ଲକ୍ଷ୍ନୌ,୧୮/୧ : ଉତ୍ତରପ୍ରଦେଶର ପ୍ରୟାଗରାଜରେ ଜମୁଛି ମହାକୁମ୍ଭ ମେଳା । ୧୨ ବର୍ଷ ପରେ ତ୍ରିବେଣୀ ସଙ୍ଗମରେ ଚାଲିଛି ଦିବ୍ୟ ଭବ୍ୟ ମହାକୁମ୍ଭର ମହାପର୍ବ । ଆଜି (ଶନିବାର) ମହାକୁମ୍ଭ ମେଳାର ଷଷ୍ଠ ଦିନ । ଏହି ଅବସରରେ ପ୍ରାୟ ୩୦ ଲକ୍ଷରୁ ଅଧିକ ଶ୍ରଦ୍ଧାଳୁ ସଙ୍ଗମରେ ବୁଡ ପକାଇଛନ୍ତି । କୁମ୍ଭମେଳା ଆରମ୍ଭ ହେବା ଦିନୁ ଅନେକ କୁମ୍ଭାଶ୍ଚର୍ଯ୍ୟ ଦେଖିବାକୁ ମିଳିଛି । ଏହି ମେଳାରେ ସାମିଲ ଥିବା ବାବାଙ୍କୁ ନେଇ ବିଶେଷ ଚର୍ଚ୍ଚା ହେଉଛି । ଆଇଆଇଟିଆନ ବାବାଙ୍କ ପରେ ଏବେ ସ୍ପଟଲାଇଟରେ ରହିଛନ୍ତି ଆଉ ଜଣେ ବାବା । ଋଷର ଜଣେ ୭ ଫୁଟ୍ ମସ୍କ୍ୟୁଲାର ବାବାଙ୍କୁ ନେଇ ଖୁବ ଚର୍ଚ୍ଚା ଲାଗି ରହିଛି ।
ସ୍ପଟଲାଇଟରେ ୭ଫୁଟର ମସ୍କ୍ୟୁଲାର ବାବା- ମହାକୁମ୍ଭ ମେଳାରେ ଭାରତ ବ୍ୟତୀତ ବିଦେଶରୁ ମଧ୍ୟ ସାଧୁ ସନ୍ଥ ସାମିଲ ହୋଇଛନ୍ତି । ସେମାନଙ୍କ ମଧ୍ୟରୁ ଜଣେ ପ୍ରମୁଖ ସନ୍ଥ ହେଉଛନ୍ତି ଆତ୍ମା ପ୍ରେମ ଗିରି ମହାରାଜ । ବଡି ବିଲିଂକୁ ନେଇ ଚର୍ଚ୍ଚାରେ ରହିଛନ୍ତି ଋଷୀୟ ବାବା । ତାଙ୍କୁ ମସ୍କ୍ୟୁଲାର ବାବା ଭାବେ ନୂଆ ନାମ ଦିଆଯାଇଛି । ତାଙ୍କ ଉଚ୍ଚତା ୭ ଫୁଟ । ସେ ଗେରୁଆ ବସ୍ତ୍ର ପିନ୍ଧିଛନ୍ତି । ବେକରେ ହାତରେ ରୁଦ୍ରାକ୍ଷ ମାଳି ପକାଇଛନ୍ତି । ମହାକୁମ୍ଭ ମେଳାରେ ବାବାଙ୍କ ଆଗମନକୁ ନେଇ ଲୋକଙ୍କ ମଧ୍ୟରେ କୌତୁହଳ ସୃଷ୍ଟି ହୋଇଛନ୍ତି । ଅନେକ ଲୋକ ତାଙ୍କ ଭଗବାନ ପ୍ରର୍ଶୁରାମଙ୍କ ରୂପ ବୋଲି ମାନୁଛନ୍ତି । ପର୍ଶୁରାମଙ୍କୁ ଜଣେ ଯୋଦ୍ଧା ଭାବେ ବିବେଚନା କରାଯାଏ । ସେ ଭଗବାନ ବିଷ୍ଣୁଙ୍କର ଦଶାବତାର ମଧ୍ୟରୁ ଜଣେ ।ପ୍ରେମ ଗିରି ମହାରାଜ ମୁଳତଃ ଜଣେ ଋଷୀୟ । ସେ ୩୦ ବର୍ଷ ପୂର୍ବେ ସନାତନ ଧର୍ମ ଗ୍ରହଣ କରିଥିଲେ । ସେବେଠୁ ସେ ସନାତନ ଧର୍ମ ପ୍ରଚାରରେ ନିଜ ଜୀବନକୁ ଉତ୍ସର୍ଗ କରି ଦେଇଛନ୍ତି । ସେ ଜଣେ ଶିକ୍ଷକ ଥିଲେ ମାତ୍ର ଶିକ୍ଷକତା ଛାଡି ଆଧ୍ୟାତ୍ମିତ ଯାତ୍ରା ଆରମ୍ଭ କରିଥିଲେ । ବର୍ତ୍ତମାନ ସେ ନେପାଳରେ ରହି ହିନ୍ଦୁ ଧର୍ମର ପ୍ରଚାର କରୁଛନ୍ତି । ମସ୍କ୍ୟୁଲାର ବାବାଙ୍କର ଏକ ଫଟୋ ସୋସିଆଲ ମିଡିଆରେ ଜଣେ ୟୁଜର୍ସ ପୋଷ୍ଟ କରିବା ପରେ ଚର୍ଚ୍ଚା ଆରମ୍ଭ ହୋଇଛି ।
କହି ରଖୁଛୁ କି, ମହାକୁମ୍ଭରେ ସାମିଲ ହୋଇଛନ୍ତି କୋଟି କୋଟି ସାଧୁ, ସନ୍ଥ ଏବଂ ଶ୍ରଦ୍ଧାଳୁ । ପ୍ରୟାଗରାଜରେ ଆୟୋଜିତ ମହାକୁମ୍ଭକୁ ଆସିଥିବା ବହୁ ସାଧୁ, ସନ୍ଥ ଏବଂ ସ୍ବାଧ୍ବୀ ନିଜ ନିଜର ନିଆରା କାର୍ଯ୍ୟ ପାଇଁ ଚର୍ଚ୍ଚାକୁ ଆସିଛନ୍ତି । ମସ୍କ୍ୟୁଲାର ବାବାଙ୍କ ପୂର୍ବରୁ ଆଇଆଇଟି ବାବା ଚର୍ଚ୍ଚାକୁ ଆସିଥିଲେ । ଲକ୍ଷାଧିକ ଟଙ୍କାର ଚାକିରି ଛାଡ଼ି ପରାମାତ୍ମାଙ୍କ ଶରଣ ନେଇଛନ୍ତି ଆଇଆଇଟି, ବମ୍ବେରୁ ଏରୋସ୍ପେସ୍ ଇଞ୍ଜିନିୟରିଂରେ ଡିଗ୍ରି ହାସଲ କରିଥିବା ଅଭୟ ସିଂହ । ଉଚ୍ଚ ଶିକ୍ଷା କରିଥିବା ବେଳେ ମୋଟା ଅଙ୍କର ଦରମା ପାଉଥିଲେ ସେ । କିନ୍ତୁ ସେ ଆଧ୍ୟାତ୍ମିକ ମାର୍ଗକୁ ଚାଲିଆସିଛନ୍ତି ? ସବୁ ସୁଖ ସୁବିଧାକୁ ଏଡ଼ାଇ ଦେଇ ଅଭୟ ସିଂହ ପାଲଟିଥିଲେ ଆଇଆଇଟି ବାବା ।
