ନୂଆଦିଲ୍ଲୀ, ୨୧।୪: ପ୍ରତିଦିନ ଆମେ ଏକାଧିକ କଲ୍ କରୁ ଏବଂ କଲ୍ ରିସିଭ୍ କରୁ । ସାଧାରଣତଃ ଲୋକମାନେ କଲ୍ କରିବା ସମୟରେ ଅନେକ ଦିଗ ବିଷୟରେ ସଚେତନ ନଥାନ୍ତି । କିଛି ଲୋକଙ୍କର ପ୍ରତ୍ୟେକ କଲ୍ ରେକର୍ଡ କରିବାର ଅଭ୍ୟାସ ଥାଏ, ସେମାନେ ଅନ୍ୟ ବ୍ୟକ୍ତିଙ୍କ ଅନୁମତି ବିନା ଏହା କରନ୍ତି । ଯଦି ଆପଣ ମଧ୍ୟ ସେହିପରି କରୁଛନ୍ତି, ତେବେ ସତର୍କ ହୋଇଯାନ୍ତୁ, କାରଣ କଲ୍ ରେକର୍ଡିଂ ଯୋଗୁଁ ଆପଣଙ୍କୁ ଜେଲ୍ ଯିବାକୁ ପଡ଼ିପାରେ । ଯଦି ଆପଣ କାହାର ଅନୁମତି ବିନା ଫୋନ୍ କଲ୍ ରେକର୍ଡ କରନ୍ତି, ତେବେ ଏହା ଗୋପନୀୟତାର ଅଧିକାରର ଉଲ୍ଲଂଘନ ଏବଂ ଆପଣଙ୍କ ବିରୁଦ୍ଧରେ ପୋଲିସ କାର୍ଯ୍ୟାନୁଷ୍ଠାନ ନିଆଯାଇପାରେ । 

ବର୍ତ୍ତମାନ ଅନ୍ୟ କାହା କଲ୍ ରେକର୍ଡ କଲେ ତାଙ୍କ କଲ୍ ରେକର୍ଡ ହେଉଛି ବୋଲି ସେହି ବ୍ୟକ୍ତି ଜାଣିପାରନ୍ତି । ଏହାର ଅର୍ଥ ହେଉଛି କେହି ଗୁପ୍ତ ଭାବରେ କଲ୍ ରେକର୍ଡ କରିପାରିବେନାହିଁ । କାହାର ସମ୍ମତି ବିନା ତାଙ୍କ କଲ୍ ରେକର୍ଡ କରିବା ତାଙ୍କ ମୌଳିକ ଅଧିକାରର ଉଲ୍ଲଂଘନ ବୋଲି ବିବେଚନା କରାଯାଏ । ଯଦି କେହି ଜାଣିପାରନ୍ତି ଯେ, ଆପଣ ତାଙ୍କ ସମ୍ମତି ବିନା କଲ୍ ରେକର୍ଡ କରିଛନ୍ତି, ତେବେ ସେ କୋର୍ଟକୁ ଯାଇ ଏଫଆଇଆର ଦାୟର କରିପାରିବେ । ଏହା ପରେ, ଆପଣଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯାଇ ଆପଣଙ୍କୁ ଗିରଫ ମଧ୍ୟ କରାଯାଇପାରେ ।

କଲ୍ ରେକର୍ଡିଂ ବ୍ୟତୀତ, ଗୁପ୍ତରେ କାହାର ଫଟୋ ଉଠାଇବା କିମ୍ବା ଭିଡିଓ ତିଆରି କରିବା ମଧ୍ୟ ଏକ ଅପରାଧ । ଯଦି ଆପଣ ଏଭଳି କରୁଛନ୍ତି, ତେବେ ଆପଣଙ୍କୁ ଜେଲ ଯିବାକୁ ପଡ଼ିପାରେ । ଏଭଳି କରି ଆପଣ ଧାରା ୨୧ର ଉଲ୍ଲଂଘନ କରୁଛନ୍ତି । ଏହା କରିବା ଆପଣଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇପାରେ । ତେବେ କଲ୍ ରେକର୍ଡିଂ ନେଇ ଆଇନ କ’ଣ କୁହେ ଆସନ୍ତୁ ଜାଣିବା ? 

ଯଦି ଆପଣ କାହାର ଅନୁମତି ବିନା ତାଙ୍କ ମୋବାଇଲ୍ କଲ୍ ରେକର୍ଡ କରନ୍ତି, ତେବେ ଆପଣଙ୍କ ବିରୁଦ୍ଧରେ ଆଇଟି ଆକ୍ଟ-୨୦୦୦ ଧାରା ୭୨ ଅନୁଯାୟୀ କାର୍ଯ୍ଯାନୁଷ୍ଠାନ ନିଆଯାଇପାରିବ । IT ଆଇନ ଅନୁଯାୟୀ, କୌଣସି ତୃତୀୟ ପକ୍ଷ ବ୍ୟକ୍ତିଙ୍କ ଅନୁମତି ଇଲେକ୍ଟ୍ରୋନିକ୍ ଡିଭାଇସ୍ ମାଧ୍ୟମରେ ତାଙ୍କ ସହ ଜଡ଼ିତ ସୂଚନା, ଡକ୍ୟୁମେଣ୍ଟ୍ ଇତ୍ୟାଦି ସାର୍ବଜନୀନ କରିବା ଧାରା ୭୨ର ଉଲ୍ଲଂଘନ ବୋଲି ବିବେଚନା କରାଯିବ । ଭାରତୀୟ ସମ୍ବିଧାନର ଧାରା ୨୧ ଅନୁଯାୟୀ, ପ୍ରତ୍ୟେକ ବ୍ୟକ୍ତିଙ୍କ ଗୋପନୀୟତାର ଅଧିକାର ରହିଛି । ଯଦି ଆପଣ ଦୋଷୀ ସାବ୍ୟସ୍ତ ହୁଅନ୍ତି, ତେବେ ଆପଣଙ୍କୁ ୨ ବର୍ଷ ଜେଲଦଣ୍ଡ ସହ ୧ ଲକ୍ଷ ଟଙ୍କା ଜରିମାନା ଦେବାକୁ ପଡ଼ିପାରେ । 

ଯଦି ଆପଣ କାହାର ଫୋନ୍ କଲ୍‌କୁ ରେକର୍ଡିଂ କରି ରଖିଛନ୍ତି ତେବେ ତୁରନ୍ତ ଡିଲିଟ୍ କରିଦିଅନ୍ତୁ । ଆଗକୁ ଭୁଲ୍‌ରେ ବି କାହା ବିନା ଅନୁମତିରେ କଲ୍ ରେକର୍ଡିଂ କରନ୍ତୁନି । ନହେଲେ ଏଥିପାଇଁ ଆପଣଙ୍କୁ ଭୟଙ୍କର ପରିଣାମ ଭୋଗିବାକୁ ପଡ଼ିପାରେ । କହିରଖୁ କି, କୋର୍ଟରେ ଯଦି କୌଣସି ବ୍ୟକ୍ତି ବିଶେଷଙ୍କ କଲ୍ ରେକର୍ଡିଂ ତାଙ୍କ ବିନା ଅନୁମତିରେ ଉପସ୍ଥାପନ କରାଯାଏ, ତେବେ ତା ଆଇନ ଅନୁଯାୟୀ ଅବୈଧ ।