ରାଉରକେଲା, ୧୯/୦୬: ସୁନ୍ଦରଗଡ଼ ପୁଲିସକୁ ବଡ଼ ସଫଳତା । ବ୍ରାହ୍ମଣୀ ତରଙ୍ଗ ଥାନା ଅନ୍ତର୍ଗତ ଜିଆବାହାଲ ଡମ୍ପିଂ ୟାର୍ଡରେ ଯୁବକଙ୍କୁ ହତ୍ୟା ଘଟଣାର ଖୋଲିଲା ଗୁମର । ପତ୍ନୀ ଏବଂ ଭାଉଜଙ୍କୁ ଜୀବନରୁ ମାରିବାକୁ ଧମକ ଦେଉଥିଲେ ଯୁବକ । ଏଥିରେ ଅତିଷ୍ଠ ହୋଇ ପଥରରେ ଛେଚି ମାରିଥିଲେ ଭାଉଜଙ୍କ ସମେତ ୫ ଜଣ । ଏହି ଘଟଣାରେ ମୃତକଙ୍କ ଭାଉଜ ସମେତ ପାଞ୍ଚ ଜଣକୁ ଗିରଫ କରାଯାଇଥିବା ସମ୍ପର୍କରେ ସାମ୍ବାଦିକ ସମ୍ମିଳନୀରେ ପୁଲିସ ପକ୍ଷରୁ ସୂଚନା ଦିଆଯାଇଛି ।
ସୂଚନା ମୁତାବକ, ଝାଡ଼ଖଣ୍ଡର ମୂଳ ବାସିନ୍ଦା ନିଲ୍ ଯୋଜୋ ଆଜକୁ ଦୀର୍ଘ ଦିନ ହେଲା ସ୍ତ୍ରୀ ତୁଲେନଙ୍କୁ ନିର୍ଯାତନା ଦେଇ ଆସୁଥିଲେ । ଏଥିରେ ଅତିଷ୍ଠ ହୋଇ ଭାଉଜ ଫୁଲମଣୀ ହୋର ତୁଲେନଙ୍କୁ ଗତ ୨୦୨୩ ମସିହାରେ ରାଉରକେଲା ନେଇ ଆସିଥିଲେ । ଏହି କଥାକୁ ନେଇ ନିଲ ପତ୍ନୀ ଓ ଭାଉଜଙ୍କୁ ଜୀବନରୁ ମାରିଦେବାକୁ ବାରମ୍ବାର ଧମକ ଦେଇ ଆସୁଥିଲେ । ଘଟଣାର ପୂର୍ବ ଦିନ ଉଭୟଙ୍କୁ ରାସ୍ତାରେ ରୋକି ଧମକ ଦେଇଥିଲେ । ଯାହାକୁ ନେଇ ଗତ ରବିବାର ଫୁଲମଣୀ ନିଜ କକା ସହ ମିଶି ନିର୍ମଳ ଟପୋ, ସୁନୀଲ ମୁଣ୍ଡା, ମାନସିଦ ମୁଣ୍ଡା, ଆରବୀନ ସୂରିନ ସହଯୋଗରେ ପଥର ଛେଚି ନିଲଙ୍କୁ ହତ୍ୟା କରିଥିଲେ । ଗିରଫ ଅଭିଯୁକ୍ତମାନଙ୍କ ବିରୋଧରେ ମାମଲା ରୁଜୁ ପରେ କୋର୍ଟ ଚାଲାଣ କରାଯାଇଛି ।
କହିରଖୁ କି, ଗତ ରବିବାର ରାତି ପ୍ରାୟ ୮ଟାରେ କିଛି ଯୁବକ ନିଲ୍ଙ୍କୁ ଘର ସମ୍ମୁଖରେ ଗାଳିଗୁଲଜ କରି ମାଡ଼ ମାରିଥିଲେ । ପରେ ସେଠାରୁ ସମ୍ପୃକ୍ତ ଯୁବକମାନେ ନିଲ୍ଙ୍କୁ ସ୍ଥାନୀୟ ଡିମ୍ପିଂୟାର୍ଡ ସାଇଡିଂକୁ ଘୋଷାଡ଼ି ନେଇଥିଲେ । ସେଠାରେ ନିଲ୍ଙ୍କ ମୁହଁରେ ପଥରରେ ଛେଚିଥିଲେ । ରକ୍ତାକ୍ତ ଅବସ୍ଥାରେ ନିଲ୍ ତଳେ ପଡ଼ିଯିବା ପରେ ସମ୍ପୃକ୍ତ ଯୁବକମାନେ ସେଠାରୁ ଚମ୍ପଟ ମାରିଥିଲେ । ରାତି ପ୍ରାୟ ୯ଟାରେ ଘଟଣା ସମ୍ପର୍କରେ ପୁଲିସ୍ ଖବର ପାଇବା ପରେ ଡମ୍ପିଂୟାର୍ଡ ସାଇଡିଂକୁ ଯାଇଥିଲା । ସେଠାରେ ନିଲ୍ଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରି ରାଉରକେଲା ସରକାରୀ ଡାକ୍ତରଖାନାକୁ ଆଣିଥିଲା । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
