ନୂଆଦିଲ୍ଲୀ: ବ୍ୟକ୍ତିଗତ କାରଣ ଦର୍ଶାଇ ଶନିବାର ଓ୍ବାଇଏସ୍ଆର କଂଗ୍ରେସ ନେତା ଭି. ବିଜୟସାଇ ରେଡ୍ଡୀ ରାଜ୍ୟସଭାରୁ ଇସ୍ତଫା ଦେଇଛନ୍ତି । ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ଼ଙ୍କୁ ସେ ନିଜର ଇସ୍ତଫ ପତ୍ର ପ୍ରଦାନ କରିଛନ୍ତି । ଆହୁରି ୩ରୁ ଅଧିକ ବର୍ଷ କାର୍ଯ୍ୟକାଳ ଥିବା ବେଳେ ବ୍ୟକ୍ତିଗତ କାରଣ ଯୋଗୁଁ ରାଜ୍ୟସଭା ସାଂସଦ ପଦରୁ ଇସ୍ତଫା ଦେଇଛି ବୋଲି ଗଣମାଧ୍ୟମ ସାମ୍ନାରେ କହିଛନ୍ତି ବିଜୟସାଇ ରେଡ୍ଡୀ । ତାଙ୍କର ଇସ୍ତଫା ପତ୍ର ଗ୍ରହଣ କରିଛନ୍ତି ଜଗଦୀପ ଧନଖଡ଼ ।
ବିଜୟସାଇ ରେଡ୍ଡୀ ଆନ୍ଧ୍ର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀଙ୍କ ନିକଟତମ ସହଯୋଗୀ । ରାଜ୍ୟସଭା ସାଂସଦ ପଦରୁ ଇସ୍ତଫା ଦେଇଥିବା ବିଜୟସାଇ ରେଡ୍ଡୀ ଗତକାଲି (ଶୁକ୍ରବାର) ରଜାନୀତିରୁ ସନ୍ନ୍ୟାସ ଗ୍ରହଣ କରିବା ସହ ଓ୍ବାଇଏସ୍ଆର କଂଗ୍ରେସକୁ କୃତଜ୍ଞତା ଜଣାଇଥିଲେ । ଏହା ସହ ସେ କହିଥିଲେ, ‘ମୁଁ ଅନ୍ୟ କୌଣସି ରାଜନୈତିକ ଦଳରେ ସାମିଲ ହେବି ନାହିଁ । ଇସ୍ତଫା ଦେଇ ଅନ୍ୟ କେଉଁ ଦଳରୁ କୌଣସି ପଦ ପଦବୀ ନେବାକୁ ମୋର ଇଚ୍ଛା ନାହିଁ । ଏ ନିଷ୍ପତ୍ତି ସଂପୂର୍ଣ୍ଣ ରୂପେ ବ୍ୟକ୍ତିଗତ । କାହା ଚାପରେ କିମ୍ବା ପ୍ରଲୋଭନ ଲାଗି ଇସ୍ତଫା ଦେଇ ନାହିଁ । ମୁଁ ସର୍ବଦା ଓ୍ବାଏସଆର କଂଗ୍ରେସ ପ୍ରତି ସମର୍ପଣ ରହିବି । ଦୀର୍ଘ ୪ ଦଶନ୍ଧୀ ଧରି ଦଳ ମୋତେ ବହୁତ କିଛି ଦେଇଛି ।’
ଏହ ସହ ସେ ଜଗନ ରେଡ୍ଡୀଙ୍କୁ ଖୁବ ପ୍ରଶଂସା କରିଛନ୍ତି । ଜଗନ ମୋହନ ରେଡ୍ଡୀଙ୍କ ଲାଗି ଦୁଇ ଥର ରାଜ୍ୟସଭା ସାଂସଦ ହେବାର ସୌଭାଗ୍ୟ ପାଇଛି ବୋଲି କହିଛନ୍ତି ବିଜୟସାଇ ରେଡ୍ଡୀ । ସେପଟେ ବିଜୟସାଇ ରାଜ୍ୟସଭାରୁ ଇସ୍ତଫା ଦେବା ଏବଂ ରାଜନୀତିରୁ ସନ୍ନ୍ୟାସ ଘୋଷଣା କରିବା ଜଗନ ମୋହନ ରେଡ୍ଡୀଙ୍କ ପାଇଁ ଅଡ଼ୁଆ ପରିସ୍ଥିତି ସୃଷ୍ଟି କରିବ । ଏହାର କାରଣ ହେଉଛି, ଦିଲ୍ଲୀରେ ଜଗନ ରେଡ୍ଡୀଙ୍କ ସ୍ବର ଥିଲେ ବିଜୟସାଇ । ଓ୍ବାଇଏସଆର କଂଗ୍ରେସର ନେତାମାନେ ବିଜୟସାଇଙ୍କୁ ପୁଣି ଥରେ ଚିନ୍ତା କରିବାକୁ ଅନୁରୋଧ କରିଛନ୍ତି । ଜଗନ ମୋହନ ରେଡ୍ଡୀଙ୍କୁ ପୁଣି ଥରେ ରାଜ୍ୟର ମୁଖ୍ୟମନ୍ତ୍ରୀ କରାଇବା ଲାଗି ଦଳୀୟ ନେତାଙ୍କ ଏକତା ଉପରେ ଜୋର ଦେଇଛନ୍ତି ଓ୍ବାଇଏସ୍ଆର କଂଗ୍ରେସ ନେତ୍ରୀ ମାଦିଲା ଗୁରୁମୂର୍ତ୍ତୀ ।
