ରାଜଗିର, ୧୩/୧୧ : ମହିଳା ଏସିଆନ୍ ଚାମ୍ପିଅନ୍ସ ଟ୍ରଫି ହକିରେ ଭାରତ ଉନ୍ନତ ପ୍ରଦର୍ଶନ ଜାରି ରଖି କ୍ରମାନ୍ୱୟରେ ଦ୍ୱିତୀୟ ବିଜୟ ହାସଲ କରିଛି । ଦଳ ୩-୨ ଗୋଲରେ ଦକ୍ଷିଣ କୋରିଆକୁ ପରାଜିତ କରିଥିଲା । ଦୀପିକା ଶେରାୱତ ଡବଲ ଗୋଲ୍ ଦେଇ ଦଳ ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ । ଅନ୍ୟ ମ୍ୟାଚ୍ ଦୁଇଟିରେ ଥାଇଲାଣ୍ଡ ୧-୧ ଗୋଲରେ ଜାପାନ ସହ ଡ୍ର’ ରଖିଥିବାବେଳେ ଚୀନ ୫-୦ ଗୋଲରେ ମାଲେସିଆକୁ ପରାସ୍ତ କରିଥିଲା ।
ପ୍ରଥମ ମ୍ୟାଚ୍ରେ ଭାରତ ୪-୦ରେ ମାଲେସିଆକୁ ହରାଇଥିଲା । ଗତକାଲି କୋରିଆ ବିପକ୍ଷରେ କିନ୍ତୁ ଦଳକୁ ସଂଘର୍ଷ କରିବା ପାଇଁ ପଡ଼ିଥିଲା । ତୃତୀୟ ମିନିଟରେ ସଙ୍ଗୀତା କୁମାରୀ ଦଳର ଗୋଲ ଖାତା ଖୋଲିଥିଲେ । ପରେ ୨୦ ମିନିଟରେ ଦୀପିକା ଦ୍ୱିତୀୟ ଗୋଲ୍ ସ୍କୋର କରିଥିଲେ । ତୃତୀୟ କ୍ୱାର୍ଟରରେ କୋରିଆ ପ୍ରତ୍ୟାବର୍ତ୍ତନ କରି ୩୪ ଓ ୩୮ ମିନିଟରେ ୨ଟି ଗୋଲ୍ ସ୍କୋର କରିବା ସହ ୨-୨ ଗୋଲରେ ସ୍ଥିତି ବରାବର କରିଥିଲା । ପରବର୍ତ୍ତୀ ସମୟ ଖେଳ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ହୋଇଥିଲା । ୫୭ ମିନିଟରେ ଘରୋଇ ଦଳକୁ ମିଳିଥିଲା ପେନାଲ୍ଟି ଷ୍ଟ୍ରୋକ୍ । ଦୀକିପା ଏହାକୁ ଗୋଲରେ ରୂପାନ୍ତରିତ କରି ଦଳକୁ ବିଜୟୀ କରିଥିଲେ । ଆସନ୍ତା ୧୪ ତାରିଖରେ ଭାରତ ତୃତୀୟ ମ୍ୟାଚ୍ ଥାଇଲାଣ୍ଡ ସହ ଖେଳିବ ।
