ଖନ୍ତାପଡ଼ା,୧୭/୦୩: ପୋଖରୀରେ ବୁଡି ଚାଲିଗଲା ମହିଳାଙ୍କ ଜୀବନ । ଗାଧୋଇବାକୁ ଯିବା ବେଳେ ଗୋଡ ଖସି ଯିବାରୁ ପୋଖରୀରେ ବୁଡି ମହିଳାଙ୍କର ମୃତ୍ୟୁ ହୋଇଛି । ଖନ୍ତାପଡ଼ା ଥାନା ଅଧିନ ଦକ୍ଷିଣ ନରସିଂହପୁର ପଞ୍ଚାୟତ ବାଇଗଡିଆ ଅଞ୍ଚଳରେ ଏହି ଅଭାବନୀୟ ଘଟଣା ଘଟିଛି । ମୃତ ମହିଳା ଜଣକ ହେଲେ ବାଇଗଡିଆ ଅଞ୍ଚଳର ସୋନି ସିଂହ (୪୦) ।
ମିଳିଥିବା ସୂଚନା ଅନୁସାରେ, ନୀଳଗିରି ଖନ୍ତାପଡ଼ା ଥାନା ଅଧିନ ଦକ୍ଷିଣ ନରସିଂହପୁର ପଞ୍ଚାୟତ ବାଇଗଡ଼ିଆ ଅଞ୍ଚଳର ଟିପୁ ସିଂହଙ୍କ ଝିଅ ସୋନି ସିଂହ (୪୦) । ମଧ୍ୟାହ୍ନ ସମୟରେ ଘର ନିକଟରେ ଥିବା ପୋଖରୀକୁ ଗାଧୋଇବାକୁ ଯାଇଥିଲେ । କୌଣସି କାରଣରୁ ପାଣିରେ ପଡିଯାଇଥିଲେ। ସୋନିଙ୍କ ଘରକୁ ଫେରିବା ବିଳମ୍ବ ହେବାରୁ ପରିବାର ଲୋକେ ଖୋଜାଖୋଜି କରିଥିଲେ । ଦୀର୍ଘ ସମୟ ହେବ ସୋନିଙ୍କର କୌଣସି ପତ୍ତା ମିଳି ନଥିଲା ।
କିିଛି ସମୟ ପରେ ଘର ନିକଟ ପୋଖରୀରେ ସୋନି ପଡିଥିବାର ଦେଖିବାକୁ ପାଇଥିଲେ ଘରଲୋକ । ସଙ୍ଗେ ସଙ୍ଗେ ସୋନିଙ୍କୁ ଉଦ୍ଧାର କରି ଖନ୍ତାପଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ନିମନ୍ତେ ଆଣିଥିଲେ । ହେଲେ ସେତେବେଳେକୁ ସୋନିଙ୍କର ମୃତ୍ୟୁ ହୋଇ ସାରିଥିଲା । ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ଲେଖା ହେବା ବେଳକୁ ଘଟଣା ନେଇ ଥାନାରେ କୌଣସି ଅଭିଯୋଗ ହୋଇନଥିଲା ।
