ପାନାଜୀ: ଗୋଆରେ ପାରାଗ୍ଲାଇଡିଂ କରୁଥିବା ବେଳେ ଜଣେ ୨୭ ବର୍ଷୀୟା ମହିଳା ପର୍ଯ୍ୟଟକଙ୍କ ମୃତ୍ୟୁ ହୋଇଛି । ଏପରିକି ତାଙ୍କ ସହ ଥିବା ପ୍ରଶିକ୍ଷକ ଖାଲରେ ପଡ଼ି ପ୍ରାଣ ହରାଇଛନ୍ତି । ୨୬ ବର୍ଷୀୟ ପ୍ରଶିକ୍ଷକ ସୁମାଲ ନେପାଳୀ ହୋଇଥିବା ବେଳେ ସେ ନେପାଳର ବାସିନ୍ଦା । ଶନିବାର ସନ୍ଧ୍ୟାରେ କେରି ଗ୍ରାମରେ ଏହି ଦୁର୍ଘଟଣା ଘଟିଥିବା ପୋଲିସ ସୂଚନା ଦେଇଛି ।
ମହିଳା ଜଣଙ୍କ ପୁଣେର ବାସିନ୍ଦା ବୋଲି ଜଣାପଡ଼ିଛି । ପୋଲିସ ପକ୍ଷରୁ ମିଳିଥିବା ସୂଚନ ଅନୁସାରେ, ପୁଣେର ଶିବାନୀ ଡାବଲ ଏବଂ ତାଙ୍କ ପ୍ରଶିକ୍ଷକ ସୁମାଲ ନେପାଳୀ କେରି ମାଳଭୂମିରେ ସନ୍ଧ୍ୟା ପ୍ରାୟ ୫ଟା ବେଳେ ଏହି ଦୁର୍ଘଟଣାରେ ମୃତ୍ୟୁବରଣ କରିଛନ୍ତି । ସୂଚନା ଅନୁସାରେ, ଡାବଲ ଏକ ବେଆଇନ ଭାବେ ପରିଚାଳିତ ଦୁଃସାହସିକ କ୍ରୀଡ଼ା କମ୍ପାନୀ ପକ୍ଷରୁ ଏହି ପାରାଗ୍ଲାଇଡିଂ କରୁଥିଲେ ।
ପର୍ଯ୍ୟଟକ ଓ ପ୍ରଶିକ୍ଷକଙ୍କ ମୃତ୍ୟୁ ପରେ କମ୍ପାନୀ ମାଲିକଙ୍କ ବିରୋଧରେ ମାମଲା ରୁଜୁ ହୋଇଛି । ପଥରରୁ ଓହ୍ଲାଇବା ମାତ୍ରେ ପାରାଗ୍ଲାଇଡର୍ ଟି ଖାଲକୁ ଖସି ପଡ଼ିବାରୁ ଘଟଣାସ୍ଥଳରେ ଉଭୟଙ୍କ ମୃତ୍ୟୁ ଘଟିଛି । କମ୍ପାନୀ ମାଲିକ ଶେଖର ରାଇଜାଦାଙ୍କ ବିରୋଧରେ ମଣ୍ଡରେମ୍ ଥାନାରେ ଏକ ମାମଲା ରୁଜୁ ହୋଇଛି।
