ମୁମ୍ବାଇ,୧୧/୧୧: ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜରେ ଭାରତୀୟ କ୍ରିକେଟ ଦଳର ଶୋଚନୀୟ ପରାଜୟ ପରେ ଦଳକୁ ସମାଲୋଚନା କରାଯାଇଥିଲା । ଅଧିନାୟକ ରୋହିତ ଶର୍ମା ଓ ବିରାଟ କୋହଲିଙ୍କ ଫର୍ମକୁ ନେଇ ମଧ୍ୟ ପ୍ରଶ୍ନ ଉଠିଥିଲା । ଏହା ସହିତ ଭାରୀତୟ ଦଳର ମୁଖ୍ୟ କୋଚ୍ ଗୌତମ ଗମ୍ଭୀରଙ୍କ କୋଚିଂକୁ ନେଇ ମଧ୍ୟ ବରିଷ୍ଠ ଖେଳାଳି ସମାଲୋଚନା କରିଛନ୍ତି । ତେବେ ଏହା ଉପରେ ମୁହଁ ଖୋଲିଛନ୍ତି କୋଚ୍ ଗୌତମ ଗମ୍ଭୀର । ଆଜି ଏକ ପ୍ରେସ୍ କନଫରେନ୍ସ କରି ସମସ୍ତ ପ୍ରଶ୍ନର ଉତ୍ତର ଦେଇଛନ୍ତି ଗୌତମ ଗମ୍ଭୀର ।
ନ୍ୟୁଜିଲାଣ୍ଡଠୁ ୦-୩ ସିରିଜରେ ପରାସ୍ତ ହେବା ପରେ ଭାରତ ପାଇଁ ବର୍ଡର ଗାଭାସ୍କର ଟେଷ୍ଟ ଚମ୍ପିଆନସିପ ଫାଇନାଲରେ ପହଞ୍ଚିବା କଷ୍ଟକର ହୋଇପଡିଛି । ଫାଇନାଲରେ ସ୍ଥାନ ପାଇଁ ଭାରତ ଅଷ୍ଟ୍ରେଲିଆ ବିପକ୍ଷରେ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ୪-୦ରେ ଜିତିବାକୁ ହେବ । ଆଷ୍ଟ୍ରେଲିଆ ବିପକ୍ଷ ମ୍ୟାଚ ପୂର୍ବରୁ ଭାରତୀୟ ଦଳର କୋଚ ଗୌତମ ଗମ୍ଭୀର ଆଜି ସାମ୍ବାଦିକ ସମ୍ମିଳନୀ କରିଛନ୍ତି । ଅନେକ ପ୍ରଶ୍ନର ଉତ୍ତର ରଖିଛନ୍ତି ।
ରୋହିତ ଶର୍ମା ପ୍ରଥମ ଟେଷ୍ଟ ଖେଳିବେ ନା ନାହିଁ ପ୍ରଶ୍ନରେ ଗମ୍ଭୀର କହିଛନ୍ତି, ରୋହିତ ଶର୍ମାଙ୍କ ବିଷୟରେ ଏବେ କିଛି ଜଣାପଡିନାହିଁ । ଆଶା ଅଛି ସେ ଖେଳିବେ । ସିରିଜ ଆରମ୍ଭ ହେବା ପୂର୍ବରୁ ସବୁ କିଛି ଜଣାପଡିଯିବ । ରୋହିତଙ୍କ ଅନୁପସ୍ଥିରେ କେଏଲ ରାହୁଲ ଓ ଅଭିମନ୍ୟୁ ଇଶ୍ବରନ ଦଳ ପାଇଁ ଓପନିଂ ବିକଳ୍ପ ଅଛନ୍ତି । ଚୂଡାନ୍ତ ଏକାଦଶ ବିଷୟରେ କିଛି କହିହେବ ନାହିଁ । ବେଷ୍ଟ ଏକାଦଶ ନେଇ ମଇଦାନକୁ ଓହ୍ଲାଇବୁ । ଜସପ୍ରୀତ ବୁମରା ଉପଅଧିନାୟକ । ତେଣୁ ଯଦି ରୋହିତ ଅନୁପସ୍ଥିତ ରହିବେ ତେବେ ସେ ନିଶ୍ଚିନ୍ତ ରୂପରେ ଅଧିନାୟକ ଦାୟିତ୍ବ ତୁଲାଇବେ ।
ରୋହିତ ଓ କୋହଲିଙ୍କୁ ସମର୍ଥନ କରି କୋଚ ଗୌତମ ଗମ୍ଭୀର କହିଛନ୍ତି, କୋହଲି ଓ ରୋହିତଙ୍କ ଫର୍ମକୁ କୌଣସି ଚିନ୍ତା ନାହିଁ । ସେମାନେ ଉଚିତ ସମୟରେ ଅବିଶ୍ବସନୀୟ ପ୍ରଦର୍ଶନ କରିଛନ୍ତି । ସେମାନେ ଭାରତୀୟ ଦଳକୁ ବହୁତ ସଫଳତା ଦେଇଛନ୍ତି । ଆଗକୁ ମଧ୍ୟ ଏହା କରିବେ । ପୂର୍ବ ସିରିଜର ଫଳାଫଳ ଯାହା ହେଲା ତାହୁକୁ ନେଇ ଡ୍ରେସିଂ ରୁମରେ ଭୋକିଲା ଅଛନ୍ତି ।
ସେ ଆହୁରି କହିଛନ୍ତି, ତୁମେ ଯେତେବେଳେ ତୁମ ଦେଶ ପାଇଁ ଖେଳୁଛ ପ୍ରତି ସିରିଜ ଗୁରୁତ୍ବପୂର୍ଣ୍ଣ । ଦୁଇଟି ଭଲ ଦଳ ପରସ୍ପର ମଧ୍ୟରେ ଲଢିବେ । ନ୍ୟୁଜିଲାଣ୍ଡ ବିପକ୍ଷ ସିରିଜ ବିଫଳତା ପରେ ମୋତେ ଟାର୍ଗେଟ କରାଯାଇଥିଲା । ମୁଁ କୋଚ ଦାୟିତ୍ବ ନେବା ସମୟରେ ଜାଣିଥିଲି ଏହା ଯେତିକି ସମ୍ମାନକର ସେତିକି କଷ୍ଟକର ।
