ଫିରିଙ୍ଗିଆ, ୨।୧୧ :  ଆଧାର କାର୍ଡରେ ଭୁଲ ହୋଇଯାଇଛି ନାଁ I ସଂଶୋଧନ କରିବା ପାଇଁ ଯେତେ ଚେଷ୍ଟା କଲେବି ଆଧାର କାର୍ଡରେ ହୋଇପାରୁନି ନାମ ସଂଶୋଧନ I ଯାହାପାଇଁ ମହିଳାଙ୍କୁ ମିଳିପାରୁନି କୌଣସି ସରକାରୀ ସୁବିଧା I ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଅଧୀନରେ ଥିବା ଡ଼ିମିରିଗୁଡା ପଂଚାୟତ ର କେକ୍ରିଙ୍ଗିଆ ଗାଁରେ I  

ଏହି ଫିରିଙ୍ଗିଆ ବ୍ଲକ ଅନ୍ତର୍ଗତ ପାଙ୍ଗା ଉପର ସାହି ପଂଚାୟତର ମାର୍କାଳୀ ଗାଁର ଟଣ କହଁରଙ୍କ ଝିଅ ଈଶ୍ୱରୀ କହଁର ପ୍ରାୟ ଅଠର ବର୍ଷ ତଳେ କେକ୍ରିଙ୍ଗିଆ ଗାଁ ର ଆଦିତ୍ୟ କହଁରଙ୍କୁ ବିବାହ କରିଥିଲେ I ଶାଶୁ ଘରେ ହୋଇଥିବା ଭୋଟର ପରିଚୟ ପତ୍ରରେ  ରେ ତାଙ୍କ ନାମ ଇଶ୍ୱରୀ କହଁର ଥିବା ବେଳେ ଆଧାର କାର୍ଡରେ ଭୁଲ ବଶତଃ ତାଙ୍କ ନା  ସରିତା କହଁର ବୋଲି ଲେଖା ଯାଇଛି I ତେବେ ଏହି ଛୋଟିଆ ଭୁଲ ପାଇଁ ବର୍ଷବର୍ଷ ଧରି ସେ ସରକାରଙ୍କ କୌଣସି ସୁବିଧା ପାଇଁ ଆବେଦନ କରିପାରୁନାହାନ୍ତି I ଆଧାର କାର୍ଡ ରେ ନାମ ଭୁଲ ଥିବା ଯୋଗୁଁ ସୁଭଦ୍ରା ଯୋଜନା ର ମଧ୍ୟ ସେ ଆବେଦନ କରିପାରିନାହାନ୍ତି I କେବଳ ସେତିକି ନୁହଁ ବାହାଘର ହେବାର ଅଠର ବର୍ଷ ବିତିଯାଇଥିଲେ ମଧ୍ୟ୍ୟ ସେ ତାଙ୍କ ପରିବାରର ଖାଦ୍ୟ ସୁରକ୍ଷା ଯୋଜନାରେ ମଧ୍ୟ୍ୟ ସାମିଲ ହୋଇପାରୁନାହାନ୍ତି I ଅନ୍ୟପଟେ ଏହି ଆଧାର କାର୍ଡ ସଂଶୋଧନ ପାଇଁ ପଞ୍ଚାୟତ କାର୍ଯ୍ୟାଳୟ ଠାରୁ ଆରମ୍ଭ କରି ବ୍ଲକରେ ଥିବା ଆଧାର ସଂଶୋଧନ କେନ୍ଦ୍ର ଓ ଜିଲ୍ଲା ମୁଖ୍ୟାଳୟଠାରେ ଥିବା ବିଭିନ୍ନ କାର୍ଯ୍ୟାଳୟ ବୁଲିବୁଲି ଅନେକ ଟଙ୍କା ମଧ୍ୟ୍ୟ ଖର୍ଚ୍ଚ କରିସାରିଲେଣି I ତଥାପି ତାଙ୍କର ଆଧାର କାର୍ଡ ସଂଶୋଧନ ହୋଇପାରୁନାହିଁ I ସେପଟେ ଆଧାର କାର୍ଡ ସଂଶୋଧନ ହୋଇପାରୁନଥିବାରୁ ଚିନ୍ତାରେ ପଡିଯାଇଛନ୍ତି   ଉକ୍ତ ମହିଳା ଓ ତାଙ୍କ ପରିବାର ଲୋକେ I ତେବେ ତାଙ୍କର ଆଧାର କାର୍ଡକୁ ସଂଶୋଧନ କରିବା ରେ ସାହାଯ୍ୟ କରିବା ପାଇଁ ସେ ପ୍ରଶାସନ ପାଖରେ ନିବେଦନ କରିଛନ୍ତି I