ପୁରୀ, ୦୭/୧୧ : ଶ୍ରୀମନ୍ଦିର ସୁରକ୍ଷାରେ ଅହେତୁକ ଅବହେଳା କରାଯାଉଛି। ରତ୍ନଭଣ୍ଡାରରେ ଫାଟ ଥିବା ଓ ଏଥିପ୍ରତି ବିପଦ ସୃଷ୍ଟି ହୋଇଥିବା ବିଭିନ୍ନ ମହଲରେ ଚର୍ଚ୍ଚା ଜୋର୍ ଧରିବାରୁ ତତ୍କାଳୀନ ସରକାର ଏହାର ଲେଜର ସ୍କାନିଂ କରିବାକୁ ନିଷ୍ପତ୍ତି ନେଇଥିଲେ । ହାଇଦ୍ରାବାଦ୍ରୁ ଏକ ବିଶେଷଜ୍ଞ ଦଳ ରତ୍ନଭଣ୍ଡାର ସହ ଶ୍ରୀମନ୍ଦିରରେ ଥିବା ସମସ୍ତ ଛୋଟବଡ଼ ୧୩୪ଟି ପ୍ରାଚୀନ ମନ୍ଦିର ଲେଜର ସ୍କାନିଂ କରିବ ବୋଲି ଜଣାପଡ଼ିଥିଲା । ଲେଜର ସ୍କାନିଂ ହେଲେ ସମସ୍ତ ମନ୍ଦିରରେ ରହିଥିବା ଫାଟ ଓ ଅନ୍ୟାନ୍ୟ ତ୍ରୁଟି ଜଣାପଡ଼ିବ । ପରେ ମରାମତି ଓ ସଂରକ୍ଷଣ କରିବାରେ ଏଏସ୍ଆଇକୁ ସୁବିଧା ହେବ ବୋଲି କୁହାଯାଇଥିଲା । ମାସକ ମଧ୍ୟରେ ଏହି କାର୍ଯ୍ୟ ଶେଷ ହେବ । ହେଲେ କେବଳ ରତ୍ନଭଣ୍ଡାରର ଲେଜର ସ୍କାନିଂ କରାଗଲା । ବର୍ଷେରୁ ଅଧିକ ସମୟ ବିତିଥିଲେ ହେଁ ଶ୍ରୀମନ୍ଦିର ପରିସର ପାର୍ଶ୍ୱ ଦେବଦେବୀ ମନ୍ଦିର ଲେଜର ସ୍କାନିଂ ହେଲାନାହିଁ । ତେଣୁ କେବେ ଏହି କାର୍ଯ୍ୟ ହେବ ଏବଂ ମରାମତି ଓ ସଂରକ୍ଷଣ କାମ ଏଏସ୍ଆଇ ହାତକୁ ନେବ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ଏଏସ୍ଆଇର ଜଣେ ଅଧିକାରୀ କହିଛନ୍ତି, ଆମ ପାଖରେ ଲେଜର ସ୍କାନିଂ ମେସିନ୍ ରହିଛି । ଏହାକୁ ବ୍ୟବହାର କରିବାକୁ ଶ୍ରୀମନ୍ଦିର ପ୍ରଶାସନ ଅନୁମତି ଦେଲେ କାମ ଆଗେଇବ । ଲେଜର ସ୍କାନିଂ ନିମନ୍ତେ ଆବଶ୍ୟକ ସୁରକ୍ଷା ବ୍ୟବସ୍ଥା ଶ୍ରୀମନ୍ଦିର ପ୍ରଶାସନକୁ କରିବାକୁ ପଡ଼ିବ । ଯେହେତୁ ବଡ଼ଦେଉଳ ଓ ଏହାର ପାର୍ଶ୍ୱ ମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼ ସର୍ବଦା ରହୁଛି ତେଣୁ ଆବଶ୍ୟକ ସ୍ଥଳେ କିଛି ସମୟ ଦର୍ଶନ ବ୍ୟବସ୍ଥା ବନ୍ଦ କରି ଲେଜର ସ୍କାନିଂ ନିମନ୍ତେ ସବୁ ବନ୍ଦୋବସ୍ତ କରିବାକୁ ପଡ଼ିବ । ଶ୍ରୀମନ୍ଦିରରେ ନୀତି ସଅଳ କରିବାକୁ ମଧ୍ୟ ପଡ଼ିପାରେ । ଶ୍ରୀମନ୍ଦିର ପ୍ରଶାସନ ପକ୍ଷରୁ ସହଯୋଗ ମିଳିଲେ ଏହି କାମ ହୋଇପାରନ୍ତା ବୋଲି ସେ ମତ ରଖିଛନ୍ତି । ସୂଚନାଥାଉକି, ଶ୍ରୀମନ୍ଦିର ଐତିହ୍ୟ ସୁରକ୍ଷା ଦାୟିତ୍ୱ ଏଏସ୍ଆଇ ନେଇଥିଲେ ହେଁ ଶ୍ରୀମନ୍ଦିର ପ୍ରଶାସନର ସମନ୍ୱୟର ଅଭାବରୁ ଏହି ପ୍ରାଚୀନ ଐତିହ୍ୟ ତଥା ଧର୍ମସ୍ଥଳୀର ସୁରକ୍ଷା ଓ ରକ୍ଷଣାବେକ୍ଷଣ ଠିକ୍ ଭାବରେ ହୋଇପାରୁନାହିଁ । ୧୯୭୫ରେ ଶ୍ରୀମନ୍ଦିରକୁ ଜାତୀୟ ଐତିହ୍ୟ ଘୋଷଣା କରାଯିବା ପରେ ୧୯୮୫ରେ ଏଏସ୍ଆଇ ଏହାର ରକ୍ଷଣାବେକ୍ଷଣ ଦାୟିତ୍ୱ ନେଇଥିଲା । ଏହା ଭିତରେ ୪୦ ବର୍ଷ ପୂରିବାକୁ ବସିଛି । ମାତ୍ର ଏହି ସମୟ ଭିତରେ ବଡ଼ଦେଉଳ ଓ ଏହାର ପାଶ୍ୱର୍ ଦେବଦେବୀ ମନ୍ଦିର, ମେଘନାଦ ପାଚେରି ପ୍ରଭୃତି ସ୍ଥାନରୁ ପଥର ଖସିବା ଉଦ୍ବେଗର କାରଣ ହୋଇଛି ।
ଗତ ମାର୍ଚ୍ଚ ୯ରେ ବଡ଼ଦେଉଳରୁ ୨କେଜି ଓଜନର ଏକ ପଥର ଖସିଥିଲା । ପଥର ପଡ଼ି ଶ୍ରୀମନ୍ଦିର କୁରୁମ ବେଢ଼ା ଭିତରେ ପଡ଼ିଥିଲା । ଏଥିରେ କେହି ଆହତ ହୋଇନଥିଲେ । ଏହି ଘଟଣାର ଯାଞ୍ଚ କରି କେଉଁଠୁ ପଥର ଖସିଛି ଚିହ୍ନଟ କରାଯିବ ବୋଲି ଏଏସ୍ଆଇର ସୁପରିଣ୍ଟେଣ୍ଡେଣ୍ଟ କହିଥିଲେ । ହେଲେ ଏପର୍ଯ୍ୟନ୍ତ ପଦକ୍ଷେପ ଶୂନ । ଇତିହାସ ପୃଷ୍ଠାରୁ ଜଣାପଡ଼େ ରକ୍ଷଣାବେକ୍ଷଣ ଅବହେଳାରୁ ୧୯୩୯ ମସିହାରେ ଗର୍ଭଗୃହ ସିଂହାସନ ଉପରୁ ଖସିଥିଲା ପଥର । ୧୯୬୧ରେ ଗର୍ଭଗୃହ ଚାନ୍ଦୁଆ ଉପରୁ ଖସିଥିଲା ପଥର । ସେହିପରି ୧୯୬୯, ୧୯୭୫, ୧୯୭୯ ଓ ୧୯୮୫ରେ ଶ୍ରୀମନ୍ଦିର ପରିସର ବିଭିନ୍ନ ମନ୍ଦିରରୁ ପଥର ଖସିଥିଲା । ୧୯୯୦ରେ ଶ୍ରୀମନ୍ଦିର ଭୋଗମଣ୍ଡପ ଉପରୁ ୨ଟା ପଥର ଓ ଅଁଳାଶ୍ରୀରୁ ଗୋଟିଏ ପଥର ଖସିଥିଲା । ୧୯୯୨ ଗର୍ଭଗୃହରୁ ୧୦ ଟନ୍ ଓଜନର ପଥର ଖସିଥିଲା । ୨୦୦୦ ମସିହାରେ ଜୟବିଜୟ ଦ୍ୱାର ଉପରୁ ପଥର ଖସିଥିଲା । ୨୦୧୯ରେ ଫୋନି ବାତ୍ୟା ବେଳେ ଶ୍ରୀମନ୍ଦିର ବାହାର ପାଶ୍ୱର୍ରେ ଲୁହା ଭାରା ଦିଆଯାଇଥିବାରୁ ପବନ ମାଡ଼ରେ ଲୁହାଭାରା ଖସିବାରୁ ଏକ ବିରାଟ ସିଂହମୂର୍ତ୍ତି ଉପରୁ ଭାଙ୍ଗି ଖସି ପଡ଼ିଥିଲା । ତଥାପି ଏଏସ୍ଆଇ, ଶ୍ରୀମନ୍ଦିର ପ୍ରଶାସନ ଓ ସରକାରଙ୍କର ଚେତା ପଶୁନି ।
