ଭୁବନେଶ୍ୱର/ରାଉରକେଲା,୨୦/୦୧: ମହିଳା ହକି ଇଣ୍ଡିଆ ଲିଗ୍ (ଏଚ୍ଆଇଏଲ୍)ରେ ରବିବାର ଓଡ଼ିଶା ୱାରିୟର୍ସ ଜବରଦସ୍ତ ବିଜୟ ସହ ପଏଣ୍ଟ ତାଲିକାରେ ଶୀର୍ଷ ସ୍ଥାନ ଦଖଲ କରିଛି । ବିର୍ସା ମୁଣ୍ଡା ହକି ଷ୍ଟାଡିୟମରେ ଅନୁଷ୍ଠିତ ମ୍ୟାଚ୍ରେ ଦଳ ୪-୧ ଗୋଲ୍ରେ ଶ୍ରାଚୀ ରାହ ବେଙ୍ଗଲ ଟାଇଗର୍ସକୁ ପରାସ୍ତ କରିଥିଲା । ଓଡ଼ିଶା ପକ୍ଷରୁ ୟିପି ଜାନସେନ ଡବଲ୍ ଗୋଲ୍ କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ । ସେ ୧୮ ଓ ୪୭ମିନିଟ୍ରେ ୨ଟି ଗୋଲ୍ କରିଥିବାବେଳେ ୧୬ମିନିଟ୍ରେ ମିଚେଲ ଫିଲେଟ ଓ ୫୮ମିନିଟ୍ରେ ନେହା ଗୋୟଲ ଗୋଲ୍ ଦେଇଥିଲେ । ବେଙ୍ଗଲ ଟାଇଗର୍ସ ପକ୍ଷରୁ ୩୦ମିନିଟ୍ରେ ଉଦିତା ଗୋଟିଏ ଗୋଲ୍ ପରିଶୋଧ କରିଥିଲେ । ଓଡ଼ିଶା ୪ଟି ମ୍ୟାଚ୍ ଖେଳି ୩ ବିଜୟ, ୧ ପରାଜୟ ସହ ମୋଟ ୮ ପଏଣ୍ଟ ପାଇଛି ।
ସୁଟ୍ ଆଉଟ୍ରେ ଜିତିଲା କଳିଙ୍ଗ ଲାନସର୍ସ
ପୁରୁଷ ଏଚ୍ଆଇଏଲ୍ରେ ଆଜି ବେଦାନ୍ତ କଳିଙ୍ଗ ଲାନସର୍ସ ସୁଟ୍ ଆଉଟ୍ରେ ଦିଲ୍ଲୀ ଏସ୍ଜି ପିପର୍ସକୁ ୫-୫ (୩-୨) ଗୋଲ୍ରେ ପରାସ୍ତ କରିଥିଲା । ମ୍ୟାଚ୍ କଡ଼ା ସଂଘର୍ଷପୂର୍ଣ୍ଣ ହୋଇଥିଲା । ତୃତୀୟ କ୍ୱାର୍ଟର ଶେଷ ସୁଦ୍ଧା ଦିଲ୍ଲୀ ୫-୨ରେ ଆଗୁଆ ରହିଥିଲା । ମାତ୍ର ଅନ୍ତିମ କ୍ୱାର୍ଟରରେ କଳିଙ୍ଗ ଲାନସର୍ସ ଅବିଶ୍ୱସନୀୟ ଖେଳ ପ୍ରଦର୍ଶନ କରି ୩ଟି ଗୋଲ୍ କରିବା ସହ ମ୍ୟାଚ୍କୁ ୫-୫ରେ ବରାବର କରିଥିଲା । କଳିଙ୍ଗ ପକ୍ଷରୁ ୧୩ ଓ ୫୨ମିନିଟ୍ରେ ଆଲେଜାଣ୍ଡର ହେଣ୍ଡ୍ରିକ୍ସ, ୩୫ ଓ ୪୭ମିନିଟ୍ରେ ଥିଏରୀ ବ୍ରିଙ୍କମାନ ଓ ୪୯ମିନିଟ୍ରେ ଅଙ୍ଗଦ ବୀର ସିଂହ ଗୋଲ୍ କରିଥିଲେ ।
ସେହିପରି ଦିଲ୍ଲୀ ପକ୍ଷରୁ ୧୮ ଓ ୨୦ମିନିଟ୍ରେ ଥୋମାସ ଡୋମେନ, ୨୧ମିନିଟ୍ରେ କୋରେ ୱେୟର, ୨୩ମିନିଟ୍ରେ କୋଜି ୟାମାସାକି ଓ ୩୭ମିନିଟ୍ରେ ଦିଲରାଜ ସିଂହ ଗୋଲ୍ ଦେଇଥିଲେ । ମ୍ୟାଚ୍ ଅମୀମାସିଂତ ରହିବା ପରେ ସୁଟ୍ ଆଉଟର ସହାୟତା ନିଆଯାଇଥିଲା । କଳିଙ୍ଗ ୩-୨ ଗୋଲ୍ରେ ରୋମାଞ୍ଚକର ବିଜୟ ହାସଲ କରିଥିଲା ।
