ନୂଆଦିଲ୍ଲୀ ୧୦/୦୩: ଅଷ୍ଟ୍ରେଲିଆର ଗବେଷକମାନେ ପାରମ୍ପରିକ ପ୍ଲାଷ୍ଟିକ୍ର ଏକ ଆଶ୍ଚର୍ଯ୍ୟଚକିତ ବିକଳ୍ପ ପ୍ରସ୍ତୁତ କରିଛନ୍ତି । ଏହା ଏକ ଜୈବ ବିଘଟନ ଯୋଗ୍ୟ ପ୍ୟାକେଜିଂ ଉପକରଣ, ଯାହା ଆଂଶିକ ରୂପେ ଦୁଗ୍ଧ ପ୍ରୋଟିନରୁ ପ୍ରସ୍ତୁତ ହୋଇଛି । ମାତ୍ର ୧୩ ସପ୍ତାହ ମଧ୍ୟରେ ଏହା ସମ୍ପୂର୍ଣ୍ଣ ରୂପେ ମାଟିରେ ମିଳାଇଯିବ । ସିଙ୍ଗଲ-ୟୁଜ୍ ପ୍ଲାଷ୍ଟିକ୍ ଯୋଗୁ ହେଉଥିବା ପ୍ରଦୂଷଣ ହ୍ରାସ ନିମନ୍ତେ ନୂଆ ଉପକରଣ ଅନ୍ୱେଷଣ ମାଧ୍ୟମରେ ଦକ୍ଷିଣ ଅଷ୍ଟ୍ରେଲିଆ ଫ୍ଲିଣ୍ଡର୍ସ ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏହି ଅନନ୍ୟ ଉଦ୍ଭାବନ କରିଛନ୍ତି । ବୈଜ୍ଞାନିକ ପତ୍ରିକା ପଲିମର୍ସରେ ଅଧ୍ୟୟନ ପ୍ରକାଶ ପାଇଛି ।
ଗବେଷକମାନେ ଦୁଗ୍ଧରୁ ପ୍ରାପ୍ତ କ୍ୟାଲସିୟମ୍ କ୍ୟାସିନେଟ୍ ନାମକ ପ୍ରୋଟିନ ପ୍ରୟୋଗରେ ଏକ ପତଳା, ନମନୀୟ ଝିଲ୍ଲି ପ୍ରସ୍ତୁତ କଲେ । ଏହାକୁ ସଂଶୋଧିତ ମଣ୍ଡ ଓ ବେଣ୍ଟୋନାଇଟ୍ ନାନୋକ୍ଲେ ନାମକ ଏକ ପ୍ରାକୃତିକ ମାଟି ସହିତ ମିଶାଗଲା । ଏହାର ନମନୀୟତା ଓ ସ୍ଥାୟୀତ୍ୱ ବଢ଼ାଇବା ପାଇଁ ଗ୍ଲିସେରଲ୍ ଓ ପଲିଭିନାଇଲ ଆଲ୍କୋହଲ ଭଳି ଉପାଦାନ ବ୍ୟବହୃତ ହେଲା । ସେମାନଙ୍କ ଉଦ୍ଦେଶ୍ୟ ଥିଲା ଏକ ପ୍ୟାକେଜିଂ ଝିଲ୍ଲି ପ୍ରସ୍ତୁତ କରିବା, ଯାହା ସାଧାରଣ ପ୍ଲାଷ୍ଟିକ୍ ଭଳି କାମ କରିବ କିନ୍ତୁ ପରିବେଶ ପାଇଁ ସୁରକ୍ଷିତ ହେବ ।
ପ୍ରୟୋଗଶାଳାରେ ପରୀକ୍ଷାରୁ ଜଣାପଡ଼ିଲା, ଏହି ଝିଲ୍ଲି ଧୀରେ ଧୀରେ ମାଟିରେ ବିଘଟିତ ହେଉଛି ଏବଂ ପ୍ରାୟ ୧୩ ସପ୍ତାହରେ ସମ୍ପୂର୍ଣ୍ଣ ନଷ୍ଟ ହୋଇଯାଉଛି । ଉପକରଣଟି ସୁରକ୍ଷିତ କି ନୁହେଁ, ବୈଜ୍ଞାନିକମାନେ ତାହା ବି ପରୀକ୍ଷା କଲେ । ଅଣୁଜୀବ ପରୀକ୍ଷାରୁ ଜଣାପଡ଼ିଲା, ଜୈବବିଘଟନଯୋଗ୍ୟ ଉପକରଣ ନିମନ୍ତେ ଜୀବାଣୁ ବୃଦ୍ଧି ସ୍ତର ଗ୍ରହଣଯୋଗ୍ୟ ସୀମାରେ ରହିଥିଲା । ଅଧ୍ୟୟନକର୍ତ୍ତାଙ୍କ ଅନୁସାରେ, ଏହି ଉପାଦାନ ଖାସ୍କରି ଖାଦ୍ୟ ଉଦ୍ୟୋଗରେ କିଛି ପ୍ରକାର ଏକକ-ବ୍ୟବହୃତ ପ୍ଲାଷ୍ଟିକ୍ ପ୍ୟାକେଜିଂ ଉତ୍ପାଦର ସ୍ଥାନ ନେଇପାରିବ । ପ୍ରଫେସର ୟୁହଙ୍ଗ ଟାଙ୍ଗ୍ କହିଛନ୍ତି, ଖାଦ୍ୟ ପ୍ୟାକେଜିଂରେ ବ୍ୟବହାର ପୂର୍ବରୁ ଏହାର ପୁନଃ ଜୀବାଣୁରୋଧୀ ପରୀକ୍ଷଣ ଆବଶ୍ୟକ ହେବ ।
ବିଶ୍ୱସ୍ତରରେ ପ୍ଲାଷ୍ଟିକ୍ ପ୍ରଦୂଷଣ ଦ୍ରୁତ ବୃଦ୍ଧି ପାଉଥିବାରୁ ଜୈବବିଘଟନଯୋଗ୍ୟ ପ୍ଲାଷ୍ଟିକ୍ ନିମନ୍ତେ ଅଧ୍ୟୟନ ଅତ୍ୟନ୍ତ ଜରୁରି ବୋଲି ବୈଜ୍ଞାନିକମାନେ କହନ୍ତି । ବର୍ତ୍ତମାନର ଧାରା ଜାରି ରହିଲେ, ୨୦୪୦ ମସିହା ମଧ୍ୟରେ ବିଶ୍ୱସ୍ତରରେ ପ୍ଲାଷ୍ଟିକ୍ ପ୍ରଦୂଷଣ ସ୍ତର ୭୦ ପ୍ରତିଶତ ବୃଦ୍ଧି ପାଇବ ବୋଲି ଅର୍ଗାନାଇଜେସନ୍ ଫର ଇକୋନୋମିକ୍ କୋ-ଅପରେସନ୍ ଆଣ୍ଡ ଡେଭ୍ଲପମେଣ୍ଟ ଚେତାବନୀ ଦେଇଛି ।
ଅଧିକ ପଢ଼ନ୍ତୁ :- ଘର ପାଇଁ ଉପଯୁକ୍ତ ଜମି କେଉଁଟି ? ଜାଣିବେ କିପରି, ଟିକେ ଭୁଲ ହେଲେ ପଡ଼ିବ କୁପ୍ରଭାବ....
