ଭୁବନେଶ୍ୱର,୦୧/୦୨: ସହି ପାରିଲେନି ବିଜନେସ୍ ଲସ୍ । ବିଜନେସ୍ ଲସ୍ ଓ ଋଣ ବୋଝର ମାନସିକ ଚାପ ସହି ନପାରି ଶେଷରେ ଝୁଲି ପଡ଼ିଲେ ବିଲଡର୍ । ବିଲଡର୍ ଜଣକ ହେଲେ ବିନାୟକ ଡେଭଲପର୍ ସଂସ୍ଥାର ମାଲିକ ଜିତେନ୍ଦ୍ର ନାୟକ । ତାଙ୍କ ମୃତଦେହ ଚନ୍ଦ୍ରଶେଖରପୁର ସ୍ଥିତ ତନିସ୍କ ସୋ ରୁମ୍ ପଛ ପଟେ ଥିବା ଆପାର୍ଟମେଣ୍ଟରୁ ଉଦ୍ଧାର ହୋଇଛି । ଚନ୍ଦ୍ରଶେଖରପୁର ଥାନା ଅଞ୍ଚଳରେ ଏଭଳି ଅଭାବନୀୟ ଘଟଣା ଘଟିଛି ।
ରାଜଧାନୀରେ ସଡ଼କ ଦୁର୍ଘଟଣା: ଡିଭାଇଡର୍ ଉପରେ ଚଢ଼ିଗଲା ଏସ୍ୟୁଭି, ଜଣେ ଆହତ
ପୁଲିସ କହିବା ମୁତାବକ, ଚନ୍ଦ୍ରଶେଖରପୁର ଥାନା ଅଧୀନ ତନିସ୍କ ପଛ ପଟ ରାସ୍ତାରେ ଏକ ଆପାର୍ଟମେଣ୍ଟରେ ଜିତେନ୍ଦ୍ର ରହୁଥିଲେ । ଶୁକ୍ରବାର ଦିନ ତମାମ ସେ ଘରୁ ବାହାରେ ଥିଲେ । କୌଣସି କାର୍ଯ୍ୟରେ ବ୍ୟସ୍ତ ଥିଲେ । ସନ୍ଧ୍ୟାରେ ଘରକୁ ଫେରିବା ପରେ ସେ ଗୁମସୁମ ରହିଥିଲେ । କାହାରିକୁ କିଛି କହିନଥିଲେ । ରାତି ସାଢ଼େ ୮ଟା ବେଳେ ସେ ଶୋଇବା ଘରକୁ ଯାଇ ଭିତର ପଟୁ ବନ୍ଦ କରିଦେଇଥିଲେ । ପରିବାର ଲୋକ ତାଙ୍କୁ ଅନେକଥର ଡାକିଥିଲେ । କିନ୍ତୁ ଜିତେନ୍ଦ୍ର କବାଟ ଖୋଲିଲେନି । ଶେଷରେ ପରିବାର ଲୋକ କବାଟ ଭାଙ୍ଗି ଭିତରେ ପଶି ଦେଖିବା ବେଳକୁ ଜିତେନ୍ଦ୍ର ଏକ କପଡ଼ାରେ ବେକକୁ ଗୁଡ଼ାଇ ରୁମ୍ ଫ୍ୟାନ୍ରେ ଝୁଲି ପଡିଥିଲେ । ପରିବାର ଲୋକ ତାଙ୍କୁ ତଳକୁ ଓହ୍ଲାଇ ତୁରନ୍ତ ନିକଟସ୍ଥ ଏକ ହସ୍ପିଟାଲକୁ ନେଇଥିଲେ । ଡାକ୍ତର ସେଠାରେ ଜିତେନ୍ଦ୍ରଙ୍କୁ ମୃତ ଘୋଷଣା କରିଥିଲା । ଏନେଇ ଖବର ପାଇବା ପରେ ପୋଲିସ ଘଟଣାସ୍ଥଳକୁ ଯାଇ ତଦନ୍ତ ଚଳାଇଛି । ପୋଲିସ ତନାଘନାରୁ ଜଣାପଡି଼ଛି ଯେ, ବଡ଼ଗଡ଼ ଅଞ୍ଚଳରେ ଏକ ଦାମୀ ଜମି କିଣାବିକାକୁ ନେଇ ସେ ସବୁବେଳେ ଚିନ୍ତାରେ ରହୁଥିଲେ । ଉକ୍ତ ଜମି କିଣିବାକୁ ସେ ବିପୁଳ ଟଙ୍କା ବ୍ୟାଙ୍କରୁ ଋଣ କରିଥିଲେ । ଋଣ ସୁଝିବା ନେଇ ମାନସିକ ଭାରସାମ୍ୟ ହରାଇ ଆତ୍ମହତ୍ୟା କରିଥାଇ ପାରନ୍ତି । ଚନ୍ଦ୍ରଶେଖରପୁର ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି ।
