ଭୁବନେଶ୍ୱର,୨୧/୧୦: ୩ ଦିନ ତଳେ ପ୍ରେମିକ ପାଇଁ ପାଳିଥିଲେ କୁମାର ପୂର୍ଣ୍ଣିମା । ଦିନସାରା ଉପାସ ରହିବା ପରେ ସନ୍ଧ୍ୟାରେ ଜହ୍ନକୁ ଆଞ୍ଜୁଳା ଟେକି ପୂଜା କରିଥିଲେ । ପ୍ରେମିକକୁ ଜୀବନସାଥୀ କରିବେ ଭାବି ତାଙ୍କ ଦୀର୍ଘାୟୁ କାମନା କରିଥିଲେ । କିନ୍ତୁ ସେହି ପ୍ରେମିକର ବ୍ଲାକମେଲିଂ ତାଙ୍କ ଜୀବନ ନେଲା । ପ୍ରେମିକର ଧୋକ୍କା ସହିନପାରି ଶେଷରେ ରଶ୍ମିତା ଦାସ ଜୀବନ ହାରିଥିବା ପୁଲିସ ତଦନ୍ତରୁ ଜଣାପଡିଛି। ଏନେଇ ନୂଆପଲ୍ଲୀ ଥାନା ପୁଲିସ କେସ୍ ନଂ.୬୧୬/୨୪ରେ ରୁଜୁ କରିବା ସହ ଅଭିଯୁକ୍ତ ପ୍ରେମିକ ଅଜିତ ଦାସକୁ ଗିରଫ କରିଛି ।
ଅଜିତର ଘର ଜଗତ୍ସିଂହପୁର ସଦେଈପୁର । ପୁଲିସ ତାକୁ ଗତକାଲି ରାତିରେ ବରମୁଣ୍ଡା ବସ୍ଷ୍ଟାଣ୍ଡରୁ ଗିରଫ କରିଛି । ତା’ଠାରୁ ଏକ ମୋବାଇଲ ଫୋନ ଜବତ କରାଯାଇଛି । ପୁଲିସ ତା’ ବିରୋଧରେ ପ୍ରବଞ୍ଝନା, ଛଦ୍ମବେଶରେ ଠକେଇ, ବିବାହର ମିଥ୍ୟା ପ୍ରତିଶ୍ରୁତି ଓ ଆତ୍ମହତ୍ୟା ପାଇଁ ଉସ୍କେଇବା ଭଳି ଦଫା ଲଗାଇଛି । ପଚରାଉଚରା ସମୟରେ ସେ ନିଜ ଅପରାଧ ସ୍ୱୀକାର କରିଛି ।
ପୁଲିସ କହିବା ମୁତାବକ, ୪ ବର୍ଷ ତଳେ ଉଭୟଙ୍କ ପ୍ରେମ ଜଗତ୍ସିଂହପୁରରେ ଆରମ୍ଭ ହୋଇଥିଲା । ଅଜିତ୍ ରଶ୍ମିତାଙ୍କ ମନରେ ବିବାହର ବିଶ୍ୱାସ ଜନ୍ମାଇ ଶାରୀରିକ ସମ୍ପର୍କ ରଖିଥିଲା । ରଶ୍ମିତାଙ୍କ ସରଳତାର ସୁଯୋଗ ନେଇ ଅଜାଣତରେ କିଛି ଗୁପ୍ତ ଫଟୋ ତଥା ଭିଡିଓ ନିଜ ମୋବାଇଲ ଫୋନରେ ରଖିଥିଲା । ଅଜିତ୍ ଚାକିରି ପାଇଁ ଆସାମ ପଳାଇଥିଲା । ରଶ୍ମିତା ଚାକିରି ସନ୍ଧାନରେ ୬ ମାସ ତଳେ ଭୁବନେଶ୍ୱର ଆସିଥିଲେ । ଏକ ଘରୋଇ ସଂସ୍ଥାରେ ଚାକିରି ପାଇଥିଲେ । କିନ୍ତୁ ଏ ଚାକିରି ଅଜିତ ମନକୁ ପାଉନଥିଲା । ଏକ ନାମୀ ସଂସ୍ଥାରେ ଚାକିରି କରାଇଦେବା ଲୋଭ ଦେଖାଇ ରଶ୍ମିତାଙ୍କଠାରୁ ସେ ଏକ ଲକ୍ଷ ଟଙ୍କା ନେଇଯାଇଥିଲା ।
ଗତ ୧୬ ତାରିଖରେ ରଶ୍ମିତା ଉପବାସ ରଖିଥିଲେ । ସେହିଦିନ ହିଁ ଅଜିତ ନିଜ ଅସଲି ରୂପ ଦେଖାଇଥିଲା । ରଶ୍ମିତାଙ୍କୁ ଫୋନ୍ କରି ଚାକିରି ପାଇଁ ଆହୁରି ୭୦ ହଜାର ଟଙ୍କା ମାଗିଥିଲା । ରଶ୍ମିତା ଏଥିରେ ରାଜି ହେଲେନି । କହିଲେ, ମୁଁ ନୂଆ ଚାକିରି କରିଛି । ଏଥିରେ କିଛି ମାସ କାମ କରିବି । ଅଜିତ୍ ଏକଥା ଶୁଣି ରାଗିଗଲା । ଆଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହିତ ତାଙ୍କ ଫଟୋ ଓ ଭିଡ଼ିଓ ସବୁକୁ ସାମାଜିକ ଗଣମାଧ୍ୟମରେ ପ୍ରସାର କରିଦେବାର ଧମକ ଦେଲା । ଅଜିତ୍ର ଏଭଳି ଭୟଙ୍କର ରୂପ ଦେଖି ରଶ୍ମିତାଙ୍କ ପାଦ ତଳୁ ମାଟି ଖସିଯାଇଥିଲା । ସେ ମାନସିକ ଭାରସାମ୍ୟ ହରାଇ ବସିଥିଲେ । ଭୁବନେଶ୍ୱରରେ ରହୁଥିବା ଭଡ଼ାଘରେ ସେ କବାଟ କିଳି ରହିଥିଲେ । ଖିଆପିଆ ଛାଡି଼ ଦେଇଥିଲେ । ୧୭ ତାରିଖ ବିଳମ୍ବିତ ରାତି ଯାଏ ସେ କବାଟ ନ ଖୋଲିବାରୁ ପଡ଼ୋଶୀଙ୍କ ସନ୍ଦେହ ଉପୁଜିଥିଲା । ପରେ ତାଙ୍କ ଝୁଲନ୍ତା ମୃତଦେହ ପୁଲିସ ଉଦ୍ଧାର କରିଥିଲା।
ପୁରୁଷ ବନ୍ଧୁଙ୍କ ବ୍ଲାକମେଲିଂ ସହିପାରିଲେନି, ଜୀବନ ହାରିଲେ ଯୁବତୀ
