ଭୁବନେଶ୍ୱର,୧୬/୧୧: ମାସେ ହେଲାଣି ପାଟିରେ ଆମିଷ ବାଜିନଥିଲା । କିଏ ୭ଦିନ ତ ଆଉ କିଏ ପଞ୍ଚକ ୫ଦିନ ଧରି ଆଇଁଷ ଛାଡ଼ିଥିଲେ। ଟାକି ବସିଥିଲେ ଛାଡ଼ ଖାଇକୁ । ପୂର୍ଣ୍ଣିମା ବାସି ଶନିବାର ପଡ଼ିଥାନ୍ତା ଛାଡ଼ଖାଇ । ନିର୍ଘାତ ଆଇଁଷ ଖାଇଥାନ୍ତେ । ହେଲେ ପାଗଯୋଗ ବିଗିଡ଼ିଗଲା । ଶନିବାର ସଂକ୍ରାନ୍ତି ଥିବାରୁ ରବିବାରକୁ ଘୁଞ୍ଚିଗଲା ଛାଡ଼ଖାଇ । ଅର୍ଥାତ ଆଇଁଷ ଖାଇବାକୁ ଆହୁରି ୨୪ଘଣ୍ଟାର ଯନ୍ତ୍ରଣା ଭୋଗିବାକୁ ହେବ । ଏପଟେ ଆଇଁଷ ବେପାରୀଙ୍କୁ ବି ଗୋଟିଏ ଦିନ ପେକ୍ଷା କରିବାକୁ ପଡ଼ିବ । କିଏ ମାଛ ପାଇଁ ବଇନା ଦେଇସାରିଛି ତ କିଏ ଖାସି କିଣିଆଣି ଘରେ ରଖିଛି । ତ ଆଉ କିଏ ଚିକେନ ଭାଡ଼ି ସଜେଇ କରି ଥୋଇଛି । ତେଣୁ ୨୪ଘଣ୍ଟାର କାଉଣ୍ଟଡାଉନ୍ ଆରମ୍ଭ କରିଛନ୍ତି ବିକିଲା ବାଲା ଓ ଖାଇଲା ବାଲା । ଏସବୁ ମଧ୍ୟରେ କିନ୍ତୁ କୁକୁଡ଼ା, ଛେଳିଙ୍କ ଆୟୁଷ ଗୋଟିଏ ଦିନ ବଢ଼ିଛି ।
ଦୈତନଗରୀ ଭୁବନେଶ୍ୱର ଓ କଟକରେ ଗତବର୍ଷ ୮କୋଟିରୁ ଊଦ୍ଧ୍ୱର୍ ଟଙ୍କାର ଆମିଷ ବେପାର ହୋଇଥିଲା । ସେଥିମଧ୍ୟରୁ ଭୁବନେଶ୍ୱରରେ କେବଳ ୫ କୋଟିର ବେପାର ଥିଲା । ଏଥରକ ଉଭୟ ସହରରେ ୧୦ କୋଟିର ବେପାର ହେବ ବୋଲି ଆକଳନ କରାଯାଇଛି । ଯଦି ଭୁବନେଶ୍ୱର କଥା କହିବା, ଅଣ ଛାଡ଼ଖାଇ ସମୟରେ ପ୍ରତିଦିନ ବେପାର କୋଟିଏ ପର୍ଯ୍ୟନ୍ତ ଛୁଏଁ । ହେଲେ ରଜ, ଛାଡ଼ଖାଇ ଆସିଲେ ବେପାର ୩ଗୁଣ ହୋଇଯାଏ । ଛାଡ଼ ଖାଇ ପାଇଁ ଶୁକ୍ରବାର ସୁଦ୍ଧା ଭୁବନେଶ୍ୱରକୁ ୪୫୦ରୁ ୫୦୦ କୁଇଣ୍ଟା ଖାସି ଆସିଛି । ଏହି ସବୁ ଖାସି କୋଲକାତା ସମେତ ହରିପୁର, ଦଶପଲ୍ଲା, ବାରିପଦା, ଯଶିପୁର ଆଦି ସ୍ଥାନରୁ ୨୫୫ କୁଇଣ୍ଟାଲ ଛେଳି ଆସିସାରିଛି । ସେହିପରି ୨୦୦୦ ଟନ୍ କୁକୁଡ଼ା(ଉଭୟ ଦେଶୀ ଓ ବ୍ରଏଲର) ମଧ୍ୟ ଆସିଛି । ତେବେ ଶନିବାର ସଂକ୍ରାନ୍ତି ଥିବାରୁ ମାଛ ଆସିପାରିନି । ଯାହା ବୁଧବାର ଆସିଥିଲା ତାହା ରବିବାର ବିକ୍ରି ହେବ ।
ଶୁକ୍ରବାର ୨୦ରୁ ୨୫ଟି ମାଛ ଗାଡ଼ି ପାଇଁ ଅର୍ଡର ଦିଆଯାଇଛି । ଆନ୍ଧ୍ରପ୍ରଦେଶ ସହ ଚିଲିକା, ଭୂଷଣ୍ଡପୁର, ପାରାଦୀପ, ବାଲେଶ୍ୱର ଓ ଭଦ୍ରକ ଆଦି ସ୍ଥାନରୁ ଦେଶୀ ମାଛ ଆସିବ । ବର୍ତ୍ତମାନ ପର୍ଯ୍ୟନ୍ତ ଦର ତାଲିକା ହୋଇନାହିଁ । ରବିବାର ତାଲିକା କରାଯିବ ବୋଲି ନିଖିଳ ଓଡ଼ିଶା ଆମିଷ ବ୍ୟବସାୟୀ ମହାସଂଘର ସଭାପତି ଶେଖ୍ ମୁନ୍ତାକିମ୍ ବକ୍ସ କହିଛନ୍ତି ।
