ଭୁବନେଶ୍ୱର,୧୪/୦୬(ଅମନ ଆୟୁଷ୍ମାନ୍ ଦାସ): ବୟସ ୬୭ । ଏ ବୟସରେ ବି ଅନ୍ୟର ଜୀବନ ବଞ୍ଚାଇବାକୁ ନିଜ ଶରୀରରୁ ରକ୍ତ ନିଗାଡ଼ୁଛନ୍ତି । ଯେତିକି ବୟସ, ତାର ଦୁଇଗୁଣ ସଂଖ୍ୟକ ରକ୍ତଦାନ କରିସାରିଲେଣି । ଗତ ୫୨ବର୍ଷ ମଧ୍ୟରେ ୧୭୫ଥର ରକ୍ତ ଦେଇସାରିଲେଣି । ଖାଲି ସିଏ ନୁହନ୍ତି, ଅନ୍ୟର ଜୀବନ ବଞ୍ଚାଇବାକୁ ତାଙ୍କ ପତ୍ନୀ ବି ପଛରେ ପଡ଼ିନାହାନ୍ତି । ୫୭ବର୍ଷ ବୟସରେ ସେ ବି ୨୫ଥର ରକ୍ତ ଦେଲୋଣି । ଇତିହାସ ସୃଷ୍ଟି କରିଥିବା ଏହି ରକ୍ତଦାତା ଦମ୍ପତିଙ୍କୁ ଅଜସ୍ର ପ୍ରଶଂସାପତ୍ର ମିଳିଛି । ଏମାନେ ହେଲେ ଗୋପୀମୋହନ ପଟ୍ଟନାୟକ ଓ ଆଶାଲତା ପଟ୍ଟନାୟକ ।
ପାରଳାଖେମୁଣ୍ଡିର ମୂଳବାସିନ୍ଦା ଶ୍ରୀ ପଟ୍ଟନାୟକ ଏବେ ଭୁବନେଶ୍ୱର ଡୁମଡୁମାର ସ୍ଥାୟୀ ବାସିନ୍ଦା । ସେ ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ(ଓୟୁଏଟି)ର ଜଣେ ଅବସରପ୍ରାପ୍ତ ଖେଳ(ଶାରୀରିକ) ଅଧିକାରୀ । ଏଥିସହ ହଷ୍ଟେଲର ଆଶିଷ୍ଟାଣ୍ଟ୍ ସୁପରିନଟେଣ୍ଡେଣ୍ଟ୍ ମଧ୍ୟ ଥିଲେ । ଗୋଟିଏ ଦୁର୍ଘଟଣା ପାଇଁ ସେ ରକ୍ତଦାତା ବନିଥିଲେ । ଶ୍ରୀ ପଟ୍ଟନାୟକ କୁହନ୍ତି, ୧୯୭୩-୭୪ ମସିହାରେ ସେ ୟୁନିଟ-୯ରେ ସେତେବେଳେ ଥିବା ରାଜ୍ୟ ନିୟୋଜନ କାର୍ଯ୍ୟାଳୟରୁ ଫେରୁଥିଲେ । ସେହି ସମୟରେ ଲୋକଭବନ(ରାଜଭବନ) ଛକରେ ଏକ ଦୁର୍ଘଟଣାରେ ଜଣେ ବ୍ୟକ୍ତି ଗୁରୁତର ହୋଇଥିଲେ । ଶ୍ରୀ ପଟ୍ଟନାୟକ ଓ ତାଙ୍କ ସହ ଅନ୍ୟ ସହଯୋଗୀମାନେ ଏକ ଠେଲାଗାଡିରେ ଗୁରୁତର ବ୍ୟକ୍ତିଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ଯାଇଥିଲେ । ସେ ସମୟରେ ହସ୍ପିଟାଲରେ ନିଜସ୍ୱ ରକ୍ତଭଣ୍ଡାର ନଥିଲା । ଜରୁରୀକାଳୀନ ୱାର୍ଡରେ ହିଁ ରୋଗୀଙ୍କୁ ରକ୍ତ ଦିଆଯାଉଥିଲା । ଜଣେ ସ୍ୱାସ୍ଥ୍ୟକର୍ମୀଙ୍କ ପରାମର୍ଶରେ ଶ୍ରୀ ପଟ୍ଟନାୟକ ରକ୍ତ ଦେଇଥିଲେ । ସେ ରକ୍ତ ଦେବାରୁ ସଂପୃକ୍ତ ବ୍ୟକ୍ତି ସୁସ୍ଥ ହୋଇଥିଲେ । ସେହିଦିନଠୁ ଶ୍ରୀ ପଟ୍ଟନାୟକ ରକ୍ତ ଦେଇଆସୁଛନ୍ତି ।
ଅଧିକ ପଢ଼ନ୍ତୁ :- Surya Pranam: କୋଣାର୍କରେ ୧୦୮ ‘ସୂର୍ଯ୍ୟ ପ୍ରଣାମ’ ଅଭ୍ୟାସ; କାର୍ଯ୍ୟକ୍ରମକୁ ଉଦଘାଟନ କଲେ ରାଜ୍ୟପାଳ
ତାଙ୍କୁ ଡାକରା ପଡ଼ିଲେ, ସାଇକଲରେ ଶ୍ରୀ ପଟ୍ଟନାୟକ କ୍ୟାପିଟାଲ ହସ୍ପିଟାଲ ଯାଇ ରୋଗୀଙ୍କୁ ରକ୍ତ ସହ ପ୍ଲେଟଲେଟ୍ ମଧ୍ୟ ଦିଅନ୍ତି । ୨୦୧୭ରେ ସେ ଓୟୁଏଟିରୁ ଅବସର ନେଇଥିଲେ । ବିବାହ ପରେ ପ୍ରଥମେ ସ୍ତ୍ରୀ ଆଶାଲତା ତାଙ୍କୁ ରକ୍ତ ଦେବାକୁ ମନା କରୁଥିଲେ, ହେଲେ ଏବେ ସ୍ତ୍ରୀ ମଧ୍ୟ ରକ୍ତ ଦେଉଛନ୍ତି ।
ନିୟମ କହୁଛି, ୬୫ବର୍ଷ ପରେ ଆଉ ରକ୍ତ ଦେବା ଅନୁଚିତ । ହେଲେ ଶ୍ରୀ ପଟ୍ଟନାୟକ ଏହାର ବ୍ୟତିକ୍ରମ । ୬୭ବର୍ଷ ବୟସରେ ସେ ରକ୍ତ ଦେବାକୁ ଆଗଭର । ଫୋନ୍ ଆସିଲେ, ସେ ହସ୍ପିଟାଲ ଯାଇ ଜରୁରୀକାଳୀନ ସମୟରେ ରୋଗୀଙ୍କୁ ରକ୍ତ ଦେଉଛନ୍ତି । ୨୧ଥର ପ୍ଲେଟଲେଟ୍ ମଧ୍ୟ ଦେଇସାରିଛନ୍ତି । ଏଥିପାଇଁ ତାଙ୍କୁ ଅନେକବାର ଗାଳି ଶୁଣିବାକୁ ମିଳିଛି । ଲୁଚିଲୁଚି ସେ ହସ୍ପିଟାଲ ଯାଇ ରକ୍ତ ଦେଉଛନ୍ତି । ଶ୍ରୀ ପଟ୍ଟନାୟକ କହିଛନ୍ତି, ରକ୍ତ ଦେବା କିଛି ଖରାପ ନୁହେଁ । ସ୍ତ୍ରୀ ଆଶାଲତା ତାଙ୍କୁ ଏଥିପାଇଁ ସମର୍ଥନ କରୁଛନ୍ତି । ସେ ବି ରକ୍ତ ଦେଇଥାନ୍ତି । ଏପରିକି ତାଙ୍କ ପୁଅ ଦିବ୍ୟମୋହନ ମଧ୍ୟ ଜଣେ ରକ୍ତଦାତା ।
