ନୂଆଦିଲ୍ଲୀ: ପୂର୍ବତନ ଫ୍ରାନ୍ସ ରାଷ୍ଟ୍ରପତି ନିକୋଲାସ ସାର୍କୋଜିଙ୍କୁ ଗୁରୁବାର ଦିନ ପ୍ୟାରିସର ଏକ କୋର୍ଟ ଅପରାଧିକ ଷଡ଼ଯନ୍ତ୍ର ଅଭିଯୋଗରେ ପାଞ୍ଚ ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି । ତାଙ୍କୁ ୧ ଲକ୍ଷ ୟୁରୋ (ପ୍ରାୟ ୯.୨ ନିୟୁତ ଟଙ୍କା) ଜରିମାନା ମଧ୍ୟ କରାଯାଇଛି । ପାଞ୍ଚ ବର୍ଷ ପାଇଁ କୌଣସି ସରକାରୀ ପଦବୀରେ ରହିବାରୁ ନିଷେଧ କରାଯାଇଛି । ଏହି ମାମଲା ୨୦୦୭ ରାଷ୍ଟ୍ରପତି ନିର୍ବାଚନରେ ବିଜୟ ପାଇଁ ତତ୍କାଳୀନ ଲିବ୍ୟା ଏକଛତ୍ରବାଦୀ ଶାସକ ମୁଅମ୍ମାର ଗଦ୍ଦାଫିଙ୍କ ବେଆଇନ ପାଣ୍ଠି ସହିତ ଜଡିତ । ତଥାପି କୋର୍ଟ ସାର୍କୋଜିଙ୍କୁ ଦୁର୍ନୀତି ସମେତ ଅନ୍ୟାନ୍ୟ ଅଭିଯୋଗରୁ ମୁକ୍ତ କରିଛନ୍ତି । ୭୦ ବର୍ଷୀୟ ସାର୍କୋଜି ଏହି ରାୟକୁ ଅସାମ୍ବିଧାନିକ ଏବଂ ଏହା ବିରୁଦ୍ଧରେ ଉଚ୍ଚ ଅଦାଲତରେ ଆବେଦନ କରିବେ ବୋଲି କହିଛନ୍ତି ।
ନିକୋଲାସ୍ ସାର୍କୋଜି ୨୦୦୭ ରୁ ୨୦୧୨ ପର୍ଯ୍ୟନ୍ତ ଫ୍ରାନ୍ସର ରାଷ୍ଟ୍ରପତି ଥିଲେ । ତାଙ୍କ ପତ୍ନୀ କାର୍ଲା ବ୍ରୁନି ଜଣେ ପ୍ରସିଦ୍ଧ ଗାୟିକା ଏବଂ ମଡେଲ। କୋର୍ଟ ରାୟ ଦେଇଛନ୍ତି ଯେ, ସାର୍କୋଜି ତାଙ୍କ ୨୦୦୭ ନିର୍ବାଚନ ପ୍ରଚାର ପାଇଁ ଲିବ୍ୟାରୁ ଟଙ୍କା ପାଇବା ପାଇଁ ନିକଟତମ ସହଯୋଗୀଙ୍କ ବିରୋଧରେ ଷଡ଼ଯନ୍ତ୍ର କରିଥିଲେ । ତେବେ ଏହା ପ୍ରମାଣିତ ହୋଇପାରିଲା ନାହିଁ ଯେ, ଏହି ଟଙ୍କା ତାଙ୍କ ପ୍ରଚାର ପାଇଁ ବ୍ୟବହୃତ ହୋଇଥିଲା କି ନାହିଁ । ତେଣୁ ତାଙ୍କୁ ଦୁର୍ନୀତି ଭଳି ଅନ୍ୟାନ୍ୟ ଅଭିଯୋଗରୁ ମୁକ୍ତ କରାଯାଇଛି । କୋର୍ଟ ରାୟ ଦେଇଛନ୍ତି ଯେ, ଷଡ଼ଯନ୍ତ୍ର କରିବା ଏକ ଗମ୍ଭୀର ଅପରାଧ । ଏହା ଜନସାଧାରଣଙ୍କ ବିଶ୍ୱାସକୁ କ୍ଷୁର୍ଣ୍ଣ କରିଥିଲା ।
ସାର୍କୋଜିଙ୍କୁ ଗୋଟିଏ ମାସ ମଧ୍ୟରେ ଜେଲଦଣ୍ଡ ଦିଆଯିବ । ଆଧୁନିକ ଫ୍ରାନ୍ସ ଇତିହାସରେ ଏହା ପ୍ରଥମ ଥର ଯେ, ଜଣେ ପୂର୍ବତନ ରାଷ୍ଟ୍ରପତିଙ୍କୁ ଜେଲଦଣ୍ଡ ଦିଆଯାଇଛି । ସାର୍କୋଜି ସମସ୍ତ ଅଭିଯୋଗକୁ ଅସ୍ୱୀକାର କରିଛନ୍ତି। ସେ କହିଛନ୍ତି ଯେ, ଏହି ମାମଲା ଏକ ‘ରାଜନୈତିକ ଷଡ଼ଯନ୍ତ୍ର’ ଏବଂ ଗଦ୍ଦାଫି ପରିବାର ପ୍ରତିଶୋଧ ପାଇଁ ଏହି ଅଭିଯୋଗ ଆଣିଛନ୍ତି । ୨୦୧୧ ମସିହାରେ ଗଦ୍ଦାଫିଙ୍କୁ ହଟାଇବା ପାଇଁ ସାର୍କୋଜି ସାମରିକ ହସ୍ତକ୍ଷେପକୁ ସମର୍ଥନ କରିଥିଲେ । ପରେ ଗଦ୍ଦାଫିଙ୍କୁ କ୍ଷମତାଚ୍ୟୁତ କରି ହତ୍ୟା କରିଯାଇଥିଲା ।
ଏହା ପ୍ରଥମ ଥର ନୁହେଁ ଯେତେବେଳେ ସାର୍କୋଜି ସମସ୍ୟାରେ ପଡ଼ିଛନ୍ତି। ୨୦୨୧ ମସିହାରେ ତାଙ୍କୁ ଜଣେ ବିଚାରପତିଙ୍କୁ ଲାଞ୍ଚ ଦେବାକୁ ଚେଷ୍ଟା କରିବା ପାଇଁ ଗୋଟିଏ ବର୍ଷର ଜେଲଦଣ୍ଡ ଦିଆଯାଇଥିଲା । ୨୦୧୨ ନିର୍ବାଚନରେ ବେଆଇନ ଖର୍ଚ୍ଚ ପାଇଁ ୨୦୨୪ ମସିହାରେ ତାଙ୍କୁ ଛଅ ମାସର ଜେଲଦଣ୍ଡ ଦିଆଯାଇଥିଲା। ସେହି ବର୍ଷ ତାଙ୍କ ପାଖରୁ ଫ୍ରାନ୍ସର ସର୍ବୋଚ୍ଚ ନାଗରିକ ପୁରସ୍କାର ‘ଲିଜିଅନ୍ ଅଫ୍ ଅନର’ ଛଡ଼ାଇ ନିଆଯାଇଥିଲା ।
