ଭୁବନେଶ୍ୱର, ୧୮/୦୮: ଆନ୍ଦୋଳନର ଡାକରା ଦେଲା ନିଖିଳ ଓଡ଼ିଶା ଆଶାକର୍ମୀ ସଂଘ । ଆସନ୍ତା ସେପ୍ଟେମ୍ବର ୪ରେ ମହାସମାବେଶରେ ସମସ୍ତ ଆଶାକର୍ମୀ ଯୋଗଦେବା ପାଇଁ ଆହ୍ୱାନ ଦେଇଛି । ଆଶାକର୍ମୀଙ୍କ ଭତ୍ତା ବୃଦ୍ଧି, ୱାର୍କର ମାନ୍ୟତା ଏବଂ ଅନ୍ୟାନ୍ୟ ଦାବି ନେଇ ଆନ୍ଦୋଳନ କରାଯିବ ବୋଲି ରବିବାର ସଂଘ ପକ୍ଷରୁ ସୂଚନା ଦିଆଯାଇଛି । ସ୍ଥାନୀୟ ଏଆଇଟିୟୁସି କାର୍ଯ୍ୟାଳୟରେ ଅନୁଷ୍ଠିତ ସଭାରେ ଏଆଇଟିୟୁସି ସହବନ୍ଧିତ ଏହି ସଂଘ ତରଫରୁ ବ୍ୟାପକ ଆନ୍ଦୋଳନ ପାଇଁ ସଂଘ ଉପସଭାପତି ପଞ୍ଚାନନ ମହାକୁଡ଼ ଆହ୍ୱାନ କରିଥିଲେ । ଏଆଇଟିୟୁସି ରାଜ୍ୟ ସାଧାରଣ ସମ୍ପାଦକ ବିଜୟ ଜେନା ଦାବି ସଂପର୍କରେ ଆଲୋକପାତ କରିଥିଲେ ।
ସେ କହିଥିଲେ, ନୂଆ ସରକାର ଆସିବାଠାରୁ ଦୀର୍ଘ ୧ ବର୍ଷ ହେଲା ଭତ୍ତା ଠିକ୍ ସମୟରେ ମିଳୁନାହିଁ । ପ୍ରତିମାସ ଧାର୍ଯ୍ୟ ଭତ୍ତା ତିନି କିସ୍ତିରେ ମିଳୁଛି । ସ୍ୱାସ୍ଥ୍ୟକାର୍ଡ ଯୋଜନାରେ କାର୍ଡ ବଣ୍ଟନର ଦାୟିତ୍ୱ ଆଶାକର୍ମୀଙ୍କୁ ଦିଆଯାଇଥିବା ବେଳେ ବହୁ ପରିବାରର ଅନେକ ବ୍ୟକ୍ତି କାର୍ଡ ପାଇନଥିବାରୁ ଆଶାକର୍ମୀଙ୍କୁ ଦୁର୍ବ୍ୟବହାର କରିବା ସହିତ ମାର୍ପିଟ୍ କରାଯାଉଛି । ତେଣୁ ଆଶାକର୍ମୀଙ୍କ ଭତ୍ତା ବୃଦ୍ଧି, ଜାତୀୟ ଶ୍ରମ ସମ୍ମିଳନୀ ଅନୁସାରେ ୱାର୍କର ମାନ୍ୟତା, ଚାକିରି ବୟସ ସୀମା ୬୨ରୁ ୬୫ବର୍ଷକୁ ବୃଦ୍ଧି, ଅବସରକାଳୀନ ପ୍ରାପ୍ୟ ଏକ ଲକ୍ଷରୁ ପାଞ୍ଚ ଲକ୍ଷକୁ ବୃଦ୍ଧି, କେନ୍ଦ୍ର ସରକାରଙ୍କ ସୁପାରିସ ଅନୁସାରେ ବସ୍ ଓ ଟ୍ରେନ୍ ପାସ୍, ନର୍ସିଂ ତାଲିମ ଓ ଏଏନ୍ଏମ୍ ନିଯୁକ୍ତି ପାଇଁ କୋଟା ଧାର୍ଯ୍ୟ ତଥା ଅନ୍ୟାନ୍ୟ ଦାବିରେ ଏହି ବ୍ୟାପକ ଆନ୍ଦୋଳନ ପାଇଁ ପ୍ରସ୍ତୁତ ହେଉଛି ସଂଘ । ଏହି ବୈଠକରେ ସାଧାରଣ ସମ୍ପାଦିକା ନମିତା ସାହୁ ପ୍ରାରମ୍ଭିକ ସୂଚନା ଦେବା ପରେ ଏଆଇଟିୟୁସି ରାଜ୍ୟ କାର୍ଯ୍ୟକାରୀ କମିଟି ସଭ୍ୟ ସୁର ଜେନା, ଆଶା କର୍ମୀ ସଂଘ ନେତ୍ରୀ ବାସନ୍ତୀ ପ୍ରଧାନ, ମଞ୍ଜୁଲତା ଭୋଇ, ସୁରେଖା ନାଗ, ସନ୍ତୋଷିନୀ ପଟ୍ଟନାୟକ ଓ ମମତା ରାଉତ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ ।
