ଭୁବନେଶ୍ୱର,୨୮/୦୪: ଜଣେ ନୁହଁ କି ଦି’ ଜଣ, ୩୦ ଜିଲ୍ଲା ଦାୟିତ୍ୱରେ ରହିବେ ୩୦ ଅଭିଜ୍ଞ ବିଜେପି ନେତା । ବିଜେପିର ପ୍ରଚାର ଅଭିଯାନରୁ ବୁଥ୍ ପରିଚାଳନା, ୱାରରୁମ୍ କୌଶଳରୁ ସମାବେଶ ଓ ରୋଡ୍ ସୋ- ସବୁକିଛି ଏହି କେନ୍ଦ୍ରୀୟ ନେତାମାନେ ପରିଚାଳନା କରିବେ। ତାଙ୍କ ନିର୍ଦ୍ଦେଶ ଓ ପରାମର୍ଶରେ ଭୋଟ ଯୁଦ୍ଧ ଲଢ଼ିବ ରାଜ୍ୟ ବିଜେପି । କଳେ ବଳେ କୌଶଳେ ଭୋଟରଙ୍କ ମନଜିଣି ଦଳ ଓଡ଼ିଶା ଦଖଲ କରିବ । ଶାସନ ଗାଦିରେ ବସିବ ।
ଏମିତି ବ୍ଲୁପ୍ରିଣ୍ଟ କରିଛି ରାଜ୍ୟ ବିଜେପି । ରାଜ୍ୟରେ ୨୫ ବର୍ଷର ବିଜେଡି ସରକାରକୁ ଗାଦିଚ୍ୟୁତ କରିବାକୁ ହାଇକମାଣ୍ଡ ତ୍ରିପୁରା ଓ ଆସାମ ଫର୍ମୁଲା ଆପଣାଇବାକୁ ସ୍ଥିର କରିଛନ୍ତି । ଏଥିପାଇଁ ଦଳ ଆସାମର ମୁଖ୍ୟମନ୍ତ୍ରୀ ହେମନ୍ତ ବିଶ୍ୱସର୍ମା, ତ୍ରିପୁରାର ପୂର୍ବତନ ମୁଖ୍ୟମନ୍ତ୍ରୀ ତଥା ସାଂସଦ ବିପ୍ଳବ କୁମାର ଦେବଙ୍କୁ ମଡେଲ ପ୍ରସ୍ତୁତ କରିବାକୁ ଦାୟିତ୍ୱ ଦେଇଛି । ଶ୍ରୀ ଦେବ ଓଡ଼ିଶାରେ ପହଞ୍ଚି ‘ୱାରରୁମ୍’ରେ କାମ ଆରମ୍ଭ କରିଛନ୍ତି । ଆଗକୁ ବିଶ୍ୱସର୍ମା ଆସିବେ । ନିର୍ବାଚନ ପରିଚାଳନାରେ ମୁଖ୍ୟ ଭାବେ ଦାୟିତ୍ୱରେ ରହିବେ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବ ।
ତ୍ରିପୁରାରେ ଆମର ଭୋଟ ହାର ୧.୪ ପ୍ରତିଶତ ଥିଲା, ଆସାମରେ ୪ ପ୍ରତିଶତ । ଆମେ ସେଠି ଶାସନକୁ ଆସିଲୁ । ଏଠି ଆମ ସପକ୍ଷରେ ୩୨% ଭୋଟ ଅଛି, ଓଡ଼ିଶା ଦଖଲ କରିପାରି ନାହିଁ କାହିଁକି? ନିଷ୍ଠାର ସହ ଲାଗିପଡ଼, ନିଶ୍ଚୟ ସରକାର ଗଢ଼ିବା ଓଡ଼ିଶାରେ ।
ବିଜେପି କାର୍ଯ୍ୟକର୍ତ୍ତାଙ୍କୁ ଏମିତି ବିଜୟ ମନ୍ତ୍ର ଫୁଙ୍କି ଦିଲ୍ଲୀ ଫେରିଲେ କେନ୍ଦ୍ରମନ୍ତ୍ରୀ ଅମିତ୍ ଶାହ । ଏହାପରେ ବିଜେପି କ୍ୟାମ୍ପରେ ନାହିଁ ନଥିବା ଉତ୍ସାହ । ବିଜେପି ପଦାଧିକାରୀ ଓ ନେତାଙ୍କ ଆତ୍ମବିଶ୍ୱାସରେ ଲାଗିଛି ଡେଣା । ବିଜେପି ଚାଣକ୍ୟ ନୂଆଦିଲ୍ଲୀ ଫେରିବା ପରେ ହଠାତ୍ ‘ରକେଟ୍ ସ୍ପିଡ୍’ରେ ବିଜେପିର ଭୋଟ ରଣକୌଶଳ ବଦଳିଛି ।
ଆଜି ଆସି ରାଜ୍ୟ କାର୍ଯ୍ୟାଳୟରେ ପହଞ୍ଚିଛନ୍ତି ବିପ୍ଳବ । ଦଳର କୋର୍ କମିଟି ସହ ସେ ବୈଠକ କରିବା ପରେ କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲଙ୍କ ସହ ରୁଦ୍ଧଦ୍ୱାର ମନ୍ତ୍ରଣା କରିଛନ୍ତି । ଶ୍ରୀ ଦେବ ‘ତ୍ରିପୁରା ମଡେଲ’ ସଂପର୍କରେ ଦଳୀୟ କାର୍ଯ୍ୟକର୍ତ୍ତାଙ୍କୁ ଅବଗତ କରାଇଛନ୍ତି ।
ବିଜେଡି ସରକାର ବିରୋଧରେ ଥିବା ଅସନ୍ତୋଷକୁ ଅସ୍ତ୍ର କରି କେମିତି ପଦ୍ମ ସପକ୍ଷରେ ଭୋଟ ଭିଡ଼ି ହେବ ତା’ର କୌଶଳ ‘ଭୋଟ ପାଠଶାଳା’ରେ ବତାଇଛନ୍ତି । ଆଗକୁ ତ୍ରିପୁରା ଫର୍ମୁଲାର ଗୋଟିଏ ପରେ ଗୋଟିଏ ମନ୍ତ୍ର ଦେବେ ଶ୍ରୀ ଦେବ । ୫ ଲୋକସଭାର ପ୍ରଭାରୀ ଦାୟିତ୍ୱ ତୁଲାଇବା ସହ ଭୋଟ ସରିବା ଯାଏ ସେ ଓଡ଼ିଶାରେ ଡେରା ପକାଇବେ ବୋଲି ବିଜେପି ସୂତ୍ରରୁ ମିଳିଛି ସୂଚନା ।
ଆସାମ ମୁଖ୍ୟମନ୍ତ୍ରୀ ଆଗକୁ ଓଡ଼ିଶା ଗସ୍ତରେ ଆସି ଦଳୀୟ ନେତା ଓ କର୍ମକର୍ତ୍ତାଙ୍କ ମଧ୍ୟରେ ଜୋସ୍ ଭରିବେ । ଯେଉଁ ଆସନଗୁଡ଼ିକରେ ଦଳ ପାଇଁ ଅଡୁଆ ପରିସ୍ଥିତି ଅଛି ହେମନ୍ତ ସେଠାକୁ ଯାଇ ସଂକଟ ମୋଚନ କରିବେ ।
ହେମନ୍ତଙ୍କ ଅଭିଜ୍ଞତା ଓ ବିଜୟ କୌଶଳର ପୂର୍ଣ୍ଣ ବିନିଯୋଗ କରିବ ଦଳ । ଇତିମଧ୍ୟରେ ରାଜ୍ୟ ନିର୍ବାଚନ ପ୍ରଭାରୀ ବିଜୟପାଲ ସିଂ ତୋମାରଙ୍କ ସହ ହେମନ୍ତ ଦୁଇଥର ଓଡ଼ିଶାର ସ୍ଥିତି ନେଇ ବୈଠକ କରି ସାରିଛନ୍ତି । ବିଜେଡି ବିରୋଧରେ କ’ଣ ସବୁ ଅସନ୍ତୋଷ ରହିଛି ତା’କୁ ସେ ଅନୁଧ୍ୟାନ କରି ତୋମାରଙ୍କୁ କିଛି ଟିପସ୍ ଦେଇଛନ୍ତି ।
ଶାହ ଆସି ବିଜେଡି ସରକାରକୁ କାଠଗଡ଼ାରେ ଛିଡ଼ା କରାଇ ଜୋରଦାର ଆକ୍ରମଣ କରିଛନ୍ତି । ଶାହଙ୍କ ଗସ୍ତ ବିଜେପି ଶିବିରରେ ବଳ ଭରିଛି । ଦଳ ସ୍ଥିର କରିଛି ଆସନ୍ତା ସପ୍ତାହ ବେଳକୁ ୩୦ କେନ୍ଦ୍ରୀୟ ନେତାଙ୍କୁ ଦଳ ୩୦ ଜିଲ୍ଲା ଦାୟିତ୍ୱ ଦେବ । ଯେଉଁ ନେତାମାନଙ୍କର ନିର୍ବାଚନ ପରିଚାଳନା ଅଭିଜ୍ଞତା ରହିଛି ସେଭଳି ନେତାଙ୍କୁ ଚୟନ କରି ଦଳ ଓଡ଼ିଶା ପଠାଇବ । ସେମାନେ ଜିଲ୍ଲାୱାରୀ ଡେରା ପକାଇବେ । ଭୋଟ ପରିଚାଳନାରେ ରିମୋଟ୍ ଧରିବେ ।
ଆସନ୍ତାକାଲି ଦଳର ରାଷ୍ଟ୍ରୀୟ ସଭାପତି ଜେପି ନଡ୍ଡା ଭୋଟଭିକ୍ଷା ପାଇଁ ଆସୁଛନ୍ତି । ନଡ୍ଡା ଜନସମାବେଶ ପରେ ପ୍ରଥମ ଦଫାରେ ହେବାକୁ ଥିବା ୪ ଲୋକସଭା ଓ ବିଧାନସଭା ପ୍ରାର୍ଥୀ ଏବଂ ପଦାଧିକାରୀଙ୍କୁ ଭେଟି ମନ୍ତ୍ର ଦେବେ । ମନୋବଳ ବଢ଼ାଇବାର କାର୍ଯ୍ୟସୂଚୀ ସ୍ଥିର ହୋଇଛି । ଆଗକୁ ପ୍ରଧାନମନ୍ତ୍ରୀ ମୋଦି ପ୍ରଚାରରେ ଆସିବା ପରେ ପଦ୍ମ ଦଳ ଅଧିକ ଆକ୍ରମଣାତ୍ମକ ଢଙ୍ଗରେ ବିଜେଡିର ମୁଖା ଖୋଲିବାକୁ ନିଷ୍ପତ୍ତି ନେଇଛି ।
ବିଜେପି ହାଇକମାଣ୍ଡଙ୍କ ହିସାବ କହୁଛି, ଆଗରୁ ପ୍ରତି ବୁଥ୍ରେ ୫୦% ଭୋଟ ଅଭିଯାନ ଦଳ ଆରମ୍ଭ କରିଛି । ଓଡ଼ିଶାରେ ଶାସନ ଡୋରି ଧରିବାକୁ ଦଳକୁ ୪୧/୪୨ ପ୍ରତିଶତ ଭୋଟ ଆବଶ୍ୟକ । ୨୦୧୯ରେ ଦଳକୁ ୩୨% ଭୋଟ ମିଳିଥିଲା । ୨୦୧୪ ତୁଳନାରେ ୧୪% ଅଧିକ ଭୋଟ ଦଳ ଖାତାକୁ ଆସିଥିଲା । ବିଜେଡି ବିରୋଧରେ ପ୍ରବଳ ଜନ ଅସନ୍ତୋଷ ସହ ସରକାର ବିରୋଧୀ ହାୱା ବହୁଛି । ମୋଦି ଗ୍ୟାରେଣ୍ଟିକୁ ଓଡ଼ିଶାବାସୀ ପସନ୍ଦ କରୁଛନ୍ତି । ତେଣୁ ଆଉ ୯ ପ୍ରତିଶତ ଭୋଟ ହାତେଇବାକୁ ଦଳ ପାଇଁ ବଡ଼ କାମ ନୁହଁ । କେବଳ ଠିକଣା ଢଙ୍ଗରେ ଲୋକଙ୍କ ପାଖରେ ପହଞ୍ଚିବା ଓ ଭୋଟ ପରିଚାଳନା ଉପରେ ଦଳ ଫୋକସ୍ କରୁଛି ।
ରାଜ୍ୟରେ ୪ ପର୍ଯ୍ୟାୟ ଭୋଟ ହେବ । ଶେଷ ଦୁଇ ପର୍ଯ୍ୟାୟ ବେଳକୁ ବହୁ କେନ୍ଦ୍ରୀୟ ନେତାଙ୍କର ନିଜ ରାଜ୍ୟରେ ଭୋଟ ସରିଯାଇଥିବ । ଏ ଦୁଇ ପର୍ଯ୍ୟାୟରେ ୧୨ ଲୋକସଭା ସହ ୮୪ ବିଧାନସଭା ଭୋଟ ବାକି ଥିବ । ବିଜେପି କେନ୍ଦ୍ରୀୟ ନେତାଙ୍କୁ ବହୁ ସଂଖ୍ୟାରେ ଠୁଳ କରିବ । ସରକାର ବିରୋଧୀ ପ୍ରସଙ୍ଗକୁ ଧରି ଶାଣିତ ଆକ୍ରମଣ କରି ବିଜେଡି ହାତରୁ ଶାସନ ଡୋରି ଛଡ଼ାଇ ନେବାକୁ ବିଜେପି ତିଆରି କରିଛି ବ୍ଳୁପ୍ରିଣ୍ଟ ।