ଭୁବନେଶ୍ୱର,୨୨/୦୯: ଭାରି ଚତୁର ଓ ତେଜିଆନ । ଇସାରା ବୁଝିବାରେ ଉସ୍ତାଦ । ସେଥିପାଇଁ ବର୍ଷେ କି ଦୁଇବର୍ଷ ନୁହେଁ, ୧୪ବର୍ଷ ହେଲାଣି ଦିଲ୍ଲୀ ପରେଡ୍ ମାଟିରେ କମାଲ ଦେଖାଉଛି । ତାର କୌଶଳ ଦେଖି ସେନା ଅଧିକାରୀମାନେ ବି ତାଜୁବ । କୌଣସି ବ୍ୟକ୍ତିବିଶେଷ କିମ୍ବା ସେନା କର୍ମଚାରୀ ନୁହନ୍ତି ବରଂ ସେନା ଦ୍ୱାରା ନିଯୁକ୍ତ ହୋଇଥିବା ଘୋଡା ଟାର୍ଜନର ବିଷୟରେ ଆମେ କହୁଛୁ ।
ଓୟୁଏଟି ପ୍ରାଣୀଚିକିତ୍ସା ମହାବିଦ୍ୟାଳୟ ପରିସରରେ ଥିବା ୧(ଓ) ଆର୍ଆଣ୍ଡ୍ଭି ସ୍କ୍ୱାର୍ଡନ ଏନସିସି କାର୍ଯ୍ୟାଳୟର ଗେହ୍ଲାପୁଅ ହେଉଛି ଟାର୍ଜନ । କଳା ଓ ଧୂଷର ରଙ୍ଗର ଏହି ଘୋଡ଼ାକୁ ଚଳିତବର୍ଷ ଗଣତନ୍ତ୍ର ଦିବସ ଅବସରରେ ଭାରତୀୟ ସେନା ପକ୍ଷରୁ ସମ୍ମାନଜନକ ‘ଡିଜି ଏନସିସି କମଣ୍ଡେସନ୍ କାର୍ଡ’ ସମ୍ମାନ ମିଳିଛି । ସେଥିପାଇଁ ଏବେ ଏନସିସି କାର୍ଯ୍ୟାଳୟରେ ଖୁସିର ଲହରୀ ଖେଳିଯାଇଛି ।
୨୦୧୪ ମସିହାରେ (ଓ) ଆର୍ଆଣ୍ଡ୍ଭି ସ୍କ୍ୱାର୍ଡନ ଏନସିସି କାର୍ଯ୍ୟାଳୟକୁ ଭାରତୀୟ ସେନା ପକ୍ଷରୁ ଟାର୍ଜନକୁ ଦିଆଯାଇଥିଲା। ଏନ୍ସିସି ପ୍ରଶିକ୍ଷାର୍ଥୀଙ୍କୁ ପ୍ରଶିକ୍ଷଣ ନିମନ୍ତେ ଘୋଡାକୁ ପ୍ରସ୍ତୁତ କରାଯାଇଥିଲା । ଦୀର୍ଘ ୧୧ବର୍ଷ ଧରି ଟାର୍ଜନ ପିଠିରେ ବସି ଶତାଧିକ ଏନ୍ସିସି ପ୍ରଶିକ୍ଷାର୍ଥୀ ପ୍ରଶିକ୍ଷଣ ନେଇଆସୁଛନ୍ତି । ତେବେ ଆସିବା ଦିନଠୁ ଲଗାତାର ଭାବେ ଟାର୍ଜନ ଦିଲ୍ଲୀ ଯାଇ ଗଣତନ୍ତ୍ର ଦିବସ ପରେଡ୍ରେ ଭାଗ ନେଇଆସୁଛି । ଇତିମଧ୍ୟରେ ତାର୍ଜନ ୬ଟି ସ୍ୱର୍ଣ୍ଣ, ୫ଟି ରୌପ୍ୟ, ୪ଟି କାଂସ୍ୟ ପଦକ ହାସଲ କରିଛି । ଏଥିସହ ଗୋଟିଏ ଡିଜିଆରଭିଏସ ଟ୍ରଫି ଓ ଗୋଟିଏ ଶ୍ରେଷ୍ଠ ଆରୋହୀ ବାଳିକା ଟ୍ରଫି ଟାର୍ଜନ ନାଁରେ ରହିଛି । ଏତେସବୁ ସଫଳତା ଦେଖି ଏନସିସି କଟକର ଗ୍ରୁପ କମାଣ୍ଡର କର୍ଣ୍ଣେଲ ସତ୍ୟବ୍ରତ ସ୍ୱାଇଁଙ୍କ ନେତୃତ୍ୱରେ ଟାର୍ଜନକୁ ଚଳିତବର୍ଷ ମଧ୍ୟ ଦିଲ୍ଲୀ ପଠାଯାଇଥିଲା ।
ସବୁଥର ଭଳି ଟାର୍ଜନ ଦିଲ୍ଲୀ ପରେଡ୍ରେ ପରାକାଷ୍ଠା ଦେଖାଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା । କାର୍ଯ୍ୟକ୍ରମରେ ଉପସ୍ଥିତ ଏନସିସିର ମହାନିର୍ଦ୍ଦେଶକ ଲେଫ୍ଟନାଣ୍ଟ ଜେନେରାଲ ଗୁରୁକ୍ରିପାଲ ସିଂ ଟାର୍ଜନର ରେକର୍ଡ ବିଷୟରେ ଜାଣି ଖୁସି ଜାହିର କରିଥିଲେ । ଏଥିସହ ପ୍ରଥମ ଥର ପାଇଁ ଟାର୍ଜନକୁ ଡିଜି ଏନସିସି କମଣ୍ଡେସନ୍ କାର୍ଡ ପ୍ରଦାନ କରିଥିଲେ । ଟାର୍ଜନ ଏକମାତ୍ର ଘୋଡ଼ା ଭାବେ ଭାରତରେ ଥିବା ୨୫ଟି ଆର୍ଆଣ୍ଡ୍ଭି ସ୍କ୍ୱାର୍ଡନ ମଧ୍ୟରେ ଏହି ସମ୍ମାନଜନକ ପୁରସ୍କାର ପାଇଥିବା ସ୍କ୍ୱାର୍ଡନର କମାଣ୍ଡିଂ ଅଧିକାରୀ କର୍ଣ୍ଣେଲ ପି ଦୀନାଦୟାଲନ୍ କହିଛନ୍ତି । ଏହା ମଧ୍ୟ ଓଡ଼ିଶା ପାଇଁ ଗର୍ବର ବିଷୟ ।
ପ୍ରକାଶ ଥାଉକି, ଦୀର୍ଘ ୫୭ ବର୍ଷ ହେଲାଣି ଓୟୁଏଟି ପଡ଼ିଆରେ ଏନସିସି ବିଦ୍ୟାର୍ଥୀଙ୍କୁ ଘୋଡ଼ା ପ୍ରଶିକ୍ଷଣ ଦିଆଯାଉଛି । ଏଠାରେ ମୋଟ ୧୧ଟି ଘୋଡ଼ା ଅଛନ୍ତି । ସେମାନଙ୍କ ମଧ୍ୟରେ ଟାର୍ଜନ ହେଉଛି ସାହସୀ ଓ ଚତୁର ଘୋଡ଼ା । ଏହି ୟୁନିଟ ଭାରତୀୟ ସେନାର ଜଣେ ଲେଫ୍ଟନାଣ୍ଟ ଜେନେରାଲଙ୍କ ସମେତ ୩୩ଜଣ ସେନା ଅଧିକାରୀଙ୍କୁ ତିଆରି କରିଛି ।
