ମାଲକାନଗିରି/କୋରକୁଣ୍ଡା, ୧୨/୩(ଆପ୍ର ମାଲକାନଗିରି ଜିଲ୍ଲା ଓର୍କେଲ ଥାନା ଅନ୍ତର୍ଗତ ପିଲାକୁସୁମି ଗ୍ରାମର ଜନୈକ ଯୁବତୀଙ୍କ ଶବ ଏକ ପୋଖରୀ ନିକଟରୁ ଉଦ୍ଧାର ହୋଇଛି। ଯୁବତୀ ଜଣକ ହେଲେ ପିଲାକୁସୁମୀ ଗ୍ରାମର ଡାଳିମା ପୂଜାରୀ। ତେବେ ଯୁବତୀଙ୍କୁ ହତ୍ୟା କରାଯାଇଥିବା ନେଇ ପରିବାର ଲୋକ କୁଡୁମୁଲୁଗୁମା ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ତଦନ୍ତ ଆରମ୍ଭ କରିଛି |
ପିଲାକୁସୁମୀ ଗ୍ରାମର ଘେନୁ ପୂଜାରୀଙ୍କ ଝିଅ ଡାଳିମା ପୂଜାରୀ(୨୫) ନିଜ ସାଙ୍ଗସାଥୀଙ୍କ ସହିତ ୧ବର୍ଷ ହେବ ଆନ୍ଧ୍ର ପ୍ରଦେଶର ଚିଙ୍ଗୁଡ଼ି କାରଖାନାକୁ କାମ କରିବାକୁ ଯାଇଥିଲେ। ଗତ କିଛିଦିନ ତଳେ ଡାଳିମା ଗାଁ କୁ ଫେରିଥିଲେ। ଗତ ସୋମବାର ଦିନ ଗ୍ରାମର ଏକ ପୋଖରୀ ନିକଟରେ ର ଜଣେ ଯୁବତୀଙ୍କ ଶବ ପଡ଼ିଥିବା କିଛି ଲୋକ ଦେଖି ସରପଞ୍ଚ ଓ ଥାନାକୁ ଜଣାଇଥିଲେ। ମୃତ ଜଣଙ୍କ ତାଳିମା ପୂଜାରୀ ବୋଲି ଜଣାପଡିବା ପରେ ପରିବାର ଲୋକଙ୍କୁ ଖବର ଦିଆଯାଇଥିଲା। ପରିବାର ଲୋକ ପହଞ୍ଚି ଶବ ଚିହ୍ନଟ କରିଥିଲେ । ଡାଳିମାଙ୍କୁ ହତ୍ୟା କରି ପୋଖରୀରେ ଫୋପାଡ଼ି ଦିଆଯାଇଥିବା ନେଇ ପରିବାର ଲୋକେ ଅଭିଯୋଗ କରି ଥାନା ରେ ଏତଲା ଦେଇଛନ୍ତି। କୁଡୁମୁଲୁଗୁମା ଥାନା ପୁଲିସ ମୃତ ଶରୀର ଜବତ କରି ଶବ ବ୍ୟବଚ୍ଛେଦ ପରେ ତାଙ୍କ ପରିବାର ଙ୍କୁ ହସ୍ତା ନ୍ତର କରି ଘଟଣା ସମ୍ପର୍କରେ ତଦନ୍ତ ଚଲାଇଛନ୍ତି।
