ମଧ୍ୟପ୍ରଦେଶ,୧୦/୦୬: ମଧ୍ୟପ୍ରଦେଶର ପନ୍ନା ବ୍ୟାଘ୍ର ଅଭୟାରଣ୍ୟରେ ରହୁଥିବା ମାଈହାତୀ ବତ୍ସଳାକୁ ବିଶ୍ୱର ସବୁଠୁ ବୟସ୍କ ହାତୀ ବୋଲି କୁହାଯାଉଛି । ତା’ର ବୟସ ୧୦୦ ବର୍ଷରୁ ଅଧିକ ହେବ । କିଛି ରିପୋର୍ଟରେ ୧୯୧୭ ମସିହାରେ ତା’ର ଜନ୍ମ ହୋଇଥିବା କୁହାଯାଉଛି । ଅର୍ଥାତ୍ ନିଜ ଜୀବନକାଳ ମଧ୍ୟରେ ବତ୍ସଳା ଦ୍ୱିତୀୟ ବିଶ୍ୱଯୁଦ୍ଧ, ଭାରତର ସ୍ୱାଧୀନତା ଆନ୍ଦୋଳନ ପ୍ରଭୃତିର ସାକ୍ଷୀ ରହିଛି ।
୧୯୭୧ ମସିହାରେ ତାକୁ କେରଳରୁ ପନ୍ନା ବ୍ୟାଘ୍ର ଅଭୟାରଣ୍ୟକୁ ଅଣାଯାଇଥିଲା । ତା’ ପରଠାରୁ ପନ୍ନା ବ୍ୟାଘ୍ର ଅଭୟାରଣ୍ୟ ତା’ର ଘର ପାଲଟିଯାଇଛି । ଅଧିକାଂଶ ସମୟରେ କାଠ ବୋହିବା ଓ ପର୍ଯ୍ୟଟକଙ୍କୁ ବୁଲାଇବା ତା’ର କାମ ଥିଲା । ୨୦୧୦ରେ ତାକୁ କାର୍ଯ୍ୟରୁ ଅବସର ଦିଆଯାଇଥିଲା । ଏହା ପରେ ମୋତିଆବିନ୍ଦୁ କାରଣରୁ ସେ ଦୃଷ୍ଟିଶକ୍ତି ହରାଇଥିଲା । ତେବେ ଏତେ ବୟସର ହୋଇଥିଲେ ବି ନିଜ ଦଳର ଅନ୍ୟ ହାତୀମାନଙ୍କ ସହ ସେ ଏବେ ବି ସହଜରେ ବୁଲାଚଲା କରୁଛି । ବ୍ୟାଘ୍ର ଅଭୟାରଣ୍ୟ ପକ୍ଷରୁ ମଧ୍ୟ ବତ୍ସଳାର ସ୍ୱତନ୍ତ୍ର ଯତ୍ନ ନିଆଯାଉଛି । ତାକୁ ପ୍ରତିଦିନ ସହଜରେ ହଜମ ହୋଇପାରିବା ଭଳି ଖାଦ୍ୟ ଦିଆଯାଉଛି । ନିୟମିତ ଭାବେ ତା’ର ସ୍ୱାସ୍ଥ୍ୟ ପରୀକ୍ଷଣ ମଧ୍ୟ ହେଉଛି ।
