ଭୁବନେଶ୍ୱର,୨୪/୧୧: ଆଣ୍ଟିବାୟୋଟିକ୍ର ଅଧିକ ସେବନ କ୍ଷତିକାରକ । ଶିକ୍ଷା ଓ ଅନୁସନ୍ଧାନ (ସୋଆ) ଦ୍ୱାରା ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ ଫୁଲନଖରା କ୍ୟାମ୍ପସ୍ରେ ମାଇକ୍ରୋବାୟୋଲୋଜି ବିଭାଗ ପକ୍ଷରୁ ବିଶ୍ୱ ଏଏମ୍ଆର୍ (ଆଣ୍ଟି ମାଇକ୍ରୋବାଇଆଲ୍ ରେଜିଷ୍ଟାନ୍ସ) ସଚେତନତା ସପ୍ତାହ ପାଳନ କରାଯାଇଛି । କାର୍ଯ୍ୟକ୍ରମରେ ଯୋଗଦେଇ ବିଶେଷଜ୍ଞମାନେ ଏହି ମତ ପ୍ରକାଶ କରିଛନ୍ତି ।
ଚଳିତ ବର୍ଷର ବିଷୟବସ୍ତୁ "ଏଜୁକେଟ୍, ଆଡଭୋକେଟ୍ ଆଣ୍ଡ ଆକ୍ଟ ନାଓ’ରହିଛି । ସୋଆ ଉପକୁଳପତି ପ୍ରଫେସର ଡା. ପ୍ରସେନଜିତ୍ ମହାନ୍ତି ମୁଖ୍ୟ ଅତିଥି ଭାବେ ଯୋଗ ଦେଇ କହିଥିଲେ, ଆଣ୍ଟିବାୟୋଟିକ୍ ସେବନ କରିବା ଯେତିକି ଭଲ ସେତିକି ମନ୍ଦ । ସମ୍ମାନିତ ଅତିଥି ହସ୍ପିଟାଲ୍ର ଡିନ୍ ପ୍ରଫେସର ଡା. ଅରକ୍ଷିତ ସ୍ୱାଇଁ କହିଥିଲେ ଯେ, ନଭେମ୍ବର ୧୮ରୁ ୨୪ ତାରିଖ ପର୍ଯ୍ୟନ୍ତ ବିଶ୍ୱ ଏଏମ୍ଆର୍ ସଚେତନତା ସପ୍ତାହ ପାଳନ କରାଯାଇଥାଏ ।
ଏହି ସପ୍ତାହ ପାଳନର ମୁଖ୍ୟ ଉଦ୍ଦେଶ୍ୟ ହେଉଛି ଆଣ୍ଟିବାୟୋଟିକ୍ ସେବନର କ୍ଷତିକୁ ନେଇ ସଚେତନତା କରିବା । ସମସ୍ତ ହସ୍ପିଟାଲର ଆଣ୍ଟିବାୟୋଟିକ୍ ନୀତି ରହିବା ଜରୁରି ବୋଲି ପ୍ରଫେସର ସ୍ୱାଇଁ କହିଥିଲେ । ସମ୍ମାନିତ ଅତିଥି ସମ୍ ଅଲ୍ଟିମେଟ୍ ମେଡିକେୟାର ମାଇକ୍ରୋବାୟୋଲୋଜି ବିଭାଗ ମୁଖ୍ୟ ଓ ସିନିୟର୍ କନ୍ସଲ୍ଟାଣ୍ଟ ଡାକ୍ତର ପୂରବୀ ବରାଳ ଆଣ୍ଟିବାୟୋଟିକ୍ ବ୍ୟବହାର ବିଷୟରେ ବିସ୍ତୃତ ତଥ୍ୟ ରଖିଥିଲେ । ଏହି କାର୍ଯ୍ୟକ୍ରମରେ ରଙ୍ଗୋଲି, ପୋଷ୍ଟର ଓ ରିଲ୍ସ ପ୍ରତିଯୋଗିତାର କୃତୀ ପ୍ରତିଯୋଗୀଙ୍କୁ ପୁରସ୍କାର ପ୍ରଦାନ କରାଯାଇଥିଲା । ମାଇକ୍ରୋବାୟୋଲୋଜି ବିଭାଗ ମୁଖ୍ୟ ଓ ଲ୍ୟାବ୍ ନିର୍ଦ୍ଦେଶକ ପ୍ରଫେସର ଡା. ଦେବାଶିଷ ସାହୁ ସ୍ୱାଗତ ଭାଷଣ ଦେଇଥିଲେ । ମାଇକ୍ରୋବାୟୋଲୋଜି ବିଭାଗର ଆସିଷ୍ଟାଣ୍ଟ ପ୍ରଫେସର କ୍ରିତିକା ପଣ୍ଡା ଧନ୍ୟବାଦ ଅର୍ପଣ କରିଥିଲେ ।
