ନୂଆଦିଲ୍ଲୀ: ଆମେରିକାର ଅନେକ ରାଜ୍ୟରେ ଏବେ ମିଳିମିଳାର ପ୍ରକୋପ ଦେଖିବାକୁ ମିଳୁଛି । ଏଠାରେ ଏବେ ଏହି ମାମଲା ସଂଖ୍ୟା ୯୦୦ ପହଞ୍ଚିବାକୁ ବସିଲାଣି। ଆମେରିକାର ରୋଗ ନିୟନ୍ତ୍ରଣ ଏବଂ ନିବାରଣ କେନ୍ଦ୍ର ଦ୍ୱାରା ଜାରି ତଥ୍ୟରେ ଏହି ସୂଚନା ଦିଆଯାଇଛି। ରୋଗ ନିୟନ୍ତ୍ରଣ କେନ୍ଦ୍ର (CDC) ଅନୁଯାୟୀ, ମିଳିମିଳା ରୋଗର ନିଶ୍ଚିତ ମାମଲା ସଂଖ୍ୟା ୮୮୪, ଯାହା ୨୦୨୪ ରେ ସଂଖ୍ୟା ଠାରୁ ତିନି ଗୁଣ।

ଟେକ୍ସାସରେ ତିନି ମାସ ଧରି ଏହି ପ୍ରକୋପ ଜାରି ରହିଛି । ସେଠାରେ ସର୍ବାଧିକ ମାମଲା ରହିଛି । ମଙ୍ଗଳବାର ସୁଦ୍ଧା ୬୬୩ ଟି ନିଶ୍ଚିତ ମାମଲା ରହିଛି। ଏହି ରୋଗ ନ୍ୟୁ ମେକ୍ସିକୋ, ଓକ୍ଲାହୋମା ଏବଂ କାନସାସକୁ ମଧ୍ୟ ବ୍ୟାପିଛି। ପଶ୍ଚିମ ଟେକ୍ସାସରେ ଦୁଇ ଜଣ ଟୀକା ନଥିବା ଶିଶୁ ମଧ୍ୟ ଏହି ସମ୍ବନ୍ଧୀୟ ରୋଗରେ ମୃତ୍ୟୁବରଣ କରିଛନ୍ତି।

ନ୍ୟୁ ମେକ୍ସିକୋରେ ଜଣେ ଟୀକା ନେଇ ନଥିବା ବ୍ୟକ୍ତିଙ୍କ ମଧ୍ୟ ମିଳିମିଳା ଜନିତ ରୋଗରେ ମୃତ୍ୟୁ ଘଟିଛି। ଇଣ୍ଡିଆନା, ମିଶିଗାନ, ମୋଣ୍ଟାନା, ଓହିଓ, ପେନସିଲଭାନିଆ ଏବଂ ଟେନେସିରେ ମଧ୍ୟ ମିଳିମିଳାର ପ୍ରକୋପ ଦେଖାଯାଉଛି। ଯେଉଁ ରାଜ୍ୟରେ ତିନି କିମ୍ବା ତା’ଠାରୁ ଅଧିକ ମିଳିମିଳା ମାମଲା ରହିଛି,ସେହି ରାଜ୍ୟ ଗୁଡ଼ିକୁ ଏହି ରୋଗର ସକ୍ରିୟ ପ୍ରକୋପ ବୋଲି ବିବେଚନା କରାଯାଉଛି ।

ମିଳିମିଳା ପ୍ରଥମେ ଶ୍ୱାସକ୍ରିୟାକୁ ସଂକ୍ରମିତ କରେ ଏବଂ ତା’ପରେ ସାରା ଶରୀରରେ ବ୍ୟାପିଯାଏ, ଯାହା ଫଳରେ ପ୍ରବଳ ଜ୍ୱର, ନାକରୁ ପାଣି ବୋହିବା,କାଶ, ଲାଲ ଏବଂ ଆଖିରେ ପାଣି ଏବଂ ଶରୀରରେ ଫୋଟକା ଦେଖାଯାଏ। ଅଧିକାଂଶ ପିଲା ମିଳିମିଳା ରୋଗରୁ ସୁସ୍ଥ ହୋଇଯାଆନ୍ତି, କିନ୍ତୁ ଏହି ସଂକ୍ରମଣ ନିମୋନିଆ, ଅନ୍ଧତ୍ୱ, ମସ୍ତିଷ୍କ ଫୁଲା ଏବଂ ମୃତ୍ୟୁ ଭଳି ଜଟିଳତା ସୃଷ୍ଟି କରିପାରେ। ମିଳିମିଳା ପାଇଁ କୌଣସି ନିର୍ଦ୍ଦିଷ୍ଟ ଚିକିତ୍ସା ନାହିଁ, ତେଣୁ ଡାକ୍ତର ମାନେ ସାଧାରଣତଃ ଲକ୍ଷଣ ଗୁଡ଼ିକୁ ଦୂର କରିବାକୁ, ଅବସ୍ଥାକୁ ଆହୁରି ଖରାପ ହେବାରୁ ରୋକିବାକୁ ଏବଂ ରୋଗୀକୁ ଆରାମଦାୟକ ରଖିବାକୁ ଚେଷ୍ଟା କରନ୍ତି।