ଗୋଳନ୍ଥରା, ୦୫/୦୫: ୧୬ ନମ୍ୱର ଜାତୀୟ ରାଜପଥ ପାର ହେଉଥିବା ବେଳେ ଯୁବକଙ୍କୁ ଧକ୍କା ଦେଲା କାର୍ । ଚାଲିଗଲା ଯୁବକଙ୍କ ଜୀବନ । ମୃତକ ହେଲେ ଭାଳିଆଗଡ ଗାଁର ଟୁକୁନା ସେଠୀ (୪୦) ବୋଲି ଜଣା ପଡିଛି । ଗଞ୍ଜାମ ଜିଲ୍ଲା ଗୋଳନ୍ଥରା ଥାନା ଅନ୍ତର୍ଗତ ଭାଳିଆଗଡ଼ ୧୬ ନମ୍ୱର ଜାତୀୟ ରାଜପଥରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଶନିବାର ବିଳମ୍ୱିତ ରାତିରେ ଟୁକୁନା ଚାଲି ଚାଲି ନିଜ ଗାଁ ଭାଲିଆଗଡ଼କୁ ଯିବା ପାଇଁ ୧୬ ନମ୍ୱର ଜାତୀୟ ରାଜପଥ ପାର ହେଉଥିଲେ । ଏହି ସମୟରେ ଇଚ୍ଛାପୁର ପଟୁ ଏକ କାର୍ ଦ୍ରୁତ ଗତିରେ ଆସି ତାଙ୍କୁ ଧକ୍କା ଦେଇଥିଲା । ଫଳରେ ଟୁକୁନା ଗୁରୁତର ଆହତ ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ତାଙ୍କୁ ଉଦ୍ଧାର କରି ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ସୋମବାର ଭୋର ସମୟରେ ତାଙ୍କ ମୃତ୍ୟୁ ହୋଇଛି । ଏ ନେଇ ଟୁକୁନାଙ୍କ ପତ୍ନୀ ହୀରା ସେଠୀ ଗୋଳନ୍ଥରା ଥାନାରେ ଲିଖିତ ଅଭିଯୋଗ କରିଥିଲେ । ଏନେଇ ମାମଲା ରୁଜୁ କରି ଦୁର୍ଘଟଣା ଘଟେଇଥିବା କାର୍କୁ ଜବତ କରି ତଦନ୍ତ ଚଳେଇ ଥିବା ପୋଲିସ ସୂଚନା ଦେଇଛି ।
