ରାଜକନିକା,୩୦ା୩ : ୨୦୦୯ ମସିହା ମାର୍ଚ୍ଚ ୩୧ ତାରିଖ ଅପରାହ୍ଣ ୩.୪୫ ମିନିଟ୍ । କେହି କିଛି ବୁଝିବା ଆଗରୁ ସାରା ରାଜକନିକାକୁ ସ୍ତବ୍ଧ କରି କାଳବୈଶାଖୀ ତାଣ୍ଡବ ରଚିଲା । ୪ ମିନିଟ ମଧ୍ୟରେ ସବୁ ଛାରଖାର ହୋଇଗଲା । ଚାନ୍ଦବାଲି ଠାରେ ବୈତରଣୀ ନଦୀରୁ ସୃଷ୍ଟି ହୋଇଥିବା ଏହି ଘୁର୍ଣ୍ଣିଝଡ଼ କନିକା ସଦରର ଓସ୍ତିଆ ଗାଁ ଉପରଦେଇ ବଡ଼ଜୋରମୁହଁ ପର୍ଯ୍ୟନ୍ତ ମାତ୍ର ୪ ମିନିଟରେ ସବୁ କିଛି ଓଲଟ ପାଲଟ କରିଦେଇଥିଲା । ଇତି ମଧ୍ୟରେ ଘୂର୍ଣ୍ଣିଝଡ଼କୁ ୧୬ ବର୍ଷ ପୂରିଛି । ଆଜି ବି ମେଘ ଦେଖିଲେ କ୍ଷତିଗ୍ରସ୍ତ ଅଞ୍ଚଳର ଲୋକମାନଙ୍କ ମନରେ ଛନକା ପଶୁଛି । ଭୟରେ ଲୋମ ଟାଙ୍କୁରି ଉଠୁଛି । ପ୍ରଳୟର ସ୍ମୃତି ଏବେ ବି ସତେଜ ରହିଛି ।
ସେଦିନ ୨୮୫ କିମିରୁ ଅଧିକ ବେଗରେ ପବନ ବହିବା ସହ ବର୍ଷା ମାଡ଼ରେ ଓସ୍ତିଆ, ତଇଳା, ବାଘବୁଦା, ଗୋବିନ୍ଦପୁର, କଲୋନୀ, ଅଚ୍ୟୁତପୁର, ଆରସା, ମନେଇଡିହ, ଗଞ୍ଜା, ମଙ୍ଗଳପୁର, ମକୁନ୍ଦପୁର, ଦଶଭଗାରିଆ, ବଡ଼ଜୋରମୁହଁ, ଡାଳିକାଏନ୍ଦା ଗାଁରେ ତାଣ୍ଡବ ରଚିଥିଲା । ନଦୀରେ ଥିବା ବାଲି ବାଝେଇ ଡଙ୍ଗାକୁ ଉପରକୁ ଆଣି କଚାଡ଼ି ଦେବାରୁ ୬ ଜଣ ଶ୍ରମିକ ଗୁରୁତର ହୋଇଥିଲେ । ସେହିପରି ଚଳନ୍ତା ବାଲି ବାଝେଇ ଟ୍ରାକ୍ଟରକୁ ଉଡ଼େଇ ନେବାରୁ ଏଥିରେ ଥିବା ୩ ଜଣ ଶ୍ରମିକଙ୍କର ମୃତ୍ୟୁ ହୋଇଥିଲା । କୋଠାଘରର ଛାତକୁ ତୁଳା ଭଳି ଉଡ଼ାଇ ନେଇଯିବା ସହ ପବନରେ ୧୪ ଟି ଗାଁକୁ ଧ୍ୱଂସସ୍ତୁପରେ ପରିଣତ କରିଥିଲା । ଆଜି ବି ସେଦିନର ସେହି ତାଣ୍ଡବକୁ ଏହି ଅଞ୍ଚଳର ଲୋକମାନେ ଭୁଲି ପାରିନାହାନ୍ତି । ଆକାଶରେ ମେଘ ଆସିଲେ ଛାନିଆ ହୋଇଯାଉଛନ୍ତି ।
ସେଦିନ ଘୂର୍ଣ୍ଣିଝଡ଼ର ମାଡ଼ରେ ଶାରୀରିକ ଅକ୍ଷମ ହୋଇଥିବା ଗଞ୍ଜା ଗ୍ରାମର ରଞ୍ଜୁ ସାମଲ, ଅଶୋକବଜାରର କନକ ଅପା, ଦଶଭଗାରିଆ ଗ୍ରାମର ପାତ ଅପା ସବୁଦିନ ପାଇଁ ବେସାହାରା ହୋଇ ଜୀବନ ବିତାଉଛନ୍ତି । ଏହି ଘୁର୍ଣ୍ଣିଝଡ଼ରେ ମୋଟ ୧୭ ଜଣଙ୍କର ମୃତ୍ୟୁ ହୋଇଥିବାବେଳେ ୧୬୭ ଜଣ ଆହତ ହୋଇଥିଲେ । ଆହତଙ୍କ ମଧ୍ୟରୁ ବହୁ ଲୋକ ଆଜି ବି ଅକର୍ମଣ୍ୟ ହୋଇ ରହିଛନ୍ତି । ସେଦିନର ସେହି ଲୋମ ଟାଙ୍କୁରା ଘଟଣାକୁ ମନେ ପକାଇ ଆଜି ବି ସେହି ସବୁ ଗ୍ରାମର ଜନଜୀବନ ଅସ୍ତବ୍ୟସ୍ତ ହୋଇ ଉଠୁଛି । ଏତେ ବଡ଼ ବିପର୍ଯ୍ୟୟ ପରେ ବି କ୍ଷତିଗ୍ରସ୍ତଙ୍କୁ ସଠିକ୍ ଭାବରେ ସରକାରୀ ସହାୟତା ମିଳିପାରି ନାହିଁ । ଘର ଭାଙ୍ଗିବା ଲାକେ ଘର ନ ପାଇବା, ମୃତାହତ ପରିବାର ସାମାନ୍ୟ ସାହାଯ୍ୟ ପାଇ ନିଜକୁ ବୁଝେଇ ଦେଇଥିବା ବେଳେ ୧୬ ବର୍ଷ ତଳର ସ୍ମୃତି ଆଜିର ଦିନରେ ବେଶ ସତେଜ ଅଛି ।
