ଭୁବନେଶ୍ୱର ୧୩/୦୨: ଗଜା ବୁଟ, ମୁଗ, ଗହମ, ଆଲଫାଲଫା ଭଳି ପ୍ରତ୍ୟେକ ଶସ୍ୟ ବା ଗଜା ହେଉଥିବା ମଞ୍ଜିର ଖାଦ୍ୟ ସ୍ୱାସ୍ଥ୍ୟ ପାଇଁ ଅତି ଉପାଦେୟ । ଚିରାଚରିତ ଉପାୟରେ ଗଜା କରିବା ନିମନ୍ତେ ଏସବୁକୁ ଆଠରୁ ୧୦ ଘଣ୍ଟା ପାଣିରେ ବତୁରାଇ ଖଣ୍ଡେ ଓଦା କନାରେ ବାନ୍ଧି ଟାଙ୍ଗି ଦେବେ । ଦିନରେ ଦୁଇ ଥର ଏହାକୁ ଓଦା କରିବା ଦରକାର । ଦୁଇ ଦିନରେ ବଡ଼ ବଡ଼ ଗଜା ବାହାରିବ । ଗଜା ଯେତେ ବଡ଼ ହେବ ତାର ଉପକାରିତା ସେତେ ଅଧିକ । ଆଜିକାଲି ଗଜା କରିବା ପାତ୍ର ମଧ୍ୟ ବ୍ୟବହାର କରାଯାଉଛି ।
ଗଜା ହୋଇଥିବା ଖାଦ୍ୟ ଶସ୍ୟରେ ଜୀବସାର ଓ ପୁଷ୍ଟିସାରଗୁଡ଼ିକ ବହୁ ଗୁଣରେ ବୃଦ୍ଧି ହୋଇଥାଏ (ପ୍ରୋଟିନ୍ ପ୍ରାୟ ୩୦% ବଢ଼ିଥାଏ) ଏବଂ ଶ୍ୱେତସାର ପରିମାଣ କମ୍ ହୋଇଥାଏ ।
ଶରୀରକୁ ପତଳା କରିବା ଓ ଚର୍ବି କମାଇବା ନିମନ୍ତେ ଏହା ହେଉଛି ମ୍ୟାଜିକ୍ ଖାଦ୍ୟ । ଗଜା ଖାଦ୍ୟରେ ହଜମ କରୁଥିବା ଏନ୍ଜାଇମଗୁଡ଼ିକ ରହୁଥିବାରୁ ଏହାକୁ ହଜମ କରିବା ଅତି ସହଜ ।
ବୈଜ୍ଞାନିକମାନଙ୍କ ମତରେ ଗଜା ଖାଦ୍ୟରେ ଥିବା ଜୀବନୀ ଶକ୍ତି ଶରୀରକୁ ସବୁଦିଗରୁ ସୁସ୍ଥ ଓ କାର୍ଯ୍ୟକ୍ଷମ କରାଇଥାଏ ।
କିଛି ଲୋକ ଗଜା ଖାଦ୍ୟ ଖାଇଲେ ତରଳ ଝାଡ଼ା ହୁଏ ଏବଂ ଗଜା ଖାଦ୍ୟ ଗରିଷ୍ଠ ବା ହଜମ କରିବା କଷ୍ଟକର ବୋଲି କହିଥାଆନ୍ତି । ଏହା ସମ୍ପୂର୍ଣ୍ଣ ଭୁଲ ଧାରଣା। ଅବଶ୍ୟ ଗଜା କରିବା ବେଳେ ବ୍ୟବହୃତ ପାଣି ଓ କପଡ଼ାରେ ଥିବା ଜୀବାଣୁ, ଭୂତାଣୁମାନେ ବେଳେବେଳେ ତରଳ ଝାଡ଼ାର କାରଣ ହୋଇଥାଆନ୍ତି । ଏଥିରୁ ବଞ୍ଚିବା ନିମନ୍ତେ ଗଜା ଖାଇବା ପୂର୍ବରୁ ଏହାକୁ ଗରମ ପାଣିରେ ପକାଇ ଧୋଇ ଦିଅନ୍ତୁ । ଫଳରେ ଜୀବାଣୁ ମରିଯିବେ ଏବଂ ମଇଳା ମଧ୍ୟ ଧୋଇ ହୋଇଯିବ ।
ଏହାଛଡ଼ା ଗଜା ମୁଗ ବା ବୁଟରେ କାକୁଡ଼ି, ଗାଜର, ବିଟ୍, ମୂଳା, ପିଆଜ ଷଣ୍ଢା, ବ୍ରୋକୋଲି, ଟମାଟୋ, ପିଆଜ, କଞ୍ଚାଲଙ୍କା, ଧନିଆପତ୍ରକୁ ଛୋଟ ଛୋଟ କରି କାଟି ସେଥିରେ ଲେମ୍ବୁ ଓ ଅଳ୍ପ କଳା ଲୁଣ ଦେଇ ଖାଇପାରିବେ । ଏଥିରେ ମଧ୍ୟ ସିଝା ମଟର, ବୁଟ, ସିଝା ଚିନାବାଦାମ ମଞ୍ଜି ପକାଇ ପାରିବେ । ଅଳ୍ପ ଅଦା, ଦହି ଦେଲେ ଆହୁରି ସ୍ୱାଦିଷ୍ଟ ହୋଇପାରିବ । ଏହା ଦିନରେ ଦୁଇ ତିନି ଥର ଖାଆନ୍ତୁ । ଏହା ଅତ୍ୟନ୍ତ ପୁଷ୍ଟିକାରକ, ଚର୍ବିନାଶକ ଏବଂ ଜୀବନୀଶକ୍ତି ପ୍ରଦାନକାରୀ ଖାଦ୍ୟ । ୩ ମାସ ଏହି ଖାଦ୍ୟ କେବଳ ଖାଇ ଦେଖନ୍ତୁ ଆପଣ ୧୦ କିଲୋ ଚର୍ବି ହ୍ରାସ କରିପାରିବେ ।
ଡ. ହରି ପ୍ରସାଦ ପଟ୍ଟନାୟକ
