ଗୁଡଭେଲା /ତୁଷୁରା, ୨୫/୦୬: ଦୀର୍ଘ ବର୍ଷ ହେଲା ଅଧାପନ୍ତରିଆ ହୋଇପଡ଼ି ରହିଛି ବଲାଙ୍ଗୀର ଜିଲ୍ଲା ତୁଷୁରା ସହର ଭିତରେ ଯାଇଥିବା ପୂର୍ତ୍ତ ବିଭାଗ ରାସ୍ତା। ଯାହାକୁ ନେଇ ସହରବାସୀଙ୍କ ମଧ୍ୟରେ ବୃଦ୍ଧି ପାଇଛି ଅସନ୍ତୋଷ। ଏନେଇ ଆଜି ମଧ୍ୟାହ୍ନ ୧୨ଟାରୁ ତୁଷୁରା-ବଲାଙ୍ଗୀର ରାସ୍ତାକୁ ଅବରୋଧ କରି ଧାରଣାରେ ବସିଛନ୍ତି ୟୁଥ ଏକ୍ସନ କମିଟିର ସଭାପତି ଲିସନ ପ୍ରଧାନଙ୍କ ସହ କର୍ମକର୍ତ୍ତା । ଏହାକୁ ସମର୍ଥନ କରି ବିଧାୟକଙ୍କ ଏନଏସି ପ୍ରତିନିଧି ଜିତେନ୍ଦ୍ର ମହାପାତ୍ର, ଏନଏସି ଅଧ୍ୟକ୍ଷ ଅଜୟ ଜୟଶ୍ଵାଲ ମଧ୍ଯ ନିଜ ସମର୍ଥକଙ୍କ ସହ ସାମିଲ ହୋଇଥିଲେ। ସେପଟେ ରାସ୍ତାରୋକ ଯୋଗୁ ରାସ୍ତାର ଉଭୟ ପାର୍ଶ୍ବରେ ଗାଡ଼ି ମୋଟର ଛିଡ଼ା ହୋଇ ରହିଥିଲା । ଫଳରେ ଲୋକଙ୍କ ଯାତାୟାତଙ୍କ ସମସ୍ୟା ଉପୁଜିଥିଲା । ଆଇନ ଶୃଙ୍ଖଳା ପରିସ୍ଥିତି ପାଇଁ ତୁଷୁରା ଥାନା ଅଧିକାରୀ ମନୋଜ ପ୍ରଧାନ ଫୋର୍ସ ସହ ଘଟଣାସ୍ଥଳରେ ପହଞ୍ଚିଥିଲେ ।
ପ୍ରକାଶ ଥାଉକି, ଦେଓଗାଁ-ତୁଷୁରା ରାସ୍ତାକୁ ଉନ୍ନତିକରଣ କରିବା ପାଇଁ ପୂର୍ତ୍ତ ବିଭାଗ ପକ୍ଷରୁ ୮କୋଟି ୮୮ଲକ୍ଷ ଟଙ୍କାର ଟେଣ୍ଡର ହୋଇଥିଲା। ତୁଷୁରା ଉଡ଼ାଜାହାଜ ପଡ଼ିଆରୁ ଚାଣ୍ଟିପଦର ଶିବ ମନ୍ଦିର ପର୍ଯ୍ୟନ୍ତ ରାସ୍ତା କାମ ହୋଇଥାନ୍ତା। କିନ୍ତୁ ତୁଷୁରା ସହରାଞ୍ଚରେ ଥିବା ଜନସ୍ଵାସ୍ଥ୍ୟ ବିଭାଗ କାମ କରିବା ପାଇଁ ଅନୁମତି ଦେଉନଥିବାରୁ ଅଧାପନ୍ତରିଆ ନିର୍ମାଣାଧୀନ ରାସ୍ତା ପଡ଼ି ରହିଛି ।
