ନୂଆଦିଲ୍ଲୀ,୨୨/୦୬: ଇରାନ୍-ଇସ୍ରାଏଲ ସଂଘର୍ଷ ଏବେ ନୁଆ ମୋଡ଼ ନେଇଛିି । ମଧ୍ୟପ୍ରାଚ୍ୟ ଯୁଦ୍ଧ ଭିତରକୁ ଡେଇଁଛି ଆମେରିକା । ଇରାନ୍ ଉପରେ ବଡ଼ ହମଲା କରି ପରମାଣୁ ଆଡ୍ଡାରେ ବୋମା ବର୍ଷା କରିଛି ଆମେରିକା । ଇରାନ୍ର ୩ ପରମାଣୁ ଠିକଣା ଫୋର୍ଡୋ, ନତାଞ୍ଜ ଏବଂ ଇସ୍ଫହାନକୁ ବି୨ ବମ୍ବର ଓ ବଙ୍କର ବଷ୍ଟର ବୋମାରେ ଧ୍ବଂସ କରିଛି । ଫଳରେ ଇରାନ୍ର ନ୍ୟୁକ୍ଲିୟର ଶକ୍ତି ହେବା ସ୍ୱପ୍ନ ଭାଙ୍ଗିଛି । ଇରାନ୍ର ଯେଉଁ ୩ ଠିକଣା ଧ୍ୱସ୍ତ ହୋଇଛି ତାହା ବେଶ୍ ଗୁରୁତ୍ୱପୂର୍ଣ୍ଣ ଥିଲା । ଆମେରିକାର ଏହି ହମଲା ପରେ ଡୋନାଲ୍ଡ ଟ୍ରମ୍ପଙ୍କୁ ଚେତାବନୀ ଦେଇଛି ଇରାନ୍ ।
ଆମେରିକାର ଆକ୍ରମଣ ପରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ପରବର୍ତ୍ତୀ ପରିଣାମ ନେଇ ଚେତାବନୀ ଦେଇଛି ଇରାନ୍ । ଏବେ ପ୍ରତ୍ୟେକ ଆମେରିକୀୟ ନାଗରିକ ଆମ ଟାର୍ଗେଟ । ଯୁଦ୍ଧ ଏବେ ଆରମ୍ଭ ହୋଇଛି, ମିଷ୍ଟର ଟ୍ରମ୍ପ ! ଏବେ ତୁମେ ଶାନ୍ତିର କଥା କହୁଛ ? ତୁମେ ଆରମ୍ଭ କରିଛ ଆମେ ଶେଷ କରିବୁ । ଆମେ ଏପରି ଭାବରେ ଆକ୍ରମଣ କରିବୁ ତୁମେ ବେପରୁଆତାର ପରିଣାମ ବୁଝିପାରିବ ବୋଲି କହିଛି ଇରାନ୍ । ସେପଟେ ଯଦି ଟ୍ରମ୍ପ ପ୍ରଶାସନ୍ ଇରାନ୍ ବିରୋଧରେ ଇସ୍ରାଏଲ ଅଭିଯାନରେ ସାମିଲ ହୁଏ ତେବେ ଲାଲା ସାଗରରେ ଆମେରିକୀୟ ଜାହଜକୁ ଆକ୍ରମଣ କରିବୁ ବୋଲି ଧମକ ଦେଇଛି ହୁତି ବିଦ୍ରୋହୀ ।
ଅଧିକ ପଢନ୍ତୁ...ଇରାନ୍ ଉପରେ ଆମେରିକାର ହମଲା; ୩ଟି ପରମାଣୁ ଠିକଣା ଉପରେ ଆକ୍ରମଣ
କେତେ ଗୁରୁତ୍ୱପୂର୍ଣ୍ଣ ୩ ପରମାଣୁ ଠିକଣା ?
ଫୋର୍ଡୋ- ଫୋର୍ଡୋ- ଫୋର୍ଡୋ ନ୍ୟୁକ୍ଲିୟର ପ୍ଲାଣ୍ଟ ଇରାନର ସବୁଠାରୁ ଗୁରୁତ୍ୱପୂର୍ଣ୍ଣ ପରମାଣୁ କେନ୍ଦ୍ର ମଧ୍ୟରୁ ଗୋଟିଏ। ଏହା ତେହେରାନରୁ ୧୨୫ କିମି ଦୂରରେ କୋମ୍ ସହର ନିକଟରେ ଅବସ୍ଥିତ । ଏକ ପର୍ବତ ତଳେ ପ୍ରାୟ ୩୦୦ ଫୁଟ ଗଭୀରରେ ନିର୍ମିତ। ଏହାକୁ ଇରାନର "ମାଉଣ୍ଟ ଡୁମ୍" କୁହାଯାଏ କାରଣ ଏହା ଏତେ ସୁରକ୍ଷିତ ଯେ ଏହାକୁ ନଷ୍ଟ କରିବା ପ୍ରାୟ ଅସମ୍ଭବ ବୋଲି ବିବେଚନା କରାଯାଏ । ଫୋର୍ଡୋ ଅତ୍ୟନ୍ତ ସମୃଦ୍ଧ ୟୁରାନିୟମ ଉତ୍ପାଦନ କରେ, ଯାହା ପରମାଣୁ ବୋମା ନିର୍ମାଣ ପାଇଁ ବହୁତ ଗୁରୁତ୍ୱପୂର୍ଣ୍ଣ । ଇରାନ୍ ଫୋର୍ଡୋରେ ୟୁରାନିୟମ ଉତ୍ପାଦନ ୬୦% ସ୍ତରକୁ ବୃଦ୍ଧି କରିଛି । ଇସ୍ରାଏଲ ଅଧିକାରୀ ଦାବି କରିଥିଲେ ଯେ, ଏହାକୁ ଏପରି ଡିଜାଇନ୍ କରାଯାଇଛି ଯେ ଆମେରିକା ବ୍ୟତୀତ ଅନ୍ୟ କୌଣସି ଦେଶ ଏହି ସ୍ଥାନରେ ଆକ୍ରମଣ କରିପାରିବ ନାହିଁ ।
ନତାଞ୍ଜ - ଏହା ଇରାନ୍ର ଏକ ପ୍ରମୁଖ ୟୁରୋନିୟମ ସମୃଦ୍ଧି ସ୍ଥଳ । ନତାଞ୍ଜ ଉପରେ ଆକ୍ରମଣ ଇରାନର ପରମାଣୁ କାର୍ଯ୍ୟକଳାପକୁ ପ୍ରଭାବିତ କରିପାରେ। ଅଣ-ଲାଭଦାୟକ ନ୍ୟୁକ୍ଲିୟର ଥ୍ରେଟ୍ ଇନିସିଏଟିଭ୍ (NTI)ଅନୁଯାୟୀ, ନାତାଞ୍ଜ ଭୂମିରେ ୬ଟି କୋଠା ଏବଂ ୩ଟି ଭୂତଳ ରହିଛି, ଯାହା ମଧ୍ୟରୁ ଦୁଇଟିରେ ୫୦,୦୦୦ ସେଣ୍ଟ୍ରିଫ୍ୟୁଜ୍ ରହିପାରିବ।
ଇସ୍ଫହାନ- ଏହା ଇରାନ୍ର ଆଉ ଏକ ମହତ୍ତ୍ବପୂର୍ଣ୍ଣ ପରମାଣୁ ସାଇଟ୍ । ଯାହା ଉପରେ ବି ଇସ୍ରାଏଲ ଆକ୍ରମଣ କରିଛି । ଇସ୍ଫହାନ ଉପରେ ଆକ୍ରମଣ ଇରାନର ପରମାଣୁ କାର୍ଯ୍ୟକଳାପକୁ କ୍ଷତି ପହଞ୍ଚାଇପାରେ। ଇସ୍ଫହାନ୍ ପରମାଣୁ କେନ୍ଦ୍ର ହେଉଛି ଇରାନର କେନ୍ଦ୍ରୀୟ ସ୍ଥାନ । ଏହା ଦେଶର ସର୍ବବୃହତ ପରମାଣୁ ଗବେଷଣା କେନ୍ଦ୍ର । NTI ଅନୁଯାୟୀ, ଇସ୍ଫହାନରେ ୩ ହଜାର ବୈଜ୍ଞାନିକ କାମ କରନ୍ତି ।
