ମାହଙ୍ଗା,୨୭।୧୧ : ବାଇକରେ ଆସି ବନ୍ଧୁକ ଦେଖାଇ ବିଚ ରାସ୍ତାରେ ଲୁଟ କରୁଥିଲେ ୩ ଦୁର୍ବୃତ୍ତ । ସଂଯୋଗ ବଶତଃ ପୋଲିସ ସେହି ସମୟରେ ଆସି ପହଞ୍ଚି ଗଲା। ତାପରେ ତ ଫିଲ୍ମ ଷ୍ଟାଇଲରେ ହେଲା ଗୋଡ଼ାଗୋଡି। ବାଇକକୁ ଧକ୍କା ଦେବାରୁ ଜଣକୁ ରାସ୍ତା ଉପରୁ ହିଁ କାବୁକଲା ପୋଲିସ ଆଉ ଦୁଇଜଣ ବିଲ ଆଡକୁ ଦଉଡି ପଳାଇ ଯାଉଥିଲେ। ସେମାନଙ୍କୁ ମଧ୍ୟ ସ୍ଥାନୀୟ ଲୋକଙ୍କ ସହାୟତାରେ କାବୁ କଲା ପୋଲିସ। ଘଟଣା ଟି ଦେଖିବାକୁ ମିଳୁଛି କଟକ ଜିଲ୍ଲା ମାହାଙ୍ଗା ଥାନା କୁଣ୍ଡି ବଡପୋଲ ନିକଟରେ। 

ସ୍ଥାନୀୟ ଅଞ୍ଚଳର ଦୁଇଜଣ ଛାତ୍ର ବାଇକ ଯୋଗେ ଘରକୁ ଫେରୁଥିଲେ। ଏହି ସମୟରେ ସେମାନଙ୍କୁ ୩ ଜଣ ଦୁର୍ବୃତ୍ତ  ବାଟରେ ଅଟକାଇ ବନ୍ଧୁକ ଦେଖାଇ ଲୁଟ ଉଦ୍ୟମ କରିଥିଲେ।  ସେହି ସମୟରେ ପୋଲିସ ହଠାତ ପହଞ୍ଚି ଯାଇଥିଲା। ୩ ଜଣ ଲୁଟେରାଙ୍କୁ ପୋଲିସ କାବୁ କରିଥିଲା।  ଧରାପଡିଥିବା ୩ ଲୁଟେରାଙ୍କ ଠାରୁ ବାଇକ ସହ ଗୋଟିଏ ବନ୍ଧୁକ, ଗୋଟିଏ ଛୁରୀ ଓ ଗୋଟିଏ କଟୁରି ଜବତ କରିଛି ପୋଲିସ। ସେମାନଙ୍କ ନାମରେ ପୂର୍ବରୁ ମଧ୍ୟ ଲୁଟ ମାମଲା ରହିଛି।