ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ପାହାଲଗାମରେ ମଙ୍ଗଳବାର ଦିନ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ୨୬ ଜଣଙ୍କର ମୃତ୍ୟୁ ହୋଇଛି ଏବଂ ଅନେକ ଆହତ ହୋଇଛନ୍ତି। ଏହି ଆକ୍ରମଣ ପାକିସ୍ତାନ ସେନା ମୁଖ୍ୟ ଜେନେରାଲ ଆସିମ ମୁନିରଙ୍କର କାଶ୍ମୀରକୁ ନେଇ ଆସିଥିବା ବୟାନ ପରେ ସଂଗଠିତ ହୋଇଛି। ଯେଉଁଥିରେ ସେ କାଶ୍ମୀରକୁ ପାକିସ୍ତାନର “ଅବିଚ୍ଛେଦ୍ୟ ଆଙ୍ଗ” ବୋଲି ଅଭିହିତ କରିଥିଲେ। ଏହି ଘଟଣାକୁ ନେଇ ଭାରତର ବିଭିନ୍ନ ସାମାଜିକ ଗଣମାଧ୍ୟମରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଅନେକେ ଏହାକୁ ପାକିସ୍ତାନ ପୃଷ୍ଠପୋଷିତ ଆତଙ୍କବାଦ ସହ ଯୋଡ଼ିଛନ୍ତି।

ଘଟଣାର ବିବରଣୀ

ପାହାଲଗାମର ବାଇସାରଣ ମେଡୋରେ, ଯାହାକୁ କାଶ୍ମୀରର ‘ମିନି ସ୍ୱିଜରଲ୍ୟାଣ୍ଡ’ ଭାବେ କୁହାଯାଏ, ସେଠାରେ ମଙ୍ଗଳବାର ଦିନ ପ୍ରାୟ ୨:୩୦ ସମୟରେ ଆତଙ୍କବାଦୀମାନେ ପର୍ଯ୍ୟଟକମାନଙ୍କ ଉପରେ ଅତର୍କିତ ଗୁଳିଚାଳନା କରିଥିଲେ। ଏହି ଅଞ୍ଚଳଟି ପାହାଲଗାମ ପର୍ଯ୍ୟଟନ କେନ୍ଦ୍ରରୁ ପ୍ରାୟ ୫ କିଲୋମିଟର ଦୂରରେ ଅବସ୍ଥିତ। ଏହା ଏକ ପାହାଡି ଇଲାକା ହୋଇଥିବାରୁ ଏଠାରେ କେବଳ ପାଦ କିମ୍ବା ଘୋଡ଼ା ସାହାଯ୍ୟରେ ପହଞ୍ଚିବା ସମ୍ଭବ। ତେବେ ଆତଙ୍କୀମାନେ ପର୍ଯ୍ୟଟକମାନଙ୍କୁ ଅତି ନିକଟରୁ ଗୁଳି କରିଥିଲେ। ଯେଉଁଥିରେ ଅନେକ ହିନ୍ଦୁ ପର୍ଯ୍ୟଟକଙ୍କୁ ଟାର୍ଗେଟ କରାଯାଇଥିବା ଅଭିଯୋଗ ହୋଇଛି। ଏହି ହିଂସାତ୍ମକ ଆକ୍ରମଣରେ ଦୁଇ ଜଣ ବିଦେଶୀ ନାଗରିକଙ୍କ ସମେତ ୨୬ ଜଣଙ୍କର ମୃତ୍ୟୁ ହୋଇଛି। ମୃତ ପର୍ଯ୍ୟଟକମାନଙ୍କ ମଧ୍ୟରେ ଅଧିକାଂଶ ଲୋକ ମହାରାଷ୍ଟ୍ର, କର୍ଣ୍ଣାଟକ, ପଶ୍ଚିମବଙ୍ଗ, ବିହାର ଏବଂ ଅନ୍ୟାନ୍ୟ ରାଜ୍ୟରୁ ଆସିଥିଲେ ବୋଲି ଜଣାପଡିଛି।

ଏହି ଆକ୍ରମଣ ପାଇଁ ଦ ରେସିଷ୍ଟାନ୍ସ ଫ୍ରଣ୍ଟ (ଟିଆରଏଫ) ନିଜକୁ ଦାୟି କରିଛି। ଯାହା ପାକିସ୍ତାନର ଲସ୍କର-ଏ-ତୋଇବା(ଏଲଇଟି)ର ଏକ ସାଙ୍ଗଠନିକ ଶାଖା ବୋଲି ସୂଚନା ମିଳିଛି। ଟିଆରଏଫ ଦାବି କରିଛି ଯେ ୨୦୧୯ରେ କାଶ୍ମୀରରୁ ହଟିଥିବା ଆର୍ଟିକଲ ୩୭୦ ରଦ୍ଧ ହେବା ପ୍ରତିଶୋଧରେ ଏହି ଆକ୍ରମଣ କରାଯାଇଛି।

ପାକିସ୍ତାନ ସେନା ମୁଖ୍ୟଙ୍କ ବୟାନ

ଚଳିତ ବର୍ଷ ଏପ୍ରିଲ ୧୬ରେ ଇସଲାମାବାଦରେ ପାକିସ୍ତାନୀ ପ୍ରବାସୀମାନଙ୍କୁ ନେଇ ହେଉଥିବା ଓଭରସିଜ ପାକିସ୍ତାନୀଜ କନଭେନସନରେ ଜେନେରାଲ ଆସିମ ମୁନିର କାଶ୍ମୀରକୁ “ଆମ ଦେଶର ଅବିଚ୍ଛେଦ୍ୟ ଅଙ୍ଗ” ବୋଲି କହିଥିଲେ। ସେ ଉଦାହରଣ ଦେଇ କହିଛନ୍ତି ଯେ “ଆମର ଚିନ୍ତାଧାରା ସମ୍ପୂର୍ଣ୍ଣ ସ୍ପଷ୍ଟ। କାଶ୍ମୀର ଆମର ଅବିଚ୍ଛେଦ୍ୟ ଅଙ୍ଗ ଥିଲା, ଆଉ ଏହା ଆମର ଅବ୍ୟଚ୍ଛେଦ ଅଙ୍ଗ ରହିବ, ଆମେ ଏହାକୁ ଭୁଲିବୁ ନାହିଁ। ଏହା ମଧ୍ୟରେ ଯିଏ ବି ଆଲିବ ତାକୁ ବରଦାସ୍ତ କରାଯିବ ନାହିଁ। ଆମେ ଆମର କାଶ୍ମୀରୀ ଭାଇମାନଙ୍କୁ ସେମାନଙ୍କ ବୀରୋଚିତ ସଂଘର୍ଷରେ ଏକା ଛାଡ଼ିବୁ ନାହିଁ।” ଏହାସହ ସେ ଆହୁରି କହିଥିଲେ ଯେ ହିନ୍ଦୁ ଓ ମୁସଲମାନଙ୍କ ମଧ୍ୟରେ ଧର୍ମ, ପରମ୍ପରା ଓ ଚିନ୍ତାଧାରାରେ ମୌଳିକ ପାର୍ଥକ୍ୟ ରହିଛି। ଦୁଇ ଜାତି କେବେ ସମାନ ହୋଇପାରିବେ ନାହିଁ। ଆମେ ସେମାନଙ୍କ ଠୁ ବହୁ ଉନ୍ନତ। ଏ କଥା ଆମ ପୂର୍ବ ପୁରୁଷମାନେ ଜାଣିଥିଲେ। ତେଣୁ ସେମାନେ ତାଙ୍କଠୁ ଅଲଗା ହୋଇ ଆମ ପାକିସ୍ତାନର ତିଆରି କରିଥିଲେ। 

ଭାରତୀୟ ଗୁଇନ୍ଦା ଏଜେନ୍ସିଗୁଡ଼ିକ ଏହି ବୟାନକୁ ଏହି ଆକ୍ରମଣର ପ୍ରମୁଖ କାରଣ ଭାବେ ଦେଖୁଛନ୍ତି। କାରଣ ମୁନୀରଙ୍କ ଏହି ଉକ୍ତି ଆତଙ୍କବାଦୀ ସଂଗଠନଗୁଡ଼ିକୁ ଉତ୍ସାହିତ କରିଥାଇପାରେ। ଏହା ମଧ୍ୟ ଲକ୍ଷ୍ୟ କରାଯାଇଛି ଯେ ଏହି ଆକ୍ରମଣ ଆମେରିକାର ଉପ-ରାଷ୍ଟ୍ରପତି ଜେଡି ଭାନ୍ସଙ୍କ ଭାରତ ଗସ୍ତ ସମୟରେ ଘଟିଛି। ଯାହା କାଶ୍ମୀର ମୁଦ୍ଦାକୁ ଆନ୍ତର୍ଜାତୀୟ ମଞ୍ଚରେ ଉଠାଇବାର ଏକ ପ୍ରୟାସ ହୋଇପାରେ।

ଭାରତର ପ୍ରତିକ୍ରିୟା

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଉଦି ଆରବ ଗସ୍ତ ବାତିଲ କରି ଗତକାଲି ରାତିରେ ଦିଲ୍ଲୀ ଫେରିଛନ୍ତି। ସେ ଭାରତରେ ପହଞ୍ଚିବା ପରେ ଏକ ଜରୁରୀ କ୍ୟାବିନେଟ କମିଟି ଅନ ସିକ୍ୟୁରିଟି(ସିସିଏସ)ର ବୈଠକ ଡକାଇଛନ୍ତି। ଗୃହମନ୍ତ୍ରୀ ଅମିତ ଶାହ ଶ୍ରୀନଗର ଗସ୍ତ କରି ସୁରକ୍ଷା ସ୍ଥିତିର ସମୀକ୍ଷା କରିଛନ୍ତି। ମୋଦୀ ଏକ୍ସରେ ପୋଷ୍ଟ କରି କହିଛନ୍ତି ଯେ, “ଆତଙ୍କବାଦୀମାନଙ୍କୁ କ୍ଷମା ଦିଆଯିବ ନାହିଁ। ସେମାନଙ୍କୁ ସେମାନଙ୍କ କର୍ମର ଉଚିତ ଜବାବ ଦିଆଯିବ।”

ଜମ୍ମୁ ଓ କାଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏହି ଆକ୍ରମଣକୁ “ଜଘନ୍ୟ” ବୋଲି କହି ନିନ୍ଦା କରିଛନ୍ତି। ସେ କହିଛନ୍ତି ଯେ ଏହା କାଶ୍ମୀରର ପର୍ଯ୍ୟଟନ ଓ ଶାନ୍ତି ପ୍ରତି ଏକ ବଡ ଆଘାତ। ପିଡିପି ନେତ୍ରୀ ମେହବୁବା ମୁଫତି କହିଛନ୍ତି, “ଏହା କେବଳ ଆତଙ୍କବାଦୀ ଆକ୍ରମଣ ନୁହେଁ, ଏହା ଆମର କାଶ୍ମୀରିୟତ ଓ ମାନବିକତା ଉପରେ ମଧ୍ୟ ଆକ୍ରମଣ।”

ଆକ୍ରମଣ ପରବର୍ତ୍ତୀ ପ୍ରତିରକ୍ଷା ବ୍ୟବସ୍ଥା

ସୁରକ୍ଷା ବାହିନୀମାନେ ଉକ୍ତ ଅଞ୍ଚଳକୁ ଘେରି ରହିବା ସହ ଆତଙ୍କୀମାନଙ୍କୁ ଖୋଜିବା ପାଇଁ ଅଭିଯାନ ଜାରି ରଖିଛନ୍ତି। ଗୁଇନ୍ଦା ଏଜେନ୍ସିଗୁଡ଼ିକ ଲସ୍କର-ଏ-ତୋଇବାର ଶୀର୍ଷ କମାଣ୍ଡର ସୈଫୁଲ୍ଲାହ କାସୁରୀକୁ ଏହି ଆକ୍ରମଣର ମାଷ୍ଟରମାଇଣ୍ଡ ଭାବେ ଚିହ୍ନଟ କରିଛନ୍ତି। ତିନି ଜଣ ସନ୍ଦିଗ୍ଧ ଆକ୍ରମଣକାରୀ ଙ୍କ ସ୍କେଚ ମଧ୍ୟ ଜାରି କରାଯାଇଛି। ତେବେ ଏହି ମାମଲାରେ ଅଭିଯୁକ୍ତ ଆତଙ୍କୀମାନେ ପାକିସ୍ତାନୀ ନାଗରିକ ବୋଲି ଚିହ୍ନଟ କରାଯାଇଛି। ତେବେ ଏହି ଆକ୍ରମଣର ସମ୍ଭାବିତ ଆକ୍ରମଣକାରୀଙ୍କ ଫଟୋ ମଧ୍ୟ ଜାରି କରାଯାଇଛି। 

ତେବେ ସବୁଠୁ ବଡ କଥା ହେଉଛି, ଏହି ଆକ୍ରମଣକୁ ୨୪ ଘଣ୍ଟା ନପୁରୁଣୁ ବାରାମୁଲା ଜିଲ୍ଲାରେ ହେଉଥିବା ଏକ ଆତଙ୍କା ଅନୁପ୍ରବେଶ ପ୍ରୟାସକୁ ଭାରତୀୟ ସେନା ପଣ୍ଡ କରି ଦେଇଛି। ଯେଉଁଥିରେ ଦୁଇ ଜଣ ଆତଙ୍କବାଦୀଙ୍କୁ ନିପାତ କରାଯାଇଥିବା ସୂଚନା ମିଳିଛି। ଏହି ଘଠଣା ଦେଶ ପାଇଁ ଏକ ସତ୍ତର୍କ ଘଣ୍ଟି ହୋଇଥିବା ବେଳେ ସୀମା ପାର ଆତଙ୍କବାଦୀ କାର୍ଯ୍ୟକଳାପରେ ବୃଦ୍ଧି ପରିଲକ୍ଷିତ ହେଉଛି ବୋଲି ଜଣାପଡୁଛି।

ଆନ୍ତର୍ଜାତୀୟ ପ୍ରତିକ୍ରିୟା

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ଉପ-ରାଷ୍ଟ୍ରପତି ଜେଡି ଭାନ୍ସ, ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନ, ଇଉରୋପୀୟ ସଂଘର ମୁଖ୍ୟ ଉର୍ସୁଲା ଭନ ଡେର ଲେୟେନ ଏବଂ ଜାତିସଂଘ ମହାସଚିବ ଆନ୍ତୋନିଓ ଗୁଟେରେସ ଏହି ଆକ୍ରମଣକୁ କଡା ନିନ୍ଦା କରିଛନ୍ତି। ପାକିସ୍ତାନ ସରକାର ମଧ୍ୟ ଏହି ଘଟଣାରେ ଶୋକ ପ୍ରକାଶ କରିଛନ୍ତି। କିନ୍ତୁ ଭାରତୀୟ ଅଧିକାରୀମାନେ ପାକିସ୍ତାନର ସୁରକ୍ଷା ସଂସ୍ଥାଗୁଡ଼ିକର ସମ୍ପୃକ୍ତିକୁ ନେଇ ସନ୍ଦେହ ପ୍ରକାଶ କରିଛନ୍ତି।

ପରିଣାମ ଓ ପ୍ରଭାବ

ଏହି ଆକ୍ରମଣ କାଶ୍ମୀରରେ ସାମ୍ପ୍ରତିକ ସମୟରେ ଦେଖାଦେଇଥିବା ଶାନ୍ତି ଓ ପର୍ଯ୍ୟଟନ ବୃଦ୍ଧି ଉପରେ ଏକ ବଡ଼ ଆଘାତ ସୃଷ୍ଟି କରିଛି। ବୁଧବାର ସୁଦ୍ଧା ଦେଶର ବିଭିନ୍ନ କୋଣରୁ ଆସିଥିବା ପ୍ରାୟ ୫ ହଜାରରୁ ଅଧିକ ପର୍ଯ୍ୟଟକ ସୁରକ୍ଷା କାରଣରୁ କାଶ୍ମୀର ଛାଡିସାରିଥିବା ଜମାପଡିଛି। ସୂଚନା ମୁତାବକ ୨୦୨୪ରେ ପ୍ରାୟ ୩୫ ଲକ୍ଷ ପର୍ଯ୍ୟଟକ କାଶ୍ମୀର ଗସ୍ତ କରିଥିଲେ। ଯାହା କାଶ୍ମୀରରେ ସ୍ଥିରତା ଓ ଶାନ୍ତିର ସୂଚନା ପ୍ରଦାନ କରିଥିଲା। କିନ୍ତୁ ଏହି ଘଟଣା ପରେ ପର୍ଯ୍ୟଟକମାନେ ଭୟଭୀତ ହୋଇ ଘରକୁ ଫେରିଯାଉଥିବା ଦେଖାଯାଇଛି। ଏହି ଭିଡକୁ ନଜରରେ ରଖି ଶ୍ରୀନଗର ବିମାନବନ୍ଦରରୁ ଅତିରିକ୍ତ ବିମାନ ସେବା ଆରମ୍ଭ କରାଯାଇଛି।

ଜମ୍ମୁ ଓ କାଶ୍ମୀରରେ ବିଭିନ୍ନ ସଂଗଠନ ଦ୍ୱାରା ରାଜ୍ୟବନ୍ଦ ଡ଼କରା ଦିଆଯାଇଛି। ଏହାସହ ସ୍ଥାନୀୟ ଲୋକେ ରାସ୍ତାକୁ ଓହ୍ଲାଇ ଏହି ଆକ୍ରମଣର ବିରୋଧ କରିଛନ୍ତି। ସରକାର ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କାର ଅନୁକମ୍ପା ରାଶି, ଗୁରୁତର ଆହତଙ୍କୁ ୨ ଲକ୍ଷ ଏବଂ ଆହତଙ୍କୁ ୧ ଲକ୍ଷ ଟଙ୍କାର ସହାୟତା ରାଶି ଘୋଷଣା କରିଛନ୍ତି।