ମୁମ୍ୱାଇ, ୧୧।୪: ଅଳିଆକୁ ମୂଲ୍ୟବାନ୍ ଜିନିଷରେ ପରିଣତ କରିବାରେ ସେ ବେଶ୍ ସିଦ୍ଧହସ୍ତ । ଅଳିଆ ତାଙ୍କ ପାଇଁ ହୀରାଖଣି କହିଲେ ଅତ୍ୟୁକ୍ତି ହେବ ନାହିଁ । ସେ ହେଉଛନ୍ତି 'ଗ୍ରୀନ୍ ପ୍ରାକ୍ଟିସେସ୍'ର ପ୍ରତିଷ୍ଠାତା ମାନା ଶାହା । ମୁମ୍ବାଇର ବିଭିନ୍ନ ପରିବାର ଓ କର୍ପୋରେସନ୍ଗୁଡ଼ିକରୁ ପ୍ରତି ମାସରେ ୫୦୦ ଟନ୍ର ଅଳିଆ ନେଇ କମ୍ପୋଷ୍ଟରେ ପରିଣତ କରୁଛନ୍ତି ମାନା । ସବୁଠାରୁ ବଡ଼ କଥା ହେଲା ସେ ଅଳିଆ ସଂଗ୍ରହ କରୁଥିବା ଘର ଓ କର୍ପୋରେଟ୍ ଅଫିସକୁ ପ୍ରତି ବଦଳରେ ମାଗଣାରେ ସାର ପ୍ରଦାନ କରୁଛନ୍ତି । ମଧ୍ୟରାତ୍ରୀରେ ମୁମ୍ବାଇର ରାସ୍ତାଗୁଡ଼ିକ ଶାନ୍ତ ଥିବା ସମୟରେ ତାଙ୍କର ଏକ ଟିମ୍ ନିର୍ମଳା ହାଇଟ୍ସର ୯୬ ଫ୍ଲାଟ୍ରୁ ଅଳିଆ ସଂଗ୍ରହ କରିଥାନ୍ତି । ପୂର୍ବରୁ ଫ୍ଲାଟ୍ ବାସିନ୍ଦାଙ୍କ ଅନିଛା ସତ୍ତ୍ୱେ ଅଳିଆ ସଂଗ୍ରହ କରିବାକୁ ପଡ଼ୁଥିଲା । ମାତ୍ର ଏବେ ଏହି କମିଟିର ସ୍ଥାୟୀ ଅଳିଆ ପରିଚାଳନା ପ୍ରତି ଥିବା ପ୍ରତିବଦ୍ଧତା ପାଇଁ ପୁରସ୍କାର ମଧ୍ୟ ମିଳୁଛି । ତେଣୁ ଲୋକମାନେ ଆଗ୍ରହ ସହକାରେ ସହଯୋଗର ହାତ ବଢ଼ାଉଛନ୍ତି ।
‘ଗ୍ରୀନ୍ ପ୍ରାକ୍ଟିସେସ୍’ନାମକ ଏକ ସ୍ଥାନୀୟ ଆବର୍ଜନା ପରିଚାଳନ ସଂସ୍ଥା ସମାଜରୁ କେବଳ ଅଳିଆ ହଟାଇବା କାମ କରୁନାହିଁ, ବରଂ ପୁଷ୍ଟିକର ସାର ମଧ୍ୟ ପ୍ରତିବଦଳରେ ପ୍ରଦାନ କରୁଛି । ଫଳରେ ଏହି କମ୍ପୋଷ୍ଟକୁ ନେଇ ସେମାନେ ନିଜ ବଗିଚାରେ ବ୍ୟବହାର କରିବା ଦ୍ୱାରା ଅତିରିକ୍ତ ଖର୍ଚ୍ଚ ବିନା ମଧ୍ୟ ସବୁଜିମା ପାଇଁ ପୂର୍ଣ୍ଣ ପ୍ରୟାସ କରିପାରୁଛନ୍ତି । ଏହି ସଂସ୍ଥା ୨୦୧୯ରେ ବର୍ଜ୍ୟବସ୍ତୁ ପରିଚାଳନା ପାଇଁ ପଦକ୍ଷେପ ଆରମ୍ଭ କରିଥିଲା । କିନ୍ତୁ, ସେତେବେଳେ ବର୍ଜ୍ୟବସ୍ତୁ ପରିଚାଳନା କରିବା ଏକ ବଡ଼ ଚ୍ୟାଲେଞ୍ଜ କିନ୍ତୁ ଏବେ କମ୍ପାନୀ ସହ ମିଶି ଆମେ ପ୍ରକ୍ରିୟାକୁ ସୁଗମ କରାଇପାରିଛୁ ବୋଲି କହନ୍ତି ସଂସ୍ଥା ମୁଖ୍ୟ । ପୌରପାଳିକାର ନିୟମ ଅନୁଯାୟୀ, ଦିନରେ ଯାତାୟତ ସମସ୍ୟାକୁ ଏଡ଼ାଇବା ପାଇଁ ମଧ୍ୟରାତ୍ରୀରେ ଅଳିଆ ସଂଗ୍ରହ କରାଯାଉଛି । ସ୍ଥାନୀୟ ବାସିନ୍ଦାଙ୍କର ଏହି ଅଭ୍ୟାସ ପୌରପାଳିକାର କାମକୁ କମ୍ କରେ ନାହିଁ ବରଂ ସେମାନଙ୍କ ଦାୟିତ୍ୱ ଓ ସହଯୋଗର ଭାବନାକୁ ପ୍ରୋତ୍ସାହିତ କରେ ।
ଏହି ପଦକ୍ଷେପ ପଛରେ ଥିବା ମାନା ଶାହାଙ୍କ ଜନ୍ମ ମୁମ୍ବାଇରେ । ନିଜ ପାରିବାରିକ ବ୍ୟବସାୟ ପେଟ୍ରୋଲ ପମ୍ପ ପରିଚାଳନ କରୁଥିଲେ । ପରେ ବାପାଙ୍କ ମାର୍ଗଦର୍ଶନରେ ସେ କାରାଖାନା ପରିଚାଳନ ଆରମ୍ଭ କରନ୍ତି । କ୍ରମଶଃ ଯନ୍ତ୍ରପାତିର ଶବ୍ଦ ତାଙ୍କୁ ବେଶି ଉତ୍ସାହିତ କରିଥିଲା । ପରେ ସେ ୨୦୧୦ରେ ନିଜସ୍ୱ ଉଦ୍ୟୋଗ ସବୁଜ ଅଭ୍ୟାସ ପ୍ରତିଷ୍ଠା କଲେ । ପ୍ରଭାବଶାଳୀ ପୁନଃଚକ୍ରୀକରଣ ଏବଂ କମ୍ପୋଷ୍ଟ ପାଇଁ ଉତ୍ସରେ ପୃଥକୀକରଣକୁ ମାନା ଗୁରୁତ୍ୱ ଦେଇଚାଲିଲେ । ତାଙ୍କ କମ୍ପାନୀ ଲ୍ୟାଣ୍ଡ୍ଫିଲ୍ସରୁ ଟନ୍ ଟନ୍ ଅଳିଆ ପୁନଃଚକ୍ରଣ କେନ୍ଦ୍ରକୁ ସ୍ଥାନାନ୍ତରଣ କରିଥାଏ । ୫୦ଟି ସୋସାଇଟି, ରିଲାଏନ୍ସ ଓ ସ୍ୱିଗି ପରି କର୍ପୋରେଟ୍ କମ୍ପାନୀରୁ ସଂଗ୍ରହ କରନ୍ତି ଅଳିଆ । ଫାର୍ମ ପ୍ରତି ମାସରେ ୫୦୦ ଟନ୍ ପର୍ଯ୍ୟନ୍ତ ବର୍ଜ୍ୟବସ୍ତୁ ପରିଚାଳନା କରିଚାଲିଛି ।
