ନୂଆଦିଲ୍ଲୀ,୧୧/୦୫: ସାଇବର ଅପରାଧ ଲାଗି ବ୍ୟବହାର ହୋଇଥିବା ୨୮,୨୦୦ ମୋବାଇଲ  ହ୍ୟାଣ୍ଡ୍‌ସେଟ୍‌କୁ ବ୍ଲକ୍‌ କରିବା ପାଇଁ କେନ୍ଦ୍ର ସରକାର ଟେଲିକମ୍‌ ଅପରେଟରମାନଙ୍କୁ ନିର୍ଦ୍ଦେଶ ଦେଇଛନ୍ତି । ଏହି  ହ୍ୟାଣ୍ଡ୍‌ସେଟ୍‌ଗୁଡ଼ିକ ସହ ଜଡ଼ିତ ୨୦ ଲକ୍ଷ ମୋବାଇଲ  ନମ୍ବରକୁ ପୁନଃ ଯାଞ୍ଚ କରିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି । ଯଦି ନମ୍ବରଗୁଡ଼ିକର ରିଭେରିଫିକେଶନ୍‌ ବିଫଳ ହୁଏ ତେବେ ଏଗୁଡ଼ିକୁ ବ୍ଲକ୍‌ କରିବା ପାଇଁ କୁହାଯାଇଛି । 

ସୂଚନାଯୋଗ୍ୟ, ସାଇବର ଅପରାଧକୁ  ନିୟନ୍ତ୍ରଣ କରିବା ପାଇଁ ସରକାର ବିଭିନ୍ନ ମନ୍ତ୍ରାଳୟଗୁଡ଼ିକ  ସହ ମିଳିତ ହୋଇ କାର୍ଯ୍ୟ କରୁଛନ୍ତି । ସାଇବର ଅପରାଧ  ଏବଂ ବିତ୍ତୀୟ ଠକେଇରେ ଟେଲିକମ୍‌ ସମ୍ବଳଗୁଡ଼ିକର  ଅପବ୍ୟବହାରକୁ ରୋକିବା ପାଇଁ ଟେଲିକମ୍‌  ବିଭାଗ(ଡଟ୍‌), ଗୃହବ୍ୟାପାର ମନ୍ତ୍ରାଳୟ ଏବଂ ରାଜ୍ୟ  ପୁଲିସ୍‌ ଏକତ୍ର ହୋଇ କାର୍ଯ୍ୟ କରୁଛନ୍ତି । ସାଇବର  ଅପରାଧୀଙ୍କ ନେଟ୍‌ୱର୍କକୁ ସଂକୁଚିତ କରି ନାଗରିକଙ୍କୁ  ଡିଜିଟାଲ ଠକେଇରୁ ସୁରକ୍ଷା ଦେବା ଏହାର ଉଦ୍ଦେଶ୍ୟ ।  

ଗୃହବ୍ୟାପାର ମନ୍ତ୍ରାଳୟ ଏବଂ ପୁଲିସ୍‌  ପକ୍ଷରୁ କରାଯାଇଥିବା ଯାଞ୍ଚରୁ ଜଣାପଡ଼ିଛି ଯେ,  ୨୮,୨୦୦ ମୋବାଇଲ ହ୍ୟାଣ୍ଡ୍‌ସେଟ୍‌ ସାଇବର  ଅପରାଧରେ ବ୍ୟବହାର ହୋଇଛି । ଏହି ମୋବାଇଲ ହ୍ୟାଣ୍ଡ୍‌ସେଟ୍‌ଗୁଡ଼ିକରେ ପ୍ରାୟ ୨୦ ଲକ୍ଷ ନମ୍ବର ବ୍ୟବହାର  ହୋଇଥିବା ଜଣାପଡ଼ିଛି ।