ପୁରୀ,୧୩/୧୨: ଆରମ୍ଭ ହୋଇଛି ମହାପ୍ରଭୁ ଶ୍ରୀଜଗନ୍ନାଥଙ୍କ ବିଶ୍ୱ ପ୍ରସିଦ୍ଧ ରଥଯାତ୍ରା-୨୦୨୫ର ପ୍ରସ୍ତୁତି ପର୍ବ । ପ୍ରଥମେ ଦାରୁବ୍ରହ୍ମଙ୍କ ରଥତ୍ରୟ ନିର୍ମାଣ ପାଇଁ କାଠ ଯୋଗାଡ଼ ହେବ । ପରମ୍ପରା ଅନୁସାରେ କାଠ ଛେଦନ ପୂର୍ବରୁ ନୟାଗଡ଼ ବଡ଼ମୂଳସ୍ଥିତ ମା’ବଡ଼ରାଉଳ ଠାକୁରାଣୀଙ୍କୁ ପୂଜାର୍ଚ୍ଚନା କରାଯିବ । ଏଥିପାଇଁ ଆସନ୍ତା ୧୬ ତାରିଖ ସୋମବାର ଶ୍ରୀମନ୍ଦିର ପ୍ରଶାସନର ସ୍ୱତନ୍ତ୍ର ପ୍ରତିନିଧି ଦଳ ନୟାଗଡ଼ ଯାତ୍ରା କରିବେ । ୫ଜଣିଆ ଏହି ପ୍ରତିନିଧି ଦଳଙ୍କ ନେତୃତ୍ୱ ନେବେ ଶ୍ରୀମନ୍ଦିର ବରିଷ୍ଠ ତତ୍ତ୍ୱାବଧାରକ ସୁଦର୍ଶନ ମେକାପ । ସାଥିରେ ନେବେ ମହାପ୍ରଭୁଙ୍କ ଲାଗି ଖଣ୍ଡୁଆ, ପତନି, ମାଳ, ମାହାର୍ଦ୍ଦ, ଶ୍ରୀଫଳ, ଧୂପ ଦୀପ ଓ ଫଳମୂଳ ଆଦି ପୂଜା ସାମଗ୍ରୀ ।
୧୭ ତାରିଖ ମଙ୍ଗଳବାର ପୂର୍ବାହ୍ନରେ ଠାକୁରାଣୀଙ୍କ ପୂଜାର୍ଚ୍ଚନା ପରେ ରଥ କାଠ ଛେଦନ ଅନୁକୂଳ ହେବ । ରଥ ନିର୍ମାଣର ପ୍ରାରମ୍ଭିକ ପ୍ରକ୍ରିୟା କ୍ରମେ ଶ୍ରୀମନ୍ଦିର ପ୍ରଶାସନ ରଥ କାଠ ଯୋଗାଇବାକୁ ଜଙ୍ଗଲ ବିଭାଗକୁ ବରାଦ କରିଛି । ରଥ ସଂହିତା ଅନୁସାରେ ନୟାଗଡ଼ ଡିଭିଜନ୍ ଶୁଖିଲା କାଠ ଓ ଖୋର୍ଦ୍ଧା ଡିଭିଜନ କଞ୍ଚା କାଠ ଯୋଗାଇବାର ପରମ୍ପରା ରହିଛି । ଶ୍ରୀମନ୍ଦିର ବରିଷ୍ଠ ତତ୍ୱାବଧାରକ ଶ୍ରୀ ମେକାପ କୁହନ୍ତି ପ୍ରତିବର୍ଷ ମହାପ୍ରଭୁଙ୍କ ତିନି ରଥ ନିର୍ମାଣ ପାଇଁ ୮୬୫ ଶୁଖିଲା କାଠ ଓ ୧୦୦ ଖଣ୍ଡ କଞ୍ଚା କାଠ ଲୋଡ଼ା ହୁଏ । ଆସନ୍ତା ବର୍ଷ ରଥ ଯାତ୍ରା ପାଇଁ ୮୧୪ ଖଣ୍ଡ କାଠର ଆବଶ୍ୟକତା ରହିଛି ।
୨୦୨୪ ରଥଯାତ୍ରାଠାରୁ ୫୧ ଖଣ୍ଡ କାଠ ଶ୍ରୀମନ୍ଦିର ପ୍ରଶାସନ ପାଖରେ ଗଛିତ ରହିଛି । ବରାଦ କାଠ ମଧ୍ୟରୁ ରଥ ନିର୍ମାଣ ଉଦ୍ଦେଶ୍ୟରେ ବଡ଼ଦାଣ୍ଡ ରଥଖଳାକୁ ଆସିବ ୩୯୬ ଖଣ୍ଡ କାଠ । କଟକ ଖପୁରିଆସ୍ଥିତ କରତ କଳକୁ ଯିବ ୪୧୮ ଖଣ୍ଡ । ଏସବୁ ହେଉଛି ଫାସୀ, ଅସନ ଓ ଧଉରା ଆଦି ଶୁଖିଲା କାଠ । ସେହିଭଳି ମଇ, ଶିମିଳି ଓ ମହାଲିମ୍ବ ଆଦି ୧୦୦ ଖଣ୍ଡ କଞ୍ଚା କାଠ ଆବଶ୍ୟକ ହେବ । ଫେବୃଆରୀ ୨ ତାରିଖ ଶ୍ରୀପଞ୍ଚମୀ ତଥା ସରସ୍ୱତୀ ପୂଜା ପୂର୍ବରୁ ୨ ଟ୍ରିପ୍ ରଥ କାଠ ପୁରୀ ବଡ଼ଦାଣ୍ଡ ରଥ ଖଳାରେ ପହଞ୍ଚିବ । ଏହାପରେ ପର୍ଯ୍ୟାୟ କ୍ରମେ ସମସ୍ତ ରଥ କାଠ ଆସିବ ବୋଲି ବରିଷ୍ଠ ତତ୍ୱାବଧାରକ ଶ୍ରୀ ମେକାପ କହିଛନ୍ତି ।
