ନୂଆଦିଲ୍ଲୀ: ଦିଲ୍ଲୀ ଅବକାରୀ ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ତିହାର ଜେଲରେ ରଖାଯାଇଛି ।ଆଉ ଏଠାରେ ଏବେ ଲୋକସଭା ପାଇଁ ମତଦାନ ଚାଲିଛି। ନିର୍ବାଚନରେ ଆମ୍ ଆଦମୀ ପାର୍ଟି ମଧ୍ୟ ଜୋରଦାର୍ ଉଦ୍ୟମ ଜାରି ରଖିଛି । ଆଉ ଏହି ସମୟରେ ଦିଲ୍ଲୀରେ AAP ର ନିର୍ବାଚନ ପ୍ରଚାରର ନେତୃତ୍ୱ ନେବେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ପତ୍ନୀ ସୁନୀତା କେଜ୍ରିୱାଲ। ପାର୍ଟି ସୂତ୍ରରୁ ମିଳିଥିବା ସୂଚନା ଅନୁଯାୟୀ ସୁନୀତା କେଜ୍ରିୱାଲ ପୂର୍ବ ଦିଲ୍ଲୀରୁ ତାଙ୍କର ପ୍ରଥମ ରୋଡ୍ ସୋ ଆରମ୍ଭ କରିବେ। ତାଙ୍କର ପ୍ରଥମ ରୋଡ୍ ସୋ କୋଣ୍ଡଲିରେ ହେବ। ଆମ୍ ଆଦମୀ ପାର୍ଟି କୁଲଦୀପ କୁମାରଙ୍କୁ ପୂର୍ବ ଦିଲ୍ଲୀ ଲୋକସଭା ଆସନରୁ ପ୍ରାର୍ଥୀ କରିଛି । 

ପୂର୍ବ ଦିଲ୍ଲୀ ଲୋକସଭା ନିର୍ବାଚନ ବ୍ୟତୀତ ସୁନୀତା କେଜ୍ରିୱାଲ ଆଉ ତିନିଟି ଲୋକସଭା ଆସନରେ ପ୍ରଚାର କରିବେ, ଯେଉଁ ଠାରେ କି ଆମ୍ ଆଦମୀ ପାର୍ଟି ପ୍ରାର୍ଥୀ ମାନେ ମୈଦାନରେ ଅଛନ୍ତି। ଏଭଳି ପରିସ୍ଥିତିରେ ସୁନୀତା କେଜ୍ରିୱାଲ କେବଳ ତାଙ୍କ ଦଳର ପ୍ରାର୍ଥୀଙ୍କ ପାଇଁ ଭୋଟ୍ ମାଗିବେ ବୋଲି ବିଶ୍ବାସ କରାଯାଉଛି । 

ସୂଚନାଥାଉକି ଯେ, ଆମ୍ ଆଦମୀ ପାର୍ଟି ଏବଂ କଂଗ୍ରେସ ମେଣ୍ଟ କରି ଦିଲ୍ଲୀରେ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛନ୍ତି । ଉଭୟ ଦଳ ପରସ୍ପର ଭିତରେ ବୁଝାମଣା କରି ମୈଦାନକୁ ପ୍ରାର୍ଥୀ ଓହ୍ଲାଇଛନ୍ତି । ନିର୍ବାଚନ ଚୁକ୍ତିନାମା ଅନୁଯାୟୀ ଆମ୍ ଆଦମୀ ପାର୍ଟି ପୂର୍ବ ଦିଲ୍ଲୀ, ଦକ୍ଷିଣ ଦିଲ୍ଲୀ, ପଶ୍ଚିମ ଦିଲ୍ଲୀ ଏବଂ ନୂଆଦିଲ୍ଲୀ ଲୋକସଭା ଆସନରୁ ପ୍ରତିଦ୍ୱନ୍ଦ୍ୱିତା କରୁଛି । ଏଥି ସହିତ ଉତ୍ତର-ପୂର୍ବ ଦିଲ୍ଲୀ, ଉତ୍ତର-ପଶ୍ଚିମ ଦିଲ୍ଲୀ ଏବଂ ଚାନ୍ଦନୀ ଚୌକ ଲୋକସଭା ଆସନରୁ କଂଗ୍ରେସ ପ୍ରତିଦ୍ୱନ୍ଦ୍ୱିତା କରୁଛି।