ଦୁବାଇ, ୧୧/୦୯: ଆସନ୍ତା ୧୪ ତାରିଖରେ ଏସିଆ କପ୍ରେ ସବୁଠୁ ବଡ଼ ମ୍ୟାଚ୍ ଖେଳାଯିବ । ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ମୁହାଁମୁହିଁ ହେବେ । କିନ୍ତୁ ଏହି ମ୍ୟାଚର ଟିକେଟ୍ ଏ ପର୍ଯ୍ୟନ୍ତ ବିକ୍ରି ଶେଷ ହୋଇନଥିବା ଜାଣିବାକୁ ମିଳିଛି ।
ପହଲଗାମ ଆକ୍ରମଣ ପରେ ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପ୍ରଥମ ଥର କ୍ରିକେଟ୍ ମଇଦାନରେ ଲଢ଼େଇ କରିବାକୁ ଯାଉଛନ୍ତି । ମ୍ୟାଚ୍କୁ ନେଇ ଯେଉଁ ଉତ୍କଣ୍ଠା ରହିବା କଥା, ତାହା ନାହିଁ । ଫଳରେ ସବୁ ଟିକେଟ୍ ଏ ପର୍ଯ୍ୟନ୍ତ ବିକ୍ରି ହୋଇପାରି ନାହିଁ । ଭିଆଇପି ଇଷ୍ଟ ଟିକେଟ୍ ୨ଟିକୁ ୨,୫୭,୮୧୫ ଟଙ୍କା, ରୟାଲ ବକ୍ସ ୨ଟିକୁ ୨,୩୦, ୭୦୦ ଟଙ୍କା ଏବଂ ସ୍କାଏ ବକ୍ସ ଇଷ୍ଟ ୨ଟି ଟିକେଟ୍ ମୂଲ୍ୟ ୧,୬୭,୮୫୧ ଟଙ୍କା ରଖାଯାଇଛି । ସବୁଠୁ କମ୍ ଟିକେଟ୍ ମୂଲ୍ୟ ୫ ହଜାର ଟଙ୍କା ରଖାଯାଇଛି ।
ଗତ ଏପ୍ରିଲ ୨୨ ତାରିଖରେ ପହଲଗାମରେ ସାଧାରଣ ପର୍ଯ୍ୟଟକଙ୍କ ଉପରେ ଆତଙ୍କାବାଦୀ ଆକ୍ରମଣ କରିଥିଲେ । ଏଥିରେ ୨୬ ଜଣଙ୍କର ମୃତ୍ୟୁ ହୋଇଥିଲା । ଏହାର ପ୍ରତିଶୋଧ ସ୍ୱରୂପ ଭାରତ ‘ଅପରେସନ୍ ସିନ୍ଦୂର’ ଆରମ୍ଭ କରିଥିଲା । ପାକିସ୍ତାନ ଦ୍ୱାରା ପ୍ରୋତ୍ସାହିତ ଆତଙ୍କବାଦୀଙ୍କ ଶିବିର ଉପରେ ଭାରତ ଆକ୍ରମଣ କରିଥିଲା ଏବଂ ଏଥିରେ ୧୦୦ରୁ ଊଦ୍ଧ୍ୱର୍ ଆତଙ୍କୀ ନିହତ ହୋଇଥିଲେ । ଏହାକୁ ନେଇ ସୀମାରେ ତୀବ୍ର ଉତ୍ତେଜନା ସୃଷ୍ଟି ହୋଇଥିଲା । ଏଭଳି ସମୟରେ ଦୁଇ ଦେଶ ମଧ୍ୟରେ କ୍ରୀଡ଼ା ସଂପର୍କକୁ ନେଇ ବିସିସିଆଇ ଅନାଗ୍ରହ ପ୍ରକାଶ କରିଥିଲା । ତେଣୁ ଏଥର ଏସିଆ କପ୍ ଖେଳାଯିବ କି ନାହିଁ ସେନେଇ ଆଶଙ୍କା ରହିଥିଲା । କିନ୍ତୁ କ୍ରୀଡ଼ା ମନ୍ତ୍ରଣାଳୟର ଅନୁମତି ପରେ ଭାରତ ଏସିଆ କପ୍ରେ ଭାଗ ନେଇଥିଲା।
