ଭୁବନେଶ୍ୱର,୨୯/୦୪ (ଚାନ୍ଦିନୀ ମହାପାତ୍ର): ଡାହାଣ ଗୋଡ଼ ଆଣ୍ଠୁ ପାଖରୁ ନାହିଁ । ସେହି ସ୍ଥାନରେ ଲାଗିଛି କୃତ୍ରିମ ଗୋଡ଼ । ଅନ୍ୟ ଗୋଡ଼ର ଆଙ୍ଗୁଠି ସବୁ ଛୋଟ । ବାମ ହାତର ୪ଟି ଓ ଡାହାଣ ହାତର ୩ଟି ଆଙ୍ଗୁଠି ଛୋଟ । ହେଲେ ଏତେ ସବୁ ଅକ୍ଷମତାକୁ ସେ କେବେ ଖାତିର କରିନାହାନ୍ତି । ଗୋଡ଼ ନଥିଲେ ବି କୃତ୍ରିମ ଗୋଡ଼ରେ ଘୁଙ୍ଗୁର ଲଗାଇ ଓହ୍ଲାନ୍ତି ମଞ୍ଚକୁ । ଆଉ ଜଣେ ନିପୁଣ ନୃତ୍ୟଶିଳ୍ପୀ ଭାବେ ନୃତ୍ୟ ପରିବେଷଣ କରି ସମସ୍ତଙ୍କୁ ଅଭିଭୂତ କରିଦିଅନ୍ତି । ଏଭଳି ଜଣେ ଦୃଢମନା ନୃତ୍ୟଶିଳ୍ପୀ ହେଲେ ମୋନାଲି ସ୍ୱାଇଁ(୨୬ ବର୍ଷ) । ତାଙ୍କ ଘର କେନ୍ଦ୍ରାପଡ଼ା ଜିଲ୍ଲାରେ । ଏବେ ସେ ଭୁବନେଶ୍ୱରରେ ରହୁଛନ୍ତି । ସାଧାରତଃ ନୃତ୍ୟ କ୍ଷେତ୍ରରେ ଶାରୀରିକ ସକ୍ଷମତା ଅଧିକ ଆବଶ୍ୟକ । କିନ୍ତୁ ଏହାକୁ ଭୁଲ ପ୍ରମାଣ କରିଛନ୍ତି ମୋନାଲି ।
ଛୋଟ ବେଳୁ ନୃତ୍ୟ ପ୍ରତି ତାଙ୍କର ଦୁର୍ବଳତା ରହିଥିଲା । ଟିଭିରେ ଯେତେବେଳେ କାହାକୁ ନୃତ୍ୟ କରୁଥିବାର ଦେଖନ୍ତି ସେ ତାହାକୁ ଦେଖି ଅଭ୍ୟାସ କରନ୍ତି । ବୟସ ବଢ଼ିବା ସହ ନୃତ୍ୟ ପ୍ରତି ତାଙ୍କର ଆଗ୍ରହ ବଢ଼ି ଚାଲିଲା । ପରେ ସେ ୟୁଟ୍ୟୁବ୍ ଦେଖି ନୃତ୍ୟ ଅଭ୍ୟାସ କଲେ । ଆଶ୍ଚର୍ଯ୍ୟର କଥା ସେ କାହାଠୁ ନୃତ୍ୟ ଶିକ୍ଷା ନେଇନାହାନ୍ତି । ମୁଖ୍ୟତଃ ସେ ସେମିକ୍ଲାସିକାଲ ଓ ମଡର୍ଣ୍ଣ ଡ୍ୟାନ୍ସ କରନ୍ତି । ନୃତ୍ୟ ପରିବେଷଣ କରି ଜିଲ୍ଲା ଓ ରାଜ୍ୟ ସ୍ତରରେ ବହୁ ପୁରସ୍କାର ପାଇଛନ୍ତି । ମଞ୍ଚରେ ନୃତ୍ୟ କରିବା ସମୟରେ ତାଙ୍କ ଗୋଡ଼ରେ ଫୋଟକା ହୋଇ ଘା ହୋଇଯାଏ । ଖାଲି ସେତିକି ନୁହେଁ, ଅନେକ ସମୟରେ କୃତ୍ରିମ ଗୋଡ଼ ଲାଗିଥିବା ସ୍ଥାନରୁ ରକ୍ତ ମଧ୍ୟ ବୋହିଥାଏ । ଦରଜ ବହୁଦିନ ପର୍ଯ୍ୟନ୍ତ ରହିଥାଏ । ତଥାପି ସେ ଗୋଟେ ପରେ ଗୋଟେ ନୃତ୍ୟ ଭେଟିଦିଅନ୍ତି ।
ଏହାବାଦ୍ ସେ ଅନେକ ଥର ମଞ୍ଚରେ ମଡେଲିଙ୍ଗ୍ ଏବଂ ଅଭିନୟ ମଧ୍ୟ କରିଛନ୍ତି । ମୋନାଲି କୁହନ୍ତି, ମୋତେ ନାଚିବାକୁ ଖୁବ୍ ଭଲ ଲାଗେ । ଯେତେବେଳେ ବି ମୁଁ ମଞ୍ଚରେ ନୃତ୍ୟ ପରିବେଷଣ କରେ ସବୁ କଷ୍ଟକୁ ଭୁଲିଯାଏ । ଆଗକୁ ଲକ୍ଷ୍ୟ ରଖିଛି ଯଦି ଭଗବାନ ସୁଯୋଗ ଦିଅନ୍ତି, ତେବେ ପିଲାମାନଙ୍କୁ ନୃତ୍ୟ ପ୍ରଶିକ୍ଷଣ ଦେବି ।
ଏହି ଖବରଟିକୁ ପଢନ୍ତୁ-ବିଶ୍ୱ ନୃତ୍ୟ ଦିବସ : ପରୀକ୍ଷା ନିରୀକ୍ଷା ନାଁରେ ପରମ୍ପରା ଓ ପରିଚୟର ହେଉଛି ବିକୃତୀକରଣ
