ନୂଆଦିଲ୍ଲୀ,୨୨/୦୧: ଜଳବାୟୁ ପରିବର୍ତ୍ତନର ପ୍ରଭାବ ଏତେ ଯେ ବର୍ଷା ଏବଂ ତୁଷାରପାତ ଆଉ ହେବା ଭଳି ଲାଗୁନି। ଜାନୁଆରୀ ମାସ ସରିବାକୁ ବସିଥିବା ବେଳେ ଏପର୍ଯ୍ୟନ୍ତ ଉତ୍ତରାଖଣ୍ଡରେ ୮୧ ପ୍ରତିଶତ କମ୍ ବର୍ଷା ରେକର୍ଡ କରାଯାଇଛି। ବିଶେଷଜ୍ଞମାନେ କହିଛନ୍ତି ଯେ ୠତୁଚକ୍ରରେ ପରିବର୍ତ୍ତନ ଏବଂ ବିଶ୍ୱିକ ଜଳବାୟୁ ପରିବର୍ତ୍ତନ ଏହା ପଛର ମୁଖ୍ୟ କାରଣ। ଏହାରି ଭିତରେ ପରିବେଶବିତ୍ମାନେ କମ୍ ବର୍ଷା ଯୋଗୁଁ ହେଉଥିବା ସମସ୍ୟା ବିଷୟରେ ମଧ୍ୟ କହୁଛନ୍ତି। କମ ବର୍ଷା ଯୋଗୁଁ ଆଗାମୀ ସମୟରେ ଆହୁରି ଜଙ୍ଗଲରେ ନିଆଁ ଲାଗିବାର ସମ୍ଭାବନା ରହିଛି। ଗ୍ଳାସିୟରଗୁଡ଼ିକ ଦ୍ରୁତ ଗତିରେ ତରଳିବାର ଆଶଙ୍କା କରାଯାଉଛି ଏବଂ ପାନୀୟ ଜଳ ସମସ୍ୟା ମଧ୍ୟ ବୃଦ୍ଧି ପାଇବାର ସମ୍ଭାବନା ରହିଛି।
ଚିନ୍ତା ବଢ଼ାଉଛି ବର୍ଦ୍ଧିତ ତାପମାତ୍ରା:
୨୦୨୩ ରେ ତାପମାତ୍ରା ବୃଦ୍ଧି ପାଇଥିଲା ଏବଂ ଏହା ଅନେକ ରେକର୍ଡ ଭାଙ୍ଗିଥିଲା କିନ୍ତୁ ୨୦୨୪ ସବୁ ରେକର୍ଡ ମଧ୍ୟ ଭାଙ୍ଗି ଭାରତ ପାଇଁ ସବୁଠାରୁ ଗରମର ବର୍ଷ ଥିଲା। କେବଳ ଏତିକି ନୁହେଁ, ୨୦୨୫ ବର୍ଷ ଆରମ୍ଭ ହୋଇଛି କିନ୍ତୁ ଏଥିରେ ମଧ୍ୟ ବର୍ଷା ନାମକୁ ମାତ୍ର ଦେଖିବାକୁ ମିଳିଛି। ଉତ୍ତରାଖଣ୍ଡ ପାଣିପାଗ କେନ୍ଦ୍ର ଅନୁଯାୟୀ, ୮୧ ପ୍ରତିଶତ କମ୍ ବର୍ଷା ରେକର୍ଡ କରାଯାଇଛି। ପାଣିପାଗ କେନ୍ଦ୍ରର ନିର୍ଦ୍ଦେଶକ ବିକ୍ରମ ସିଂହଙ୍କ ଅନୁସାରେ, ଜାନୁଆରୀ ଏବଂ ଫେବୃଆରୀ ମାସ ଶୀତ ଋତୁ ଏବଂ ଏଥିରେ ଆମେ ପ୍ରାୟତଃ ୧୦୦ କିମ୍ବା ୧୦୧ ମିମି ବର୍ଷା ପାଇଥାଉ। ଯଦି ଆମେ ଜାନୁଆରୀ ଏବଂ ଫେବୃଆରୀ ମାସକୁ ଦେଖିବା, ତେବେ ୫୦-୫୦ ମିମି ବର୍ଷା ହୋଇଥାଏ, କିନ୍ତୁ ଜାନୁଆରୀ ମାସ ସରିବାକୁ ଯାଉଛି ଏବଂ ଏପର୍ଯ୍ୟନ୍ତ କେବଳ ଚାରି ପ୍ରତିଶତ ବର୍ଷା ହୋଇଛି।
ବର୍ଷା କମିଲେ ଚିନ୍ତା ବଢ଼ିବ:
ପାଣିପାଗ କେନ୍ଦ୍ରର ନିର୍ଦ୍ଦେଶକ ବିକ୍ରମ ସିଂହଙ୍କ ଅନୁଯାୟୀ, ବର୍ଷା ହ୍ରାସ ଏକ ବଡ଼ ଚିନ୍ତାର ବିଷୟ କାରଣ ପର୍ବତଗୁଡ଼ିକରେ ନିର୍ମାଣ କାର୍ଯ୍ୟ ନିରନ୍ତର ବୃଦ୍ଧି ପାଉଛି ଏବଂ ଏଥିପାଇଁ ଜଙ୍ଗଲ ଦ୍ରୁତ ଗତିରେ କଟାଯାଉଛି। ଏହା ବ୍ୟତୀତ ଜଙ୍ଗଲରେ ନିଆଁ ଲାଗିବା ଘଟଣା ମଧ୍ୟ ବର୍ଷକୁ ବର୍ଷ ବୃଦ୍ଧି ପାଉଛି। ପର୍ବତମାଳାରେ ଯାନବାହାନ ସଂଖ୍ୟା ନିରନ୍ତର ବୃଦ୍ଧି ପାଉଛି ଏବଂ ଏହି ଯାନଗୁଡ଼ିକରୁ ନିର୍ଗତ ଧୂଆଁ ସିଧାସଳଖ ବାୟୁମଣ୍ଡଳ ଏବଂ ଗ୍ଳେସିୟର ଉପରେ ଏକ ବଡ଼ ପ୍ରଭାବ ପକାଉଛି।
