କଟକ, ୩୦/୧୦: ମୁଣ୍ଡଳୀ ବ୍ରିଜ୍ ଉପରୁ ଡେଇଁ ନିଖୋଜ ହୋଇଥିବା ବ୍ୟାଙ୍କ୍ କର୍ମଚାରୀଙ୍କ ମୃତଦେହ ଉଦ୍ଧାର । ମୃତକ ତାରିଣୀ ପ୍ରସାଦ ରାଉତ ବୋଲି ମାନସିକ ଚାପ ଲାଗି ଆତ୍ମହତ୍ୟା କରିଥିବା ଜଣାପଡ଼ିଛି । କଟକ ମୁଣ୍ଡଳୀ ଠାରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ତାରିଣୀ ପ୍ରସାଦ ରାଉତ ଅନଲାଇନ୍ ଟ୍ରେଡିଂ ଏବଂ ଗେମ୍ରେ ଲକ୍ଷାଲକ୍ଷ ଟଙ୍କା ଲଗାଇଥିଲେ । ଋଣ ବୋଝରେ ରହି ତାଙ୍କ ମାନସିକ ଚାପ ବଢିଥିଲା । ଶେଷରେ ଡିପ୍ରେସନ୍ର ଶିକାର ହୋଇ ଯୁବକ ଜଣକ ଏଭଳି ପଦକ୍ଷେପ ନେଇଥିଲେ । ସେ ଗତକାଲି କଟକ ମୁଣ୍ଡଳୀ ବ୍ରିଜ୍ ଉପରୁ ଡେଇଁ ନିଖୋଜ ହୋଇଥିଲେ । ବାରଙ୍ଗ ପୋଲିସ ଏବଂ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ସର୍ଚ୍ଚ ଅପରେସନ ଜାରି ରଖିଥିଲେ । ହେଲେ ଯୁବକଙ୍କର କୌଣସି ପତ୍ତା ମିଳିନଥିଲା । ତେବେ ବୁଧବାର ସକାଳୁ ସ୍ଥାନୀୟ ଲୋକେ ଗାଧୋଇବାକୁ ଯାଇଥିବା ବେଳେ ଯୁବକଙ୍କ ମୃତଦେହ ପାଣିରେ ଭାସୁଥିବା ଦେଖିଥିଲେ । ଏହା ଦେଖି ତୁରନ୍ତ ବାରଙ୍ଗ ପୋଲିସକୁ ଖବର ଦେଇଥିଲେ । ପୋଲିସକୁ ଖବର ପାଇ ଉଭୟ ବାରଙ୍ଗ ଅଗ୍ନିଶମ ବାହିନୀ ଓ ବାରଙ୍ଗ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ପାଣିରୁ ମୃତଦେହ ଉଦ୍ଧାର କରିଥିଲେ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ମେଡିକାଲ ପଠାଇଛି ।
