ଅହମ୍ମଦାବାଦ : ଭାରତୀୟ ତଟରକ୍ଷୀ ବାହିନୀକୁ ମିଳିଛି ବଡ଼ ସଫଳତା। ଗୁଜରାଟ ତଟରୁ ଏକ ପାକିସ୍ତାନୀ ବୋଟ୍ରୁ ୬୦୦ କୋଟି ଟଙ୍କାର ୮୬ କିଲୋଗ୍ରାମ୍ ଡ୍ରଗ୍ସ ଜବତ କରାଯାଇଛି। ଭାରତୀୟ ତଟରକ୍ଷୀ ବାହିନୀ , ଆତଙ୍କବାଦୀ ବିରୋଧି ସ୍କ୍ୱାଡ ( ଏଟିଏସ) ଓ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ମିଳିତ ଭାବେ ଏହି ଅପରେସନକୁ ସଫଳ କରିଛନ୍ତି। ବୋଟ୍ରେ ୧୪ ଜଣ ଲୋକଙ୍କୁ ଗିରଫ କରାଯାଇଛି। ଆରବ ସାଗରରେ ଏହି ଅପରେସନ ରାତି ସାରା ଗୁଜରାଟ ଆତଙ୍କବାଦ ବିରୋଧି ସ୍କ୍ୱାଡ (ଏଟିଏସ) ଓ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି)ର ସମନ୍ୱୟରେ ଚାଲିଥିଲା।
ପିଟିଆଇର ରିପୋର୍ଟ ମୁତାବିକ , ତଟରକ୍ଷୀ ବାହିନୀ ଏବେସୁଦ୍ଧା ଏହି ଖୁଲାସା କରି ନାହିଁ, ପାକିସ୍ତାନୀ ବୋଟ୍ରୁ କେଉଁ ଡ୍ରଗ୍ସ ଜବତ କରାଯାଇଛି। ଏହି ଅପରେସନକୁ ସଫଳ କରିବାକୁ ତଟରକ୍ଷୀ ଜାହାଜ ଓ ବିମାନ ଆଦିକୁ ମୁତୟନ କରାଯାଇ ଥିଲା। ଅପରେସନରେ ଆଇସିଜି ଜାହାଜ ରାଜରତନ ମଧ୍ୟ ସାମିଲ ହୋଇଥିଲା। ଜାହାଜର ସ୍ପେଶାଲ ଟିମ୍ ସଦିଗ୍ଧ ବୋଟ୍ରେ ଚଢି ଯାଇଥିଲେ ଏବଂ ବହୁ ମାତ୍ରାରେ ଡ୍ରଗ୍ସ ଥିବା ସ୍ପଷ୍ଟ କରିଥିଲେ। ପାକିସ୍ତାନୀ ବୋଟ୍କୁ ୧୪ ସଦସ୍ୟ ବିଶିଷ୍ଟ ଚାଳକ ଦଳ ସହ ଧରାଯାଇଛି।
ସୂଚନା ମୁତାବିକ, ଏଟିଏସ ଓ ଏନସିବିର ମିଳିତ ଅପରେସନ ବେଳେ ଗିରଫଦାରୀରୁ ରକ୍ଷା ପାଇବା ଚେଷ୍ଟାରେ ତସ୍କରମାନେ ଏଟିଏସ୍ ଅଧିକାରୀଙ୍କ ଉପରେ ନିଜର ବୋଟ୍ ଚଢାଇବାକୁ ଚେଷ୍ଟା କରିଥିଲେ। ଭାରତୀୟ ବାହିନୀର ଜବାବୀ ଗୁଳି ଚାଳନା ପରେ ସଦିଗ୍ଧଙ୍କୁ ଧରାଯାଇ ପାରିଛି।
କୁହାଯାଉଛି କି ,ସୁରକ୍ଷା ଏଜେନ୍ସିମାନେ ଗତ ଦୁଇ ଦିନରୁ ଅନ୍ତରାଷ୍ଟ୍ରୀୟ ସାମୁଦ୍ରିକ ସୀମା ପାଖରେ ଭାରତୀୟ ଜଳ କ୍ଷେତ୍ର ଭିତରେ ତଲାସୀ ଅଭିଯାନ ଚଲାଉ ଥିଲେ। ଅଭିଯୁକ୍ତଙ୍କୁ ମାମଲାର ଯାଞ୍ଚ ପାଇଁ ପୋରବନ୍ଦର ଅଣାଯାଉଛି।
