ଭୁବନେଶ୍ୱର,୧୯/୧୧: ଯାହା ଅଭିଯୋଗ ଉଠିଥିଲା, ସତ ହେଲା । ପାଖାପାଖି ୧୪୦ ଡିସିମିଲ ସରକାରୀ ଜାଗା ମାଡି ବସି ଛିଡ଼ା ହୋଇଛି ଶ୍ରୀ ବୈକୁଣ୍ଠ ଧାମ ଆଶ୍ରମ । ପାଖାପାଖି ୮ କୋଟି ଟଙ୍କା ମୂଲ୍ୟର ଜମିରେ ଗଢ଼ାଯାଇଛି ବେଆଇନ୍ ମଣ୍ଡପ, କୋଠା ଆଉ ରୋଷଶାଳା । ସରକାରୀ ଜାଗାକୁ କବ୍ଜା କରି ଧର୍ମ ନାଁରେ ଭାଣ୍ଡାମୀ ଚାଲିଛି ।
ସାଧାରଣ ପ୍ରଶାସନ ବିଭାଗ, ବିଡିଏ ଓ ଭୁବନେଶ୍ୱର ତହସିଲର ମିଳିତ ଯାଞ୍ଚ ପରେ ଏଭଳି ସାଂଘାତିକ ତଥ୍ୟ ସାମ୍ନାକୁ ଆସିଛି । ସୋମବାର ପୂର୍ବାହ୍ଣରେ ସାଧାରଣ ପ୍ରଶାସନ ବିଭାଗର ସହ-ନିର୍ଦ୍ଦେଶକ ଅମୀୟ ଦାସଙ୍କ ନେତୃତ୍ୱରେ ଏକ ୮ ଜଣିଆ ମିଳିତ ଟିମ୍ ଘଟଣାସ୍ଥଳକୁ ଯାଇଥିଲା । ଜୟଦେବ ବାଟିକା-ମଣିପାଲ ହସ୍ପିଟାଲ ରାସ୍ତାକଡ଼ରୁ ମାପଚୁପ ଆରମ୍ଭ ହୋଇଥିଲା । ପାଖାପାଖି ୨ ଘଣ୍ଟାର ମାପଚୁପ ପରେ ସ୍ୱତନ୍ତ୍ର ମିଳିତ ଦଳ ଆଶ୍ରମ ଛାଡିଥିଲା ।
ବିଭାଗୀୟ ଅତିରିକ୍ତ ସଚିବ ମାନସ ରଞ୍ଜନ ସାମଲ କହିଛନ୍ତି, ଘାଟିକିଆ ମୌଜାର ଖାତା ନଂ ୨୩୩୯ (ଜିଏଡି)ର ପ୍ଲଟ୍ ନଂ ୯୦୩୭ ଓ ୯୦୩୮ ‘ପତିତ’ କିସମର ଜମି ଉପରେ ଏହି ଆଶ୍ରମ ଗଢ଼ାଯାଇଛି । ଆଶ୍ରମଟି ୧୪୦ ଡିସିମିଲ୍ ଯାଏଁ ବ୍ୟାପିଛି । ଜୟଦେବ ବାଟିକା ସାମ୍ନା ବିସ୍ତୀର୍ଣ୍ଣ ‘ପତିତ’ କିସମ ଜାଗା ସାଧାରଣ ପ୍ରଶାସନ ବିଭାଗ ଅଧୀନରେ ଥିଲା । କିନ୍ତୁ ୨୦୧୫ ମସିହାରେ ବସ୍ତି ପୁନଃ ଉନ୍ନୟନ ଉଦ୍ଦେଶ୍ୟରେ ଘାଟିକିଆ ମୌଜାର ୨୨ ଏକର ଜାଗ ବିଡିଏକୁ ହସ୍ତାନ୍ତର କରାଯାଇଥିଲା । ଏହି ଯୋଜନାରେ ଆଶ୍ରମର ୧୪୦ ଡିସିମିଲ ଜାଗା ମଧ୍ୟ ଆସୁଛି । ସରଜମିନ୍ ଯାଞ୍ଚ ପରେ ଆଶ୍ରମକୁ ଭାଙ୍ଗିବାକୁ ବିଡିଏକୁ ଚିଠି କରାଯାଇଛି । ସେପଟେ ଆଇନ୍ ମୁତାବକ ଆଶ୍ରମକୁ ଭାଙ୍ଗିବା ପାଇଁ ପ୍ରକ୍ରିୟା ଆରମ୍ଭ ହେବ ବୋଲି ବିଡିଏ ସୂଚନା ଦେଇଛି ।
ଆଶ୍ରମର ବାବା ପଣ୍ଡିତ କାଶୀନାଥ ମିଶ୍ର ଓ ତାଙ୍କ ପୁଅ କିଛି ଦିନ ପୂର୍ବରୁ ଉଭାନ ହୋଇ ଯାଇଥିଲେ । କିନ୍ତୁ ଭକ୍ତମାନେ ଆଶ୍ରମରେ ଟହଲ ମାରୁଥିଲେ । ବେଆଇନ ସରକାରୀ ଜମିରେ ଆଶ୍ରମ ଚାଲୁଥିବା ଜାଣିବା ପରେ ସ୍ଥାନୀୟ ବାସିନ୍ଦା ଗତକାଲି ଆଶ୍ରମରେ ଧସେଇ ପଶିଥିଲେ। ଭକ୍ତମାନେ ମନଇଚ୍ଛା ଗାଳିଗୁଲଜ କରିଥିଲେ । ଆଜିର ଚିତ୍ର ସମ୍ପୂର୍ଣ୍ଣ ଅଲଗା ଥିଲା । ଆଶ୍ରମରେ ଜଣେ ବି ଭକ୍ତଙ୍କ ଦେଖା ମିଳିନଥିଲା । ଅଧିକାଂଶ କୋଠରୀରେ ତାଲା ଝୁଲିଥିଲା । ଏମିତିକି ଟ୍ରଷ୍ଟି ସଭାପତି ପାଣ୍ଡବ କୁମାର ପରିଡ଼ା ମଧ୍ୟ ନଥିଲେ । ଜଣେ ସବ୍ଇନ୍ସପେକ୍ଟରଙ୍କ ନେତୃତ୍ୱରେ ୨ ସେକ୍ସନ ପୁଲିସ ବାହିନୀ ଆଶ୍ରମକୁ ଜଗି ରହିଛନ୍ତି ।
ସେପଟେ ଆଶ୍ରମର ବାବାଙ୍କ ଗୁମର ଧୀରେ ଧୀରେ ଖୋଲିବାରେ ଲାଗିଛି । କୋଳଥିଆ ଅଞ୍ଚଳର ଜଣେ ଇଞ୍ଜିନିୟରିଂ ଛାତ୍ରୀ ତାନଭି କହିଛନ୍ତି ଯେ ଘରୋଇ ସମସ୍ୟା ଯୋଗୁ କିଛି ମାସ ତଳେ ସେ ବାପା-ମାଆଙ୍କ ସହ ଆଶ୍ରମ ଯାଇଥିଲେ । ସେତେବେଳେ ସେ କୁନି ସାରଥୀ ବାବାଙ୍କୁ ଅତି ପାଖରୁ ଦେଖିଥିଲେ । ତାଙ୍କ ବୟସ ୧୮ରୁ ଅଧିକ ବର୍ଷ ହେବ । ସେ ବେକରେ ଫୁଲ ମାଳ ପକାଇଥିଲେ । ଧୋତି ବି ପିନ୍ଧିଥିଲେ । ଆଉ ତାଙ୍କ ସାମ୍ନାରେ ଶତାଧିକ ଭକ୍ତ ବସି ଭଜନ କୀର୍ତ୍ତନ କରୁଥିଲେ । ବାବା ଗୋଟି ଗୋଟି କରି ସମସ୍ୟା ଶୁଣୁଥିଲେ । ପିଲା ଛୁଆ ହେଉନଥିବା କିଛି ମହିଳା ମଧ୍ୟ ବାବାଙ୍କ ଶରଣ ନେଇଥିଲେ । ଲକ୍ଷାଧିକ ଟଙ୍କା ବଦଳରେ ବାବା ଓ ଆଶ୍ରମର ସଦସ୍ୟମାନେ ଭକ୍ତମାନଙ୍କୁ କିଛି ଚେର ମୂଳି ଧରାଉଥିଲେ । ଏମିତିକି କିଛି ବିଦେଶୀ ଭକ୍ତ ମଧ୍ୟ ଆଶ୍ରମରେ ଥିଲେ । ପରେ କିଛି ସହପାଠୀଙ୍କ ଜରିଆରେ ତାନ୍ଭି ଜାଣିବାକୁ ପାଇଲେ, କୁନି ସାରଥୀ ବାବା କୁଆଡ଼େ କେଟିଏମ୍ ବାଇକରେ ଯୁବତୀମାନଙ୍କୁ ବୁଲାଉଛନ୍ତି । ନାମୀ କାଫେ ଓ କ୍ଲବ୍ରେ ତାଙ୍କର ଅଧିକାଂଶ ସମୟ ବିତୁଛି । ଏହାପରେ ସେ ଆଶ୍ରମ ଯିବା ବନ୍ଦ କରିଦେଇଛନ୍ତି ।
ଧର୍ମ ନାଁରେ ଆଶ୍ରମରେ ଭାଣ୍ଡାମୀ ଅଭିଯୋଗ ଆଣି ନିଖିଳ ଓଡି଼ଶା ସ୍ୱେଚ୍ଛାସେବୀ ମହାସଂଘର ସଦସ୍ୟମାନେ ସୋମବାର ଆଶ୍ରମରେ ହଙ୍ଗାମା କରିଥିଲେ । ଆଶ୍ରମ ଫାଟକରେ ସେମାନେ ଗୋବର ବଦଳରେ କାଦୁଅ ଓ ପଙ୍କ ବୋଳିଥିଲେ । ମହାସଂଘ ସଭାପତି ସୁଜାତା ପଶାୟତ କହିଛନ୍ତି, ପବିତ୍ର ସ୍ଥାନରେ ଗୋବର ଲେପାଯାଏ । କିନ୍ତୁ ଏଠି ଧର୍ମ ଓ ପ୍ରବଚନ ନାଁରେ ରିତିମତ ପ୍ରହସନ ଚାଲିଥିଲା । ହିନ୍ଦୁ ଧର୍ମ ପ୍ରତି ଏଭଳି କୁତ୍ସିତ ବ୍ୟବହାର ଆମେ ଆଦୌ ସହିବୁନି । ଆଗାମୀ ଦିନରେ ଆଶ୍ରମକୁ ଭଙ୍ଗା ନଗଲେ, ଅନିର୍ଦ୍ଦିଷ୍ଟ କାଳ ଯାଏଁ ଧାରଣାରେ ବସିବୁ ।
