ନୂଆଦିଲ୍ଲୀ,୨୯/୦୩: ସାରା ବିଶ୍ୱରେ ଏବେ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ବ୍ୟବହାର ଦ୍ରୁତ ହୋଇଛି । ଏଆଇ ବିକାଶ ମଧ୍ୟ ତ୍ୱରାନ୍ୱିତ ହୋଇଛି । ଫଳରେ ଏ କ୍ଷେତ୍ରରେ ପ୍ରଫେସନାଲଙ୍କ ଚାହିଦା ବଢ଼ିଛି । ବିଶେଷ କରି ଏଆଇ ଏବଂ ମେଶିନ ଲର୍ଣ୍ଣିଂ ଦକ୍ଷତା ଥିବା ବ୍ୟକ୍ତି ବିଶେଷ ଲୋଡା ପଡୁଛନ୍ତି । ମହାମାରୀ ପରେ ଏହି ବର୍ଗରେ ନିଯୁକ୍ତି ପ୍ରତିବର୍ଷ ୩୦% ହାରରେ ବୃଦ୍ଧି ହେଉଥିବା ଷ୍ଟାଫିଙ୍ଗ୍ ଫାର୍ମ ର୍ୟାଣ୍ଡ୍ଷ୍ଟାର୍ଡ ପକ୍ଷରୁ ଏକ ରିପୋର୍ଟରେ ପ୍ରକାଶ ପାଇଛି । ତେବେ ଅନ୍ୟ ଡିଜିଟାଲ ସ୍କିଲ ଏହି ତୁଳନାରେ ୨ ଗୁଣ କମ୍ ଚାହିଦା ରହିଛି । ଭାରତରେ ଏବେ ଏଆଇ ଏବଂ ମେଶିନ ଲର୍ଣ୍ଣିଂ କ୍ଷେତ୍ରରେ ୨ ଲକ୍ଷ କୁଶଳୀ ପ୍ରଫେସନାଲ ରହିଛନ୍ତି । ଏ କ୍ଷେତ୍ରରେ ନୂଆ ନିଯୁକ୍ତି ମଧ୍ୟ ଯୋଡି ହେଉଛି । ଡିଜିଟାଲ ପରିବର୍ତ୍ତନ ସହ କମ୍ପାନି ଏଆଇ ଏବଂ ମେଶିନ ଲଣ୍ଣିଂ ସହ ଯୋଡି ହେବାକୁ ଜୋରଦାର ପ୍ରୟାସ କରୁଛନ୍ତି । ଏଆଇ ଏବଂ ମେଶିନ ଲର୍ଣ୍ଣିଂ ବିଭିନ୍ନ କାମକୁ କରିପାରୁଥିବା ବେଳେ ଏହା ଦ୍ୱାରା ଲୋକଙ୍କ କାର୍ଯ୍ୟକ୍ଷମତା ବୃଦ୍ଧି ହେବ ବୋଲି କୁହାଯାଉଛି ।
ଏବେ ବିଶ୍ୱ ସ୍ତରୀୟ କମ୍ପାନିଗୁଡିକ ଭାରତରେ ଗ୍ଲୋବାଲ କ୍ଷମତା କେନ୍ଦ୍ର ସ୍ଥାପନ କରୁଛନ୍ତି । ଫଳରେ ଏଆଇ ଏବଂ ମେଶିନ ଲଣ୍ଣିଂ ସହ ଜଡିତ ପ୍ରଫେସନାଲଙ୍କ ଚାହିଦା ବୃଦ୍ଧି ହେଉଛି । ଭାରତୀୟ ପ୍ରତିଭାଙ୍କୁ ନିଯୁକ୍ତି କରିବା ଉପରେ ଏବେ କମ୍ପାନିଙ୍କ ଫୋକସ ରହୁଛି । ଏପଟେ ପାରମ୍ପରିକ କାରବାର ମଧ୍ୟ ଡିଜିଟାଲ ମୁହାଁ । ଅନ୍ୟ ଡିଜିଟାଲ କ୍ଷେତ୍ର ତୁଳନାରେ ଏଆଇ ଏବଂ ମେଶିନ ଲର୍ଣ୍ଣିଂ କ୍ଷେତ୍ରରେ ବେତନ ମଧ୍ୟ କେଇ ଗୁଣ ଅଧିକ ରହୁଛି ।
ପ୍ରଡକ୍ଟ ପ୍ରସ୍ତୁତ କରୁଥିବା କମ୍ପାନି ସବୁଠାରୁ ଅଧିକ ବେତନ ଦେଉଛନ୍ତି । ଏ କ୍ଷେତ୍ରରେ ଏଆଇ ସେବା ପ୍ରଦାନ କରୁଥିବା କମ୍ପାନି ଗୁଡିକ ୦ରୁ ୫ ବର୍ଷ ଅଭିଜ୍ଞତା ଥିବା ପ୍ରଫେସନାଲଙ୍କୁ ୧୪ରୁ ୧୮ ଲକ୍ଷ ଟଙ୍କାର ବେତନ ପ୍ରଦାନ କରୁଛନ୍ତି । ଜିସିସିରେ୧୬ରୁ ୨୦ ଲକ୍ଷ ଟଙ୍କା ଏବଂ ପ୍ରଡକ୍ଟ ଡେଭଲପ୍ କରୁଥିବା କମ୍ପାନି ୨୨ରୁ ୨୬ ଲକ୍ଷର ବେତନ ଦେଉଛନ୍ତି । ତେବେ ସମାନ ଅଭିଜ୍ଞତା ଥିବା ପ୍ରଫେସନାଲ ଆଇଟି କ୍ଷେତ୍ରରେ ୮ରୁ ୨୨ ଲକ୍ଷ ଯାଏ ବେତନ ପାଉଛନ୍ତି । ୧୦ରୁ ୧୫ ବର୍ଷ ଅଭିଜ୍ଞତା ଥିବା ଏଆଇ ଏବଂ ମେଶିନ ଲର୍ଣ୍ଣିଂ ପ୍ରଫେସନାଲଙ୍କୁ ୪୪ ଲକ୍ଷରୁ ୯୬ ଲକ୍ଷ ଟଙ୍କାର ବେତନ ମିଳିବାର ଢେର ସମ୍ଭାବନା ରହିଛି ।
ଅନ୍ୟ ଡିଜିଟାଲ ବର୍ଗରେ ୯% ଅଭିବୃଦ୍ଧି ଆଶା ଥିବା ବେଳେ ଏଆଇ କ୍ଷେତ୍ରରେ ଏହା ୧୨.୫% ରହିପାରେ । ଅନ୍ୟ ଏକ କମ୍ପାନିର କହିବା ମୁତାବକ ଏଆଇ ବର୍ଗରେ ନିଯୁକ୍ତି ୧୦ରୁ ୧୫% ବୃଦ୍ଧି ସମ୍ଭାବନା ରହିଛି । ତେବେ ଏହା ୫୦%କୁ ମଧ୍ୟ ଯାଇପାରେ । ନୂତନ ଭାବେ ପ୍ରାୟ ୧୨ରୁ ଉଦ୍ଧ୍ୱର୍ ବର୍ଗର ନିଯୁକ୍ତି ସାମ୍ନାକୁ ଆସିଛି । ଚାଟ୍ବଟ୍ ଡେଭଲପର, ପ୍ରମ୍ପଟ ଇଞ୍ଜିନିୟରଙ୍କ ସହ ଏଆଇ ଏଥିକ୍ସ ସ୍ପେଶାଲିଷ୍ଟ, ରୋବଟିକ୍ସ ଇଞ୍ଜିନିୟର ଭଳି ବର୍ଗର ନିଯୁକ୍ତି ଏହା ମଧ୍ୟରେ ସାମିଲ ରହିଛି । ଶିକ୍ଷା କ୍ଷେତ୍ରରେ ଏଆଇ ପାଠ୍ୟକ୍ରମ ବିକାଶ ଏବଂ ଲର୍ଣ୍ଣିଂ ଆର୍କଟେକ୍ଟ ଭଳି ନିଯୁକ୍ତି ହେଉଛି । ଏଆଇର ବିଭିନ୍ନ ତାଲିମ ମଧ୍ୟ ନେଇ ପାରିବେ ବିଶେଷଜ୍ଞ ।
