ମାଲକାନଗିରି, ୨୬।୮(ଆପ୍ର): ତେଲେଙ୍ଗନା ରାଜ୍ୟର ଭଦ୍ରାଦରି କୋଥାଗୁଡେମ ଜିଲ୍ଲାର ପୋଲିସ ନିକଟରେ ୮ଜଣ ମାଓବାଦୀ ମାଓ ସଙ୍ଗଠନ ଛାଡି ଆତ୍ମସମର୍ପଣ କରିଛନ୍ତି। ଭଦ୍ରାଦରି କୋଥାଗୁଡେମ ଜିଲ୍ଲା ପୋଲିସ ଏବଂ ସିଆରପିଏଫ ବାଟାଲିୟନ ଦ୍ୱାରା ମାଓ ଉପଦ୍ରବ ଅଞ୍ଚଳରେ ଲୋକଙ୍କ ବିକାଶ ଏବଂ କଲ୍ୟାଣ ପାଇଁ "ଅପରେସନ୍ ଚେୟୁଥା"ର ଆରମ୍ଭ କରିଥିବା ବେଳେ ଏଥିରେ ଆକର୍ଷିତ ହୋଇ ଏହି ୮ ମାଓବାଦୀ ମୁଖ୍ୟସ୍ରୋତରେ ସାମିଲ ହେବାକୁ ନିଷ୍ପତ୍ତି ନେଇଛନ୍ତି। ଆତ୍ମସମର୍ପଣ କାରୀଙ୍କ ମଧ୍ୟରେ ଜଣେ ମହିଳା ସମେତ ୭ ପୁରୁଷ ମାଓବାଦୀ ରହିଛନ୍ତି।
ଏହି ସଦସ୍ୟମାନେ ସଂଗଠନ ମଧ୍ୟରେ ବିଭିନ୍ନ କ୍ୟାଡର ଏସିଏମ୍ କ୍ୟାଡରର ଜଣେ, ସଙ୍ଗଠନର କେନ୍ଦ୍ରୀୟ ସଦସ୍ୟ ଭାବେ ଜଣେ ଏବଂ ୬ଜଣ ମିଲିସିଆ ସଦସ୍ୟ ଭାବେ କାର୍ଯ୍ୟ କରୁଥିଲେ। ମାଓ ସଙ୍ଗଠନ ଦିଗ ହାର ହୋଇ ଭାଙ୍ଗିବାରେ ଲାଗିଥିବା ବେଳେ ପୋଲିସ ପକ୍ଷରୁ ଲୋକଙ୍କ ବିକାଶ ମୂଳକ କାର୍ଯ୍ୟ କରାଯାଉଥିବା ଦେଖି ଏମାନେ ସାଧାରଣ ଜୀବନ ଜାପନ ପାଇଁ ଇଚ୍ଛା ପ୍ରକାଶ କରି ଆତ୍ମସମର୍ପଣ କରିଥିବା କହିଛନ୍ତି। ଆଠ ଜଣ ମାଓବାଦୀ ସଦସ୍ୟଙ୍କ ମଧ୍ୟରୁ ପ୍ରତ୍ୟେକଙ୍କୁ ତୁରନ୍ତ ୨୫ ହଜାର ଟଙ୍କା ସହାୟତା ଭାବରେ ଯୋଗାଇବା ସହ ଆଗାମୀ ଦିନରେ ସେମାନଙ୍କ ପଦବୀ ଅନୁସାରେ ଅତିରିକ୍ତ ଆର୍ଥିକ ସହାୟତା ପ୍ରଦାନ କରାଯିବ ଏବଂ ସେମାନଙ୍କର ସରକାରୀ ନୀତି ଅନୁଯାୟୀ ଥଇଥାନ କରାଯିବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି।
