାଳୁ ଅପରାହ୍ନ ୪ଟାଯାଏ ବସିବା ପରେ ସଦର ଥାନାର ଜଣେ ମହିଳା ଏସଆଇ ତାଙ୍କ ଅଭିଯୋଗ ବୁଝିପାରିବେ ନାହିଁ ବୋଲି କହି ପାଟି କରିଥିଲେ । ଶେଷରେ ମହିଳା ନିରାଶ ହୋଇ ସନ୍ଧ୍ୟା ସାଢେ ୬ଟା ବେଳକୁ ପ୍ଲାଷ୍ଟିକ ବୋତଲରେ ପେଟ୍ରୋଲ ଆଣି ଏସପି ଅଫିସ ପରିସରେ ଢାଳି ହୋଇ ଆତ୍ମହୃତି ଉଦ୍ୟମ କରିଥିଲେ । ସେଠାରେ ଉପସ୍ଥିତ ପୁଲିସ କର୍ମଚାରୀ ତାଙ୍କ କାବୁ କରିନେଇଥିଲେ । ଏସପି ଶ୍ରୀ ସୋନକର ମହିଳାଙ୍କୁ ବୁଝାସୁଝା କରିଛନ୍ତି । ମହିଳାଙ୍କ ଅଭିଯୋଗ ଓ ପୁଲିସ ଅବହେଳାକୁ ନେଇ ତଦନ୍ତ ହେବ । ସଦର ଏସଡିପିଓଙ୍କୁ ଦାୟିତ୍ବ ଦିଆଯାଇଥିବା ଏସପି କହିଛନ୍ତି ।
